ខេត្តកំពង់ស្ពឺ៖ នៅថ្ងៃទី ១០ ខែកក្កដា ឆ្នាំ ២០២៦ នេះ ឯកឧត្តម ជាម ច័ន្ទសោភ័ណ្ឌ អភិបាលនៃគណៈអភិបាលខេត្តកំពង់ស្ពឺ បានដឹកនាំផ្ទាល់នូវក្រុមការងារអាជ្ញាធរខេត្ត និងអាជ្ញាធរស្រុក ពាក់ព័ន្ធ ចុះពិនិត្យស្ថានភាពជាក់ស្តែងនៃខ្សែផ្លូវលេខ ១៤៥ (ចាប់ពីចំណុចស្លាបលែង ទៅដល់ផ្សារប៉ាងកាសី) ដែលស្ថិតនៅចន្លោះស្រុកគងពិសី និងស្រុកបរសេដ្ឋ ខេត្តកំពង់ស្ពឺ។
ការចុះពិនិត្យដោយផ្ទាល់នេះ ធ្វើឡើងបន្ទាប់ពីទទួលបានព័ត៌មាន និងការរអ៊ូរទាំពីបងប្អូនប្រជាពលរដ្ឋ ចំពោះស្ថានភាពផ្លូវមួយខ្សែនេះ ដែលកន្លងមកមានការខូចខាតខ្លាំង បង្កើតជាជម្រុក បង្កការហុយ និងរំខានយ៉ាងខ្លាំងដល់ការធ្វើដំណើរ ក៏ដូចជាការរស់នៅប្រចាំថ្ងៃរបស់ប្រជាពលរដ្ឋក្នុងមូលដ្ឋាន។
នៅក្នុងឱកាសចុះពិនិត្យនោះដែរ ឯកឧត្តមអភិបាលខេត្ត បានបង្ហាញជំហរម៉ឺងម៉ាត់ និងបានបញ្ជាក់ថា រដ្ឋបាលខេត្តនឹងមានវិធានការច្បាប់តឹងរ៉ឹងបំផុត ទៅលើក្រុមហ៊ុនមួយចំនួនដែលបាននិងកំពុងប្រើប្រាស់ផ្លូវមួយខ្សែនេះ ដឹកជញ្ជូនទំនិញ ឬសម្ភារៈលើសទម្ងន់កម្រិតកំណត់ ដែលជាមូលហេតុចម្បងបង្កឱ្យផ្លូវឆាប់ខូចខាត បំផ្លិចបំផ្លាញទ្រព្យសម្បត្តិសាធារណៈរបស់រដ្ឋ និងបង្កការលំបាកដល់រាស្ត្រ។
ទន្ទឹមនឹងនេះ ឯកឧត្តមបានណែនាំដល់អាជ្ញាធរពាក់ព័ន្ធ និងក្រុមការងារបច្ចេកទេស ត្រូវពន្លឿនការស្វែងរកដំណោះស្រាយ ព្រមទាំងសហការជាមួយក្រុមហ៊ុនដឹកជញ្ជូនទាំងនោះ ឱ្យចូលរួមទទួលខុសត្រូវ និងបញ្ឈប់ជាបន្ទាន់នូវរាល់ការដឹកជញ្ជូនលើសទម្ងន់ ដើម្បីថែរក្សាគុណភាពផ្លូវឱ្យបានយូរអង្វែង និងសម្រួលដល់ការធ្វើដំណើររបស់ប្រជាពលរដ្ឋឱ្យបានងាយស្រួលឡើងវិញ។
បងប្អូនប្រជាពលរដ្ឋនៅក្នុងស្រុកគងពិសី និងស្រុកបរសេដ្ឋ បានសម្តែងនូវក្តីត្រេកអរ និងអំណរគុណយ៉ាងជ្រាលជ្រៅចំពោះការយកចិត្តទុកដាក់ខ្ពស់ និងការចុះអន្តរាគមន៍ទាន់ពេលវេលារបស់ឯកឧត្តមអភិបាលខេត្ត ព្រមទាំងក្រុមការងារទាំងអស់៕
