(ភ្នំពេញ)៖ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា បានក្រើនរំលឹកឲ្យប្រជាពលរដ្ឋបន្តប្រុងប្រយ័ត្ន ចំពោះការរាតត្បាតនៃជំងឺកូវីដ-១៩ ដោយលោកស្រីវេជ្ជបណ្ដិត បានរំលឹកអំពីអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺត្រូវអនុវត្តន៍ វិធានការ ៣ការពារ និង៣កុំ ឲ្យបានគ្រប់ៗគ្នា។
លោកស្រី ឱ វណ្ណឌីន បានឆ្លើយតបទៅនឹងសំណួរអ្នកសារព័ត៌មាន នាថ្ងៃទី២១ ខែធ្នូនេះថា ការមិនការពារខ្លួនពីការចម្លងវីរុសកូវីដ-១៩ គឺជាការមើលងាយខ្លួនឯង ទុកខ្លួនឯងឲ្យឈឺ និងអាចឈានទៅដល់គ្រោះថ្នាក់សុខភាពធ្ងន់ធ្ងរ ប្រសិនបើកាន់តែប្រហែសជាមួយនឹងវីរុសកូវីដ-១៩។
លោកស្រី បានថ្លែងបន្ត ថា សុំកុំមើលស្រាលលើលទ្ធភាពនៃការចម្លងវីរុសកូវីដ-១៩ ធ្វើឲ្យយើងងាយភ្លេចវីរុសកូវីដ-១៩ ដែលងាយនឹងធ្លាក់ចូលទៅក្នុងស្ថានភាពឲ្យវីរុសកូវីដ-១៩ សប្បាយរីករាយក្នុងការវ៉ៃឡុកសរីរាង្គយើងដោយងាយស្រួល និងដោយមិនដឹងខ្លួនបានគ្រប់ពេលវេលា គ្រប់កាល:ទេស: និងគ្រប់ទីកន្លែង។ ដូច្នេះ សូមលោកអ្នក មេត្តាកុំភ្លេចអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺត្រូវអនុវត្តន៍ វិធានការ ៣ការពារ និង ៣កុំ ឲ្យបានគ្រប់ៗគ្នា។
លោកស្រី បានបន្តថា«ខ្ញុំសុំជម្រាបជូនថា ការធ្វេសប្រហែសរបស់បុគ្គល និងអាចនាំមកនូវការចម្លងវីរុសកូវីដ-១៩ ក្នុងគ្រួសារ និងក្នុងសហគមន៍ដោយមិនដឹងខ្លួន។ ដូច្នេះការខិតខំអនុវត្តន៍វិធានការសុខាភិបាល ឲ្យបានខ្ជាប់ខ្ជួន ព្រមទាំងចេះកែប្រែឥរិយាបទរបស់ខ្លួន សម្រាប់ការរស់នៅធម្មតាតាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩ ជាភារកិច្ចរបស់បុគ្គលម្នាក់»។
លោកស្រីវេជ្ជបណ្ឌិត ឱ វណ្ណឌីន បានឲ្យដឹងទៀតថា «យើងមិនត្រូវមើលស្រាលលើលទ្ធភាពចម្លងរហ័ស នៃវីរុសកូវីដ-១៩ និងភាពធ្ងន់ធ្ងររបស់ជំងឺនេះឡើយ ដែលអាចកើតមានឡើងគ្រប់កាល:ទេស: គ្រប់ពេលវេលា និងគ្រប់ទីកន្លែង លើបុគ្គលដែលមិនបានការពារខ្លួនត្រឹមត្រូវ តាមការណែនាំរបស់សម្តេចតេជោនាយករដ្ឋមន្ត្រី និងរបស់ក្រសួងសុខាភិបាល»។
អ្នកនាំពាក្យក្រសួងសុខាភិបាល បានអំពាវនាវថា «ខ្ញុំសូមអំពាវនាវ ឲ្យបងប្អូនប្រជាពលរដ្ឋទាំងអស់ បន្តអនុវត្តន៍នូវវិធានការ ៣ការពារ ៖ ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាពបុគ្គល ពីមួយម៉ែត្រកន្លះឡើង និង វិធានការ ៣កុំ ៖ កុំទៅកន្លែងមានមនុស្សច្រើនកុះករ កុំទៅកន្លែងដែលបិទជិតគ្មានខ្យល់ចេញចូល ប្រើម៉ាស៊ីនត្រជាក់ច្រើន និងកុំប៉ះពាល់គ្នា ដូចជាពេលលជួបគ្នា កុំចាប់ដៃគ្នា កុំឱបគ្នា កុំកៀកកគ្នា ជាដើម»៕
0
អ្នកនាំពាក្យក្រសួងសុខាភិបាលកម្ពុជា បានក្រើនរំលឹកឲ្យប្រជាពលរដ្ធបន្តប្រុងប្រយ័ត្នចំពោះការរាតត្បាតនៃជំងឺកូវីដេ-១៩
«គេហទំព័រ រស្មីស្ទឹងត្រង់ | Rasmeistoengtrang News» ទូរស័ព្ទទំនាក់ទំនង097 72 88 071 | 076 44 44 373
http://www.rasmeistoengtrang.com
Filed in: ព័ត៌មានជាតិ
