ខេត្តកំពង់ធំ ៖ នាព្រឹកថ្ងៃទី ៨ ខែកក្កដា ឆ្នាំ២០២៦ វេលាម៉ោង ៩:០០នាទីព្រឹក លោកមេឃភូមិ លុកលៀម និង លោក ស្លេះ ហិមលី បាននាំយកអំណោយសប្បុរសធម៌ទៅប្រគល់ជូនលោកយាយ ជ័យគួន ព្រមទាំងចៅៗបីនាក់ ដែលមានជីវភាពខ្វះខាត និងកំពុងជួបការលំបាក ក្នុងភូមិសាយ៉ូវ ឃុំគោល ស្រុកប្រាសាទសំបូរ ខេត្តកំពង់ធំ។
អំណោយដែលបានយកទៅប្រគល់ជូន គឺទទួលបានពីការចូលរួមឧបត្ថម្ភរបស់សប្បុរសជននានា ក្នុងគោលបំណងចែករំលែកក្តីស្រឡាញ់ និងជួយសម្រាលការលំបាកក្នុងជីវភាពរស់នៅរបស់លោកយាយ។
អំណោយរួមមាន៖ អង្ករ ៥០គីឡូក្រាម, ទឹកត្រី ១យួរ, ទឹកស៊ីអ៊ីវ ១យួរ, ស្ករស ១គីឡូក្រាម, ប៊ីចេង ១គីឡូក្រាម, អំបិល ១គីឡូក្រាម, ត្រីខ ១យួរ, សំពត់ ១ និងថវិកាចំនួន ៧០,០០០រៀល។
ក្នុងឱកាសនោះ លោក ស្លេះ ហិមលី បានពាំនាំនូវការសាកសួរសុខទុក្ខ និងលើកទឹកចិត្តដល់លោកយាយឱ្យថែរក្សាសុខភាព និងបន្តមានកម្លាំងចិត្តក្នុងការរស់នៅ។
លោកក៏បានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ ដែលបានចូលរួមបរិច្ចាគថវិកា និងសម្ភារជាអំណោយ ដើម្បីជួយដល់ប្រជាពលរដ្ឋដែលកំពុងជួបការលំបាក។
សកម្មភាពសប្បុរសធម៌នេះបានបង្ហាញពីស្មារតីចែករំលែក ក្តីមេត្តា និងសាមគ្គីភាពក្នុងសង្គម ដែលជួយលើកកម្ពស់វប្បធម៌នៃការជួយគ្នាទៅវិញទៅមក និងផ្តល់កម្លាំងចិត្តដល់ប្រជាពលរដ្ឋដែលកំពុងខ្វះខាត ៕
