ខេត្តក្រចេះ ៖ នៅថ្ងៃទី ៧ ខែកក្កដា ឆ្នាំ២០២៦ វេទិកាសាធារណៈមួយត្រូវបានរៀបចំឡើងក្រោមអធិបតីភាព ថ្នាក់ដឹកនាំក្រសួងព័ត៌មាន និងប្រធានក្រុមការងាររាជរដ្ឋាភិបាលចុះមូលដ្ឋានស្រុកចិត្របុរី ខេត្តក្រចេះ ដើម្បីត្រួតពិនិត្យ វាយតម្លៃ និងគាំទ្រការអនុវត្តកម្មវិធីនយោបាយ និងយុទ្ធសាស្ត្របច្ចុកោណ ដំណាក់កាលទី១ របស់រាជរដ្ឋាភិបាល។
វេទិកានេះបានប្រព្រឹត្តទៅក្នុងបរិយាកាសស្និទ្ធស្នាល និងប្រកបដោយការទទួលខុសត្រូវខ្ពស់ ដោយមានការចូលរួមពីថ្នាក់ដឹកនាំ មន្ត្រីរាជការ អាជ្ញាធរមូលដ្ឋាន កងកម្លាំងប្រដាប់អាវុធ តំណាងមន្ទីរ អង្គភាពពាក់ព័ន្ធ ព្រមទាំងប្រជាពលរដ្ឋយ៉ាងច្រើនកុះករ។
ក្នុងឱកាសនោះ អង្គវេទិកាបានលើកឡើងពីសារៈសំខាន់នៃការអនុវត្តកម្មវិធីនយោបាយ និងយុទ្ធសាស្ត្របច្ចុកោណ ដំណាក់កាលទី១ ដែលជាគោលនយោបាយអាទិភាពរបស់រាជរដ្ឋាភិបាល ក្នុងគោលបំណងជំរុញការអភិវឌ្ឍសេដ្ឋកិច្ច សង្គម ការលើកកម្ពស់ជីវភាពរស់នៅរបស់ប្រជាពលរដ្ឋ ការពង្រឹងអភិបាលកិច្ចល្អ ការរក្សាសន្តិសុខ សណ្តាប់ធ្នាប់សាធារណៈ និងការផ្តល់សេវាសាធារណៈឱ្យកាន់តែមានប្រសិទ្ធភាព និងតម្លាភាព។
ជាមួយគ្នានេះ ប្រជាពលរដ្ឋបានលើកឡើងនូវសំណូមពរ កង្វល់ និងបញ្ហាប្រឈមនានាដែលកើតមាននៅក្នុងមូលដ្ឋាន ដើម្បីឱ្យថ្នាក់ដឹកនាំ និងមន្ត្រីជំនាញពាក់ព័ន្ធធ្វើការពន្យល់ បកស្រាយ និងដោះស្រាយឱ្យបានទាន់ពេលវេលា ស្របតាមគោលការណ៍របស់រាជរដ្ឋាភិបាល។
អង្គវេទិកាបានបញ្ចប់ដោយជំរុញឱ្យអាជ្ញាធរគ្រប់លំដាប់ថ្នាក់ និងមន្ត្រីពាក់ព័ន្ធ បន្តសហការយ៉ាងជិតស្និទ្ធក្នុងការអនុវត្តកម្មវិធីនយោបាយ និងយុទ្ធសាស្ត្របច្ចុកោណ ដំណាក់កាលទី១ ឱ្យទទួលបានលទ្ធផលកាន់តែល្អប្រសើរ ដើម្បីបម្រើផលប្រយោជន៍ប្រជាពលរដ្ឋ និងការអភិវឌ្ឍប្រកបដោយចីរភាព។
