ខេត្តកំពង់ស្ពឺ ៖ ថ្ងៃព្រហស្បតិ៍១១រោច ខែជេស្ឋ ឆ្នាំមមីអដ្ឋសក៏ពុទ្ធសករាជ២៥៧០ ត្រូវនិងថ្ងៃទី១១ខែមិថុនា ឆ្នាំ២០២៦ ព្រះករុណា ព្រះធម្មបាលោ ហែម អ៊ុន ជាព្រះចៅអធិការវត្តអង្គក្តី ព្រះសង្ឃ លោកអាចារ្យគណៈកម្មការ បានផ្តើមប្រារព្ធធ្វើពិធីបុណ្យឡើងសាលា និងពុទ្ធាភិសេក ដែលផ្តើមបុណ្យដោយ លោកជំទាវ ឆាយ សុខន និងបុត្រ ព្រមទាំងចៅៗ តាមរយៈ លោកបណ្ឌិត ឃឹម រដ្ឋា ក្រុមការងារអង្គភាពគេហទំព័រ រដ្ឋា រស្មីស្ទឹងត្រង់ និង អង្គការចីរភាពបរិស្ថានកម្ពុជា និង ប្រជាពុទ្ធបរិស័ទចំណុះឲ្យជើងវត្តអង្គក្តីទាំងមូល ។ ពិធីបុណ្យនេះ ប្រារព្ធធ្វើនៅវត្តអង្គក្តី ឃុំព្រៃវិហារស្រុក គងពិសី ខេត្តកំពង់ស្ពឺ។
ព្រះចៅអធិការវត្តអង្គក្តី ព្រះសង្ឃ លោកអាចារ្យគណៈកម្មការ និង លោកជំទាវ លោកជំទាវ ឆាយ សុខន និងបុត្រ ព្រមទាំងចៅៗ តាមរយៈលោកបណ្ឌិត ឃឹម រដ្ឋា ក្រុមការងារអង្គភាពគេហទំព័រ រដ្ឋា រស្មីស្ទឹងត្រង់ និង អង្គការចីរភាពបរិស្ថានកម្ពុជា និង ប្រជាពុទ្ធបរិស័ទចំណុះឲ្យជើងវត្តអង្គក្តីទាំងមូល ក៏ដូចជា ពុទ្ធបរិស័ទជិតឆ្ងាយទាំងអស់ បានចូលរួមពិធីបុណ្យឡើងសាលា និង ពុទ្ធាភិសេក ដើម្បីបានជា ទីកន្លែងសមរម្យ សម្រាប់គោរពប្រតិបត្តិដល់ព្រះពុទ្ធសាសនា ដែលជាសាសនារបស់រដ្ឋ និងឧទ្ទិសកុសល ផលបុណ្យជូនសាច់ញាតិ បុព្វការីជន និងចាប់យកមគ្គផលទៅតាមសទ្ធាជ្រះថ្លារៀងៗខ្លួន ។
ពិធីបុណ្យបានប្រព្រឹត្តទៅដោយការជួបជុំពុទ្ធបរិសទ្ធិប្រគេនចង្ហាន់ព្រឹក ជួបជុំម្ចាស់ធាតុដង្ហែ ដល់វគ្គចុះឈ្មោះនឹងកត់ត្រាចំនួនកោដិ និងលោកអាចារ្យ ៥ រូបដឹកនាំដង្ហែអដ្ឋិធាតុប្រទក្សិណជុំវិញវត្ត រួចតំកល់ក្នុងរាជវត្ត ។
បន្ទាប់មក ក៏មានពិធីសែនក្រុងពលី លោកអាចារ្យដឹកនាំសែនដូនតាមានបាយទឹកភេជ្ជៈ រៀបចំភេជ្ជៈព្រះសង្ឃ និងនមស្សកាសមាទានសិល ចម្រើនព្រះបរិត្ត សម្តែងព្រះធម៌ទេសនា ទៅតាមពិធីព្រះពុទ្ធសាសនា ។
ក្នុងពិធីនេះដែរ ព្រះវីរិយធម្មោ ហាវ ដាយ៉ាន ព្រះធម្មធរ អនុគណស្រុកគងពិសីសម្តែងធម្មគោរព រួចសូត្រយ៉ោក ។ រហូតដល់ពេលរសៀល មានសម្តែងធម៌ទេសនា ដោយព្រះគ្រូ សច្ចវរញាណ យី ណារិទ្ធិ ព្រះវិន័យធរ អនុគណស្រុកគងពិសី (ទេសនាជាតក) និងកិច្ចនមស្សកាសមាទានសីលចម្រើនព្រះបរិត្ត ។
នាថ្ងៃបន្ទាប់ ក៏មានការរៀបចំធ្វើកិច្ចនមស្សសមាទានសិលចម្រើនបរិត្ត សម្តែងព្រះធម៌ទេសនា ដោយព្រះសិលមុនីសូចន្ទ (ចន្ទ ត្ថេរោ) ព្រះរាជគណៈថ្នាក់កិត្តិយសគណៈមហានិកាយ នៃ ព្រះរាជាណាចក្រកម្ពុជា និងព្រះគ្រូ ឧត្តម មុនីវង្សា ព្រះអនុគណស្រុកគងពិសី រួចនិមន្តព្រះអង្គគ្រូបកអសុភៈ ។
សូមបញ្ជាក់ថា នៅពេលរាត្រី ក៏មានសិល្បៈល្ខោននាយផ្លយ ខេត្តតាកែវ សម្តែងជូនបងប្អូនប្រជាពលរដ្ឋទស្សនា កំសាន្តផងដែរ ។
បន្ថែមពីនោះទៀត លោកបណ្ឌិត ឃឹម រដ្ឋា នាយក អង្គភាពគេហទំព័រ រដ្ឋា រស្មីស្ទឹងត្រង់ ក៏បានព្រលែងសត្វកន្ធាយចំនួនពីរក្បាល ទៅក្នុងស្រះរបស់វត្តផងដែរ។
ទាំងនេះគឺដោយសារតែ ប្រទេសមានសុខសន្តិភាព ពេញលេញទើបធ្វើឱ្យប្រជាពលរដ្ឋគ្រប់រូប គ្រប់ក្រុមគ្រួសារ បានរស់នៅដោយភាពសុខសាន្ត បានឃើញពីការរីកចម្រើន យ៉ាងឆាប់រហ័សរបស់ប្រទេសជាតិយើង។
សន្តិភាពបានកើតឡើងពីការចូលរួមគ្រប់ភាគីទាំងអស់ក្រោមការដឹកនាំរបស់ប្រមុខថ្នាក់ដឹកនាំគណបក្សប្រជាជនកម្ពុជា បានធ្វើឱ្យវិស័យពុទ្ធចក្រ និងអាណាចក្រមានការរីកចម្រើនទន្ទឹមគ្នា ពិសេសពុទ្ធបរិស័ទជិតឆ្ងាយ មានលទ្ធភាព និងមធ្យោបាយគ្រប់គ្រាន់ ក្នុងការចូលរួមប្រារព្ធពិធីបុណ្យផ្សេងៗ។
បន្ថែមពីនោះទៀត លោកជំទាវ ឆាយ សុខន ព្រមទាំងបុត្រនឹងចៅៗ បានជាវព្រះពុទ្ធដិមាករព្រះអង្គកែវ ជាថវិកាចំនួន 1000 មួយពាន់ដុល្លារ និងប្រគេនដល់ព្រះគ្រូចៅអធិការចំនួន 1 លានរៀលសម្រាប់កសាងក្នុងវត្ត និងថវិកាចំនួន ១ លាន 90 ម៉ឺនរៀល បន្ថែមទៀតសម្រាប់ការចំណាយផ្សេងៗ ។
ពិធីបុណ្យឡើងសាលា គឺជាពិធីបុណ្យប្រពៃណី និងជំនឿរបស់សហគមន៍ខ្មែរ ដែលត្រូវបានរៀបចំឡើង ដើម្បីធ្វើការបួងសួងសុំសេចក្តីសុខ សេចក្តីចម្រើន ដើម្បីឧទ្ទិសកុសលដល់ បុព្វការីជន ដែលចែកឋានទៅកាន់លោកខាងមុខ ៕
