ខេត្តកំពង់ស្ពឺ ៖ នាព្រឹកថ្ងៃទី១៤ ខែកក្កដា ឆ្នាំ២០២៦ លោកបណ្ឌិត ហោ គន្ធា ប្រធានអង្គការចីរភាពបរិស្ថានកម្ពុជា បានដឹកនាំសហការីចូលជួបសម្តែងការគួរសមជាមួយ ព្រះអង្គប្បញ្ញត្តិ អត្តតេជោ ឡោ អណុច ព្រះចៅអធិការវត្តអង្គក្រឡាញ់ ដែលស្ថិតនៅភូមិសាលាគ្រោះ ឃុំព្រះនិព្វាន ស្រុកគងពិសី ខេត្តកំពង់ស្ពឺ។
ជំនួបនេះត្រូវបានរៀបចំឡើងក្នុងគោលបំណងពិភាក្សា និងពិគ្រោះយោបល់អំពីការរៀបចំប្រារព្ធ យុទ្ធនាការ «ពន្លកបៃតង» ដែលផ្តោតលើការដាំកូនឈើចម្រុះនៅក្នុងបរិវេណវត្តអង្គក្រឡាញ់ ដើម្បីរួមចំណែកលើកកម្ពស់ការអភិរក្សបរិស្ថាន បង្កើនគម្របព្រៃបៃតង និងបណ្តុះស្មារតីស្រឡាញ់ធម្មជាតិដល់ព្រះសង្ឃ ពុទ្ធបរិស័ទ និងប្រជាពលរដ្ឋក្នុងមូលដ្ឋាន។
ក្នុងឱកាសនោះ លោកបណ្ឌិត ហោ គន្ធា បានលើកឡើងថា យុទ្ធនាការ «ពន្លកបៃតង» គឺជាសកម្មភាពដ៏មានសារៈសំខាន់ ដែលមិនត្រឹមតែជួយបង្កើនភាពបៃតង និងកាត់បន្ថយផលប៉ះពាល់ពីការប្រែប្រួលអាកាសធាតុប៉ុណ្ណោះទេ ប៉ុន្តែថែមទាំងជួយលើកកម្ពស់ការយល់ដឹងរបស់សាធារណជនអំពីតួនាទីរបស់ដើមឈើក្នុងការការពារបរិស្ថាន និងការអភិវឌ្ឍប្រកបដោយចីរភាពផងដែរ។
ជាការឆ្លើយតប ព្រះអង្គប្បញ្ញត្តិ អត្តតេជោ ឡោ អណុច បានសម្តែងនូវការគាំទ្រ និងស្វាគមន៍យ៉ាងកក់ក្តៅចំពោះគំនិតផ្តួចផ្តើមរបស់អង្គការចីរភាពបរិស្ថានកម្ពុជា ហើយបានបញ្ជាក់ថា វត្តអង្គក្រឡាញ់នឹងសហការយ៉ាងជិតស្និទ្ធ ដើម្បីឱ្យការរៀបចំយុទ្ធនាការនេះទទួលបានជោគជ័យ និងក្លាយជាគំរូល្អក្នុងការថែរក្សាបរិស្ថាន និងពង្រីកទីធ្លាបៃតងក្នុងសហគមន៍។
ជំនួបពិភាក្សានេះបានប្រព្រឹត្តទៅក្នុងបរិយាកាសស្និទ្ធស្នាល ប្រកបដោយការយោគយល់ និងការប្តេជ្ញាចិត្តរួមគ្នាក្នុងការជំរុញសកម្មភាពការពារបរិស្ថាន និងបង្កើតបរិយាកាសបៃតងសម្រាប់សង្គមកម្ពុជាប្រកបដោយចីរភាព ៕
