ភ្នំពេញ ៖ នារសៀលថ្ងៃទី០៣ ខែមេសា ឆ្នាំ២០២៦ នៅទីស្តីការក្រសួង រាជធានីភ្នំពេញ ឯកឧត្តម សុខ ចាន់ភក្តី រដ្ឋលេខាធិការក្រសួងព័ត៌មាន អញ្ជើញ ចូលរួមពិធី ពិធីសូត្រមន្តចម្រើនព្រះបរិត្ត ប្រសិទ្ធីពរជ័យ សិរីមង្គល ជាកិច្ចជូនដំណើរឆ្នាំចាស់ និងទទួលអំណរឆ្នាំថ្មី ដែលនឹងឈានចូលមកដល់នៅថ្ងៃទី១៤ ដល់ថ្ងៃទី១៦ ក្រោមអធិបតីភាព ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និង លោកជំទាវ ទុយ សិរីរតនៈ ប្រធានកិត្តិយសសមាគមនារីកម្ពុជាដើម្បីសន្តិភាព ដើម្បីបណ្ដេញនូវឧបទ្រពចង្រៃក្នុងឆ្នាំចាស់ ។
ពិធីសូត្រមន្តចម្រើនព្រះបរិត្ត សិរីសួស្ដី នេះ ធ្វើឡើងតាមទំនៀមទម្លាប់ប្រពៃណីព្រះពុទ្ធសាសនា ដើម្បីបួងសួងសុំសេចក្តីសុខ ប្រោះព្រំលើករាសី សុំពរជ័យ សិរីសួស្តី ជ័យមង្គលវិបុលសុខ បវរមហាប្រសើរ កើតមានដល់ថ្នាក់ដឹកនាំ មន្ត្រីរាជការទាំងអស់នៃក្រសួងព័ត៌មាន ។
បន្ទាប់ពីបញ្ចប់ពិធីសូត្រមន្ត ចម្រើនព្រះបរិត្ត សិរីសួស្ដី រួចរាល់ ក្រសួងក៏មានរៀបចំការសម្តែងរបាំជូនពរ របាំត្រុដិ របាំឆៃយុំា ការលេងល្បែងប្រជាប្រិយខ្មែរ និងពិធីពិសានំបញ្ចុកសាមគ្គី ជួបជុំមន្ត្រីរាជការទាំងអស់នៃក្រសួងព័ត៌មាន ។
សូមបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២៦ នឹងឈានចូលមកនៅវេលាម៉ោង១០និង៤៨នាទីព្រឹក ត្រូវនឹងថ្ងៃអង្គារ៍ ១៤រោច ឆ្នាំមមី អដ្ឋស័ក ព.ស.២៥៦៩ ដែលទេវតាឆ្នាំថ្មី ព្រះនាម រាក្យសាទេវី បុត្រីទីបីកបិលមហាព្រហ្ម ។ ពិធីបុណ្យចូលឆ្នាំថ្មីប្រពៃណីជាតិខ្មែរប្រព្រឹត្តទៅរយៈពេល៣ថ្ងៃ គឺចាប់ពីថ្ងៃទី១៤ ខែមេសា ដល់ថ្ងៃទី១៦ ខែមេសា ឆ្នាំ២០២៦ ៕
