![ព័ត៌មានទាន់ហេតុការណ៍] វិធានការក្តៅ! ឯកឧត្តម តូច ប៉ូលីវ៉ា អភិបាលរងខេត្ត រួមជាមួយលោក ហន ពិសិដ្ឋ អភិបាលស្រុកគងពិសី ដឹកនាំកម្លាំងចម្រុះចុះបិទសិប្បកម្មផលិតថ្នាំជក់ «កោះប៉ែន» ជាបណ្តោះអាសន្ន ក្រោយបង្កផលប៉ះពាល់ក្លិនដល់ពលរដ្ឋ](http://kehaktompor-ratha-rasmeistoengtrang.com.kh/wp-content/uploads/2026/07/photo_2026-07-08_17-51-41f.jpg)
ខេត្តកំពង់ស្ពឺ៖ ស្របតាមការយកចិត្តទុកដាក់ខ្ពស់លើសុខុមាលភាព និងការរស់នៅរបស់ប្រជាពលរដ្ឋ ក្រោមការណែនាំដ៏ខ្ពង់ខ្ពស់ពីគណៈអភិបាលខេត្តកំពង់ស្ពឺ នៅថ្ងៃទី០៨ ខែកក្កដា ឆ្នាំ២០២៦ នេះ ឯកឧត្តម តូច ប៉ូលីវ៉ា អភិបាលរងនៃគណៈអភិបាលខេត្តកំពង់ស្ពឺ រួមជាមួយលោក ហន ពិសិដ្ឋ អភិបាលនៃគណៈអភិបាលស្រុកគងពិសី បានដឹកនាំក្រុមការងារចម្រុះ និងមន្ត្រីជំនាញពាក់ព័ន្ធ ចុះពិនិត្យ និងសម្រេចបិទជាបណ្តោះអាសន្ននូវសិប្បកម្មផលិតថ្នាំជក់យីហោ «កោះប៉ែន» ដែលមានទីតាំងស្ថិតនៅក្នុងភូមិដំណាក់ពង្រ ឃុំព្រៃវិហារ ស្រុកគងពិសី ខេត្តកំពង់ស្ពឺ។
ការចុះអនុវត្តវិធានការរដ្ឋបាលនេះ បានធ្វើឡើងបន្ទាប់ពីមានការរាយការណ៍ និងត្អូញត្អែរយ៉ាងខ្លាំងពីបងប្អូនប្រជាពលរដ្ឋនៅក្នុងមូលដ្ឋានជុំវិញករណីសិប្បកម្មខាងលើនេះ មិនបានអនុវត្តតាមបទដ្ឋានបច្ចេកទេស និងការណែនាំផ្នែកបរិស្ថានត្រឹមត្រូវឡើយ ដោយបានបញ្ចេញផ្សែង និងជះក្លិនឈួលខ្លាំង ធ្វើឱ្យប៉ះពាល់យ៉ាងធ្ងន់ធ្ងរដល់សុខភាពផ្លូវដង្ហើម និងការរស់នៅប្រចាំថ្ងៃរបស់ប្រជាពលរដ្ឋ។
ក្នុងឱកាសចុះអនុវត្តច្បាប់ផ្ទាល់នោះ ថ្នាក់ដឹកនាំខេត្ត និងស្រុក បានមានប្រសាសន៍សង្កត់ធ្ងន់ថា រាល់ការធ្វើអាជីវកម្ម ឬសិប្បកម្មទាំងអស់នៅក្នុងភូមិសាស្ត្រខេត្តកំពង់ស្ពឺ ក៏ដូចជាស្រុកគងពិសី ត្រូវតែគោរពតាមច្បាប់ និងបទដ្ឋានបច្ចេកទេសការពារបរិស្ថានឱ្យបានដាច់ខាត ជាពិសេសមិនត្រូវឱ្យមានផលប៉ះពាល់ ឬបង្កើតការរំខានដល់សេចក្តីសុខរបស់ប្រជាពលរដ្ឋឡើយ។
ចំពោះសិប្បកម្ម «កោះប៉ែន» នេះ ត្រូវបានផ្អាក និងបិទជាបណ្តោះអាសន្នភ្លាមៗ ដើម្បីបង្គាប់ឱ្យម្ចាស់សិប្បកម្មធ្វើការកែសម្រួលប្រព័ន្ធបច្ចេកទេស និងដោះស្រាយបញ្ហាក្លិនឱ្យបានដាច់ស្រឡាញ់ជាមុនសិន។
ចំណាត់ការដ៏ទាន់ពេលវេលា និងម៉ឺងម៉ាត់របស់រដ្ឋបាលខេត្តកំពង់ស្ពឺ និងអាជ្ញាធរស្រុកគងពិសីនាពេលនេះ ទទួលបានការគាំទ្រ និងសាទរយ៉ាងខ្លាំងពីសំណាក់បងប្អូនប្រជាពលរដ្ឋនៅក្នុងភូមិទួលពង្រ ក៏ដូចជាទូទាំងឃុំព្រៃវិហារ ដែលបង្ហាញពីការគិតគូរ និងតម្កល់ផលប្រយោជន៍ និងសុខភាពសាធារណៈជាចម្បងរបស់អាជ្ញាធរ៕
