រតនគិរី៖ នាព្រឹកថ្ងៃសុក្រ ៤ រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៣ ខែកក្កដា ឆ្នាំ២០២៦ រដ្ឋបាលស្រុកវើនសៃ ខេត្តរតនគិរី បានរៀបចំយុទ្ធនាការដាំកូនឈើចំនួន ១០០ដើម ក្រោមប្រធានបទ «ពន្លកបៃតង និងការសម្អាតអនាម័យបរិស្ថាន» ក្នុងគោលបំណងបង្កើនគម្របព្រៃឈើ លើកកម្ពស់គុណភាពបរិស្ថាន និងជំរុញការចូលរួមរបស់ប្រជាពលរដ្ឋក្នុងការអភិរក្សធនធានធម្មជាតិ។
យុទ្ធនាការនេះបានប្រព្រឹត្តទៅក្រោមការដឹកនាំរបស់លោក សុវណ្ណ ធិន អភិបាលនៃគណៈអភិបាលស្រុកវើនសៃ ដោយមានការចូលរួមពីមន្ត្រីមន្ទីរបរិស្ថាន លោក ស៊ី មួយ ប្រធានសាខាអង្គការជីរភាពបរិស្ថានកម្ពុជា មន្ត្រីរដ្ឋបាលព្រៃឈើ អាជ្ញាធរមូលដ្ឋាន នាយកសាលា លោកគ្រូ អ្នកគ្រូ សិស្សានុសិស្ស លោកមេភូមិទាំង ៩ភូមិ និងអ្នកពាក់ព័ន្ធផ្សេងៗ សរុបចំនួន ១៤៥នាក់។
ក្នុងឱកាសនោះ អ្នកចូលរួមបានរួមគ្នាដាំកូនឈើ និងសម្អាតអនាម័យបរិស្ថាន ដើម្បីបង្កើនភាពបៃតង ភាពស្អាត និងបណ្តុះស្មារតីស្រឡាញ់បរិស្ថានដល់យុវជន និងប្រជាពលរដ្ឋ។
យុទ្ធនាការនេះបានបង្ហាញពីការសហការយ៉ាងជិតស្និទ្ធរវាងអាជ្ញាធរមូលដ្ឋាន ស្ថាប័នជំនាញ ស្ថាប័នអប់រំ និងអង្គការសង្គមស៊ីវិល ក្នុងការជំរុញការដាំដើមឈើ ការអភិរក្សធនធានធម្មជាតិ និងការកសាងបរិស្ថានស្អាត បៃតង និងប្រកបដោយនិរន្តរភាពសម្រាប់មនុស្សជំនាន់ក្រោយ។
