រាជធានីភ្នំពេញ ៖ នាព្រឹកថ្ងៃពុធ ទី២៤ ខែមិថុនា ឆ្នាំ២០២៦ លោកអភិបាល នៃគណៈអភិបាលខណ្ឌព្រែកព្នៅ រួមជាមួយលោក សន ស៊ីន ចៅសង្កាត់គោករកា លោកមេភូមិទាំង ៤ ភូមិ រួមមាន ភូមិកប់ស្រូវធំ ភូមិកប់ស្រូវតូច ភូមិព្រៃធំ និងភូមិស្វាយចេក បានដឹកនាំកម្លាំងប្រជាការពារភូមិ ប្រជាការពារសង្កាត់គោករកា ព្រមទាំងភ្នាក់ងារសង្កាត់គោករកា ចូលរួមក្នុងសកម្មភាពសម្អាតបរិស្ថាន និងប្រមូលសំរាម។
សកម្មភាពនេះមានការចូលរួមសហការពីអង្គការចីភាពបរិស្ថានកម្ពុជា ដឹកនាំដោយលោក បណ្ឌិត ឃីម រដ្ធា និងក្រុមហ៊ុន 800 Super ដោយសហការជាមួយរដ្ឋបាលខណ្ឌព្រែកព្នៅ និងរដ្ឋបាលសង្កាត់គោករកា ក្នុងការចុះធ្វើពលកម្មសម្អាតបរិស្ថាន និងប្រមូលសំណល់តាមដងផ្លូវ ៣០ម៉ែត្រហៅផ្លូវឌីប៉ុក ស្ថិតក្នុងសង្កាត់គោករកា ខណ្ឌព្រែកព្នៅ រាជធានីភ្នំពេញ។
យុទ្ធនាការនេះមានគោលបំណងលើកកម្ពស់ការយល់ដឹងរបស់ប្រជាពលរដ្ឋអំពីការថែរក្សាអនាម័យ បរិស្ថាន និងការគ្រប់គ្រងសំណល់ឱ្យបានត្រឹមត្រូវ ដើម្បីរួមចំណែកកសាងសហគមន៍ស្អាត បៃតង និងមានសោភ័ណភាពល្អ។
សកម្មភាពសម្អាតបរិស្ថានបែបនេះក៏ជាការបង្ហាញពីស្មារតីសាមគ្គីភាព និងការចូលរួមទទួលខុសត្រូវរួមគ្នារវាងអាជ្ញាធរ អង្គការ ក្រុមហ៊ុនឯកជន និងប្រជាពលរដ្ឋ ក្នុងការថែរក្សាបរិស្ថានឱ្យកាន់តែប្រសើរឡើងសម្រាប់សហគមន៍ និងមនុស្សជំនាន់ក្រោយ ៕
