កណ្ដាល ៖ លោកស្រី វណ្ណ ឡុច និងក្រុមគ្រួសាររស់នៅភូមិទួលក្រូច ឃុំក្រាំងយ៉ូវ ស្រុកស្អាង ខេត្តកណ្ដាល ដែលមានវិវាទដីធ្លីអូសបន្លាយរ៉ាំរ៉ៃជាយូរឆ្នាំមកហើយនោះ លើកម្រាមដៃដប់ស្នើសុំឱ្យអាជ្ញាធរ គ្រប់ជាន់ថ្នាក់ជួយអន្តរាគមន៍និងជួយរកដំណោះស្រាយដល់គ្រួសារគាត់ផង។
ជួបជាមួយអ្នកសារព័ត៌មានយើង លោកស្រី វណ្ណ ឡុច បាននិយាយថាឈ្មោះ មុត សុផល នេះមិនដឹងសំអាងទៅលើអ្វីនោះទេ បានជាធ្វើរបងរំលោភបំពានយកដីរបស់ក្រុមគ្រួសារនាងខ្ញុំជាង ១០ឆ្នាំមកហើយចាប់តាំងពីពេលនោះរហូតមកដល់បច្ចុប្បន្ននេះមិនទាន់មានដំណោះស្រាយនៅឡើយទេ។
លោកស្រីបានបន្តទៀតថា មិនតែប៉ុណ្ណោះឈ្មោះ មុត សុផល បានធ្វើការ៉ាសសាំងបិទផ្លូវខាងមុខថែមទៀតផង ហើយក្រុមគ្រួសាររបស់នាងខ្ញុំមិនដឹងទៅប្តឹងនៅទីណាទេ មានតែពឹងខាងអ្នកសារព័ត៌មានឲ្យជួយផ្សព្វផ្សាយបញ្ហារឿងនេះ ជូនជាដំណឹងនេះ ក្រែងបានដឹងទៅដល់សម្ដេចអគ្គមហាសេនាបតីតេជោ ហ៊ុន សែន ប្រធានរដ្ឋសភានៃព្រះរាជាណាចក្រកម្ពុជា និងសម្ដេចបវរធិបតីហ៊ុន ម៉ា ណែត នាយករដ្ឋមន្ត្រីនៃកម្ពុជា ឯកឧត្តមអភិបាលខេត្តកណ្ដាល ព្រមទាំងសមត្ថកិច្ចជំនាញពាក់ព័ន្ធគ្រប់ជាន់ថ្នាក់ អាចជួយដោះស្រាយនិងរកយុត្តិធម៌ឲ្យក្រុមគ្រួសារនាងខ្ញុំបាន ព្រោះបញ្ហាទំនាស់ដីធ្លីនេះវាអូសបន្លាយពេលជាង១០ឆ្នាំមកហើយ នៅឡើយមិនទាន់មានដំណោះស្រាយ។
ជាចុងក្រោយ ក្រុមគ្រួសារជនរងគ្រោះលើកម្រាមដៃដប់សំពះស្នើសុំអង្វរសម្ដេចអគ្គមហាសេនាបតីតេជោ ហ៊ុន សែន ប្រធានរដ្ឋសភានៃព្រះរាជាណាចក្រកម្ពុជា និង សម្ដេចបវរធិបតីហ៊ុន ម៉ា ណែត នាយករដ្ឋមន្ត្រីនៃកម្ពុជា និងឯកឧត្តមអភិបាលខេត្តកណ្ដាល មេត្តាជួយដំណោះស្រាយ និងរកយុត្តិធម៌ឱ្យក្រុមគ្រួសារគាត់ ដែលជាជនរងគ្រោះដីធ្លីដ៏រ៉ាំរ៉ៃជាង ១០ ឆ្នាំមកហើយ។ ដែលត្រូវបានលោក មុត សុផល រំលោភបំពានយក និងមិនមានដំណោះស្រាយនេះផង ៕
