(កំពង់ចាម) ៖ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង មេបញ្ជាការកងទ័ពជើងគោក នៅព្រឹកថ្ងៃទី១៦ ខែសីហា ឆ្នាំ២០២២នេះ បានអញ្ជើញជាអធិបតីក្នុងពិធី បញ្ចុះបឋមសិលាសាងសង់សំណង់អគារសិក្សាកំពស់៤ជាន់ ថ្មីមួយបន្ថែមទៀត នៃពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន ខេត្តកំពង់ចាម ស្ថិតក្នុងក្រុងកំពង់ចាម ខេត្តកំពង់ចាម។ ពិធីនេះក៏មានការនិមន្តជាកិត្តិយសពីសម្តេច ឈឹង ប៊ុនឈា ព្រះអគ្ការធិការរង រួមនឹង ព្រះមន្ត្រីសង្ឃ ថ្នាក់ដឹកនាំ មន្ត្រីរាជការ សាស្ត្រាចារ្យ លោកគ្រូ អ្នកគ្រូ និងសមណនិស្សិត និស្សិត ប្រមាណជិត១០០០នាក់។
គូសបញ្ជាក់ថា ពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន បានរៀបចំពិធីបញ្ជុះបឋមសិលាសាងសង់អគារសិក្សា១ខ្នង ៤ជាន់ ៩បន្ទប់ និងសាលប្រជុំចំនួន១។ ពុទ្ធិកសាកលវិទ្យាល័យសម្តេចអគ្គមហាសេនាបតីតេជោ ហ៊ុន សែន បានបង្កើតឡើងដោយអនុក្រឹត្យលេខ ១៩២ អនក្រ.បក ចុះថ្ងៃទី២៣ ខែសីហា ឆ្នាំ២០១១ របស់រាជរដ្ឋាភិបាលនៃព្រះរាជាណាចក្រកម្ពុជា មានទីតាំងស្ថិតនៅវត្ត សុទស្សានារាម ជ្រោយថ្ម ផ្លូវព្រះបាទសីហនុ (ជាប់មាត់ទន្លេមេគង្គ) សង្កាត់បឹងកុក ក្រុងកំពង់ចាម ខេត្តកំពង់ចាម ជាគ្រឹះស្ថានពុទិ្ធកឧត្តមសិក្សារបស់រដ្ឋ ស្ថិតនៅក្រោមការគ្រប់គ្រងរបស់ក្រសួងធម្មការ និងសាសនា បានដំណើរការ បណ្តុះ បណ្តាលតាំងពីឆ្នាំ២០១១មកម្ល៉េះ។
ថ្លែងក្នុងឱកាសនោះ អ៊ុន ចាន់ដា អភិបាលខេត្ត បានមានប្រសាសន៍ថា ពុទ្ធិកសិក្សា បានបណ្តុះបណ្តាលព្រះសង្ឃតាំងពីធម្មវិន័យថ្នាក់បឋមសិក្សា រហូតដល់ថ្នាក់ឧត្តមសិក្សា ជាពិសេសនិស្សិតដែលក្រីក្រមិនមានលទ្ធភាពទៅបន្តការសិក្សានៅសាលាឯកជន ឬទៅភ្នំពេញ។
រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា បានខិតខំអស់ពីកម្លាំងកាយចិត្តបញ្ញាស្មារតីក្នុងការជម្រុញ និងគាំទ្រតាមគ្រប់រូបភាពដល់ក្រសួងធម្មការ និងសាសនា ដែលបានពុះពារជំនះគ្រប់ឧបសគ្គក្នុងការគ្រប់គ្រង និងដឹកនាំវិស័យសាសនា ជាពិសេសពុទ្ធិកសិក្សា ដែលមានអគ្គាធិការដ្ឋាន ពុទ្ធិកសិក្សាជាតិ ជាចំណុះក្នុងការដឹកនាំផ្ទាល់សម្រាប់វិស័យនេះ។
រាជរដ្ឋាភិបាលបានខិតខំពង្រឹង និងពង្រីក វិស័យពុទ្ធិកសិក្សាឱ្យកាន់តែខ្លាំងក្លាថែមទៀត ដើម្បីទទួលបានទាំងបរិមាណ ទាំងគុណភាព តាមរយៈការបញ្ចូលក្នុងកម្មវិធីនយោបាយរបស់រាជរដ្ឋាភិបាលនីតិកាលទី៦ នៃរដ្ឋសភាដែលបានចែងថា «បន្តគោរពសេរីភាពខាងជំនឿ និងសាសនាលើកស្ទួយព្រះពុទ្ធសាសនា ដែលជាសាសនារបស់រដ្ឋ ជាពិសេសការបន្តពង្រឹង និងពង្រីកពុទ្ធិកសិក្សានៅគ្រប់កម្រិត ការបោះពុម្ពផ្សព្វផ្សាយគម្ពីរដីកា ក្បួនច្បាប់នានា និងកិច្ចប្រតិបត្តិធម្មវិន័យ ព្រមទាំងគាំទ្រសកម្មភាព នៃសាសនាផ្សេងៗទៀតក្នុងសង្គមផងដែរ» ។
ឯកឧត្តមអភិបាលខេត្ត បន្តថា ការរីកចម្រើនផ្នែកពុទ្ធិកសិក្សា ដែលយើងទាំងអស់គ្នាបានឃើញដូចពេលនេះ គឺមិនត្រឹមតែកើតឡើងពីកិច្ចខិតខំប្រឹងប្រែងរបស់រាជរដ្ឋាភិបាល ក៏ដូចជាក្រសួងធម្មការ និងសាសនា ឬអគ្គាធិការដ្ឋានពុទ្ធិកសិក្សាជាតិប៉ុណ្ណោះទេ ប៉ុន្តែគឺទាមទារឱ្យមានការគាំទ្រ និងជ្រោមជ្រែងផងដែរពីសំណាក់ លោក លោកស្រី លោកឧកញ៉ា អង្គការជាតិ អង្គការអន្ដរជាតិ អង្គការមិនមែនរដ្ឋាភិបាល និងបណ្តាប្រទេសជាដៃគូរអភិវឌ្ឍន៍ផងដែរ ដែលធ្វើឱ្យវិស័យអប់រំរបស់ប្រទេសកម្ពុជាយើង មានសមិទ្ធផលត្រចះត្រចង់ដូចសព្វថ្ងៃនេះ។
ជាមួយគ្នានោះដែរ ឯកឧត្តមអភិបាលខេត្ត បានធ្វើការអំពាវនាវដល់សប្បុរសជន ទូទៅ សូមបន្តចូលរួមចំណែកគាំទ្រ និងកសាងអភិវឌ្ឍន៍វិស័យពុទ្ធិកសិក្សានៅកម្ពុជា ឱ្យបានកាន់តែប្រសើរឡើងថែមទៀត៕
