ខេត្តកណ្តាល៖ លោក ស៊ូម សារឿន ប្រធានសមាគមរាជសីហ៍ ដោយមានការចូលរួមពីថ្នាក់ដឹកនាំសមាគម បានអញ្ជើញចុះពិនិត្យកុដិ១ខ្នង កម្ពស់២ជាន់ និង អាគារពុទ្ធិកសិក្សាអនុវិទ្យាល័យវត្តកោះប្រាក់ ១ខ្នងទៀតកម្ពស់២ជាន់ សរុបទំហំប្រមាណជាង ១០,០០០ម៉ែត្រការ៉េ ក្នុងគោលបំណងឧបត្ថម្ភថ្នាំពណ៌សម្រាប់លាបជញ្ជាំងអាគារទាំងពីរបង្ហើយការសាងសង់ ដែលជាអំណោយរបស់សមាគម ប្រគេនជូនវត្តកោះប្រាក់ ស្ថិតក្នុងស្រុកគៀនស្វាយ ខេត្តកណ្តាល នាព្រឹក ថ្ងៃអាទិត្យ ថ្ងៃទី០១ ខែឧសភា ឆ្នាំ២០២២។
ព្រះវិជ័យញាណ យុង កុសល ព្រះគ្រូចៅអធិកាវត្តកោះប្រាក់ បង្ហាញព្រះទ័យសប្បាយរីករាយ និង ថ្លែងអំណរគុណយ៉ាងជ្រាលជ្រៅ លោកប្រធានសមាគម ស៊ូម សារឿន និងថ្នាក់ដឹកនាំទាំងអស់ ដែលបានប្រគេនថ្នាំលាបជញ្ជាំងអាគារពុទ្ធិកសិក្សា និងកុដិ សម្រាប់បម្រើវិស័យអប់រំបែបសាសនាព្រះសម្មាសម្ពុទ្ធ និងសូម ប្រគេនពរដល់ សមាគមរាជសីហ៍ សូមទទួលបានជោគជ័យគ្រប់ភារកិច្ច ទាំងផ្លូវអាណាចក្រ និងពុទ្ធចក្រ៕
