រាជធានីភ្នំពេញ ៖ នាថ្ងៃអង្គារ ទី១៤ ខែកក្កដា ឆ្នាំ២០២៦ ឯកឧត្តម សុខ ចាន់ភក្តី រដ្ឋលេខាធិការក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកចិត្របុរី និងឯកឧត្តម រឿង ថារ័ត្ន ទីប្រឹក្សាក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះជួយមូលដ្ឋានឃុំគោលាប់ បានអញ្ជើញទៅសាកសួរសុខទុក្ខ ឯកឧត្តម ប៊ូ វណ្ណារីទ្ធិ អនុរដ្ឋលេខាធិការក្រសួងព័ត៌មាន ដែលកំពុងសម្រាកព្យាបាលជំងឺនៅមន្ទីរពេទ្យព្រះកុសុមៈ (មន្ទីរពេទ្យលោកសង្ឃ) រាជធានីភ្នំពេញ។
ក្នុងឱកាសនោះ ឯកឧត្តមទាំងពីរបានសម្តែងនូវការយកចិត្តទុកដាក់ សួរសុខទុក្ខ និងលើកទឹកចិត្តដល់ឯកឧត្តម ប៊ូ វណ្ណារីទ្ធិ ព្រមទាំងជូនពរឱ្យឯកឧត្តមឆាប់ជាសះស្បើយ មានសុខភាពរឹងមាំ និងអាចវិលត្រឡប់ទៅបំពេញការងារជូនជាតិ និងប្រជាពលរដ្ឋបានក្នុងពេលឆាប់ៗខាងមុខ។
តាមការបញ្ជាក់ពីក្រុមគ្រូពេទ្យ ស្ថានភាពសុខភាពទូទៅរបស់ឯកឧត្តម ប៊ូ វណ្ណារីទ្ធិ មានភាពល្អប្រសើរឡើងវិញហើយ។ ទោះជាយ៉ាងណា សម្ពាធឈាមនៅតែមានកម្រិតខ្ពស់ (១៥០ មីលីម៉ែត្របារត) ដូច្នេះក្រុមគ្រូពេទ្យបានណែនាំឱ្យបន្តសម្រាកព្យាបាល និងតាមដានសុខភាពបន្ថែមទៀត ដើម្បីធានាសុវត្ថិភាព និងការជាសះស្បើយពេញលេញ។
