ខេត្តកំពង់ចាម៖ យុទ្ធនាការដាំកូនឈើចម្រុះក្រោមប្រធានបទ «ពន្លកបៃតង» ត្រូវបានប្រារព្ធឡើងយ៉ាងកុះករ ដើម្បីរួមចំណែកបង្កើនគម្របបៃតង និងលើកកម្ពស់សោភ័ណភាពបរិស្ថានធម្មជាតិនៅក្នុងសហគមន៍។
ពិធីនេះបានប្រព្រឹត្តទៅនាព្រឹកថ្ងៃអាទិត្យ ទី៩ ខែសីហា ឆ្នាំ២០២៦ ស្ថិតនៅបរិវេណវត្តឥន្ធមុនីវន ហៅវត្តស្រែអំពៅ ក្នុងភូមិស្រែអំពៅ ឃុំទួលសំបួរ ស្រុកស្ទឹងត្រង់ ខេត្តកំពង់ចាម ក្រោមអធិបតីភាពដ៏ខ្ពង់ខ្ពស់របស់ លោកបណ្ឌិត ឃីម រដ្ឋា អនុប្រធានអង្គការចីរភាពបរិស្ថានកម្ពុជា និងជាតំណាងដ៏ខ្ពង់ខ្ពស់របស់ លោកបណ្ឌិត ហោ គន្ធា ប្រធានអង្គការចីរភាពបរិស្ថានកម្ពុជា។
កិច្ចសហការ និងសមាសភាពចូលរួម
ព្រឹត្តិការណ៍បរិស្ថានដ៏មានសារៈសំខាន់នេះ កើតឡើងពីកិច្ចសហការយ៉ាងជិតស្និទ្ធរវាង អង្គការចីរភាពបរិស្ថានកម្ពុជាព្រះគ្រូចៅអធិការ និងគណៈកម្មការវត្តឥន្ធមុនីវន (ហៅវត្តស្រែអំពៅ) កម្មវិធីនេះក៏មានការសម្របសម្រួល និងចូលរួមផ្ទាល់ពី លោក អាន វណ្ណា ប្រធានសាខាអង្គការចីរភាពបរិស្ថានកម្ពុជាប្រចាំខេត្តកំពង់ចាម ព្រមទាំងមានវត្តមានចូលរួមយ៉ាងច្រើនកុះករពីសំណាក់ព្រះសង្ឃ អាជ្ញាធរមូលដ្ឋាន មន្ត្រីរាជការ លោកគ្រូ-អ្នកគ្រូ សិស្សានុសិស្ស និងប្រជាពលរដ្ឋក្នុងសហគមន៍ស្រុកស្ទឹងត្រង់។
គោលបំណងនៃយុទ្ធនាការ
យុទ្ធនាការដាំកូនឈើ «ពន្លកបៃតង» ចំនួន ១,៦០០ដើម នាពេលនេះ ត្រូវបានរៀបចំឡើងក្នុងគោលបំណងសំខាន់ៗរួមមាន៖
បង្កើនគម្របបៃតង៖ កែប្រែបរិវេណវត្តអារាមឱ្យទៅជាកន្លែងមានស្រមោលត្រជាក់ និងខ្យល់អាកាសបរិសុទ្ធ សម្រាប់ពុទ្ធបរិស័ទ។
បណ្តុះស្មារតីស្រឡាញ់ធម្មជាតិ៖ ផ្សព្វផ្សាយ និងជំរុញឱ្យមហាជន ជាពិសេសស្រទាប់យុវជនយល់ដឹងពីតម្លៃមិនអាចកាត់ថ្លៃបាននៃដើមឈើ ជាពិសេសរួមចំណែកកាត់បន្ថយការប្រែប្រួលអាកាសធាតុ និងបង្កើតប្រព័ន្ធអេកូឡូស៊ីដ៏ល្អក្នុងមូលដ្ឋាន។
ថ្លែងក្នុងឱកាសនោះ លោកបណ្ឌិត ឃីម រដ្ឋា បានកោតសរសើរចំពោះស្មារតីសាមគ្គីភាព និងការទទួលខុសត្រូវខ្ពស់របស់ភាគីពាក់ព័ន្ធទាំងអស់។ លោកបណ្ឌិតក៏បានអំពាវនាវដល់ព្រះសង្ឃ អាជ្ញាធរ ក៏ដូចជាប្រជាពលរដ្ឋទាំងអស់ មេត្តាជួយថែរក្សា ការពារ និងស្រោចទឹកកូនឈើទាំង ១,៦០០ដើមនេះឱ្យលូតលាស់ល្អ ដើម្បីជាប្រយោជន៍ និងជាមរតកបៃតងសម្រាប់មនុស្សជំនាន់ក្រោយ។
គួរបញ្ជាក់ផងដែរថា យុទ្ធនាការនេះមិនត្រឹមតែជួយដល់បរិស្ថានប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីការរួមគ្នារវាងវិស័យពុទ្ធចក្រ និងអាណាចក្រ ក្នុងការអភិវឌ្ឍសហគមន៍ប្រកបដោយចីរភាពផងដែរ៕
