កំពង់ឆ្នាំង៖ នៅថ្ងៃទី១៥ ខែកក្កដា ឆ្នាំ២០២៦ នេះ លោកបណ្ឌិត ឃីម រដ្ឋា ប្រធានអង្គភាពរដ្ឋារស្មីស្ទឹងត្រង់និងលោក អ៊ិន យឿន ទីប្រឹក្សា របស់លោកបណ្ឌិត ហោ គន្ធា ប្រធានអង្គការចីរភាពបរិស្ថានកម្ពុជា ចូលរួមសហការជាមួយលោក ហូ ពឿន មេភូមិទួលសេរី បានចុះជួបសំណេះសំណាល សួរសុខទុក្ខ និងនាំយកអំណោយមនុស្សធម៌ចែកជូនដល់គ្រួសារប្រជាពលរដ្ឋក្រីក្រ និងមានជីវភាពខ្វះខាតខ្លាំងចំនួន ៥គ្រួសារ ស្ថិតនៅក្នុងភូមិទួលសេរី ឃុំពានី ស្រុកកំពង់ត្រឡាច ខេត្តកំពង់ឆ្នាំង។
នៅក្នុងឱកាសចុះសួរសុខទុក្ខនោះ ថ្នាក់ដឹកនាំ និងក្រុមការងារ បានសម្តែងនូវការគិតគូរ និងក្តីអាណិតអាសូរជាពន់ពេកចំពោះជីវភាពរស់នៅរបស់បងប្អូនប្រជាពលរដ្ឋ ជាពិសេសលោកយាយ លោកតា ចាស់ជរា និងស្ត្រីមេម៉ាយ ដែលកំពុងជួបការលំបាក។
គ្រួសារក្រីក្រទាំង ៥ ដែលបានទទួលអំណោយរួមមាន៖
១. គ្រួសារទី១៖ លោកតា សុខ សេង អាយុ ៨១ឆ្នាំ និងភរិយាឈ្មោះ ពៅ វន អាយុ ៧០ឆ្នាំ (ក្នុងបន្ទុកមានចិញ្ចឹមកូនចៅតូចៗចំនួន ៣នាក់)។
២. គ្រួសារទី២៖ លោកយាយ សៀង មិន អាយុ ៦៩ឆ្នាំ (រស់នៅម្នាក់ឯង)។
៣. គ្រួសារទី៣៖ លោកយាយ ទុំ សារីម អាយុ ៧៦ឆ្នាំ (ជាស្ត្រីមេម៉ាយ រស់នៅម្នាក់ឯង)។
៤. គ្រួសារទី៤៖ អ្នកស្រី សែម សាវ៉ាត អាយុ ៤០ឆ្នាំ (ជាស្ត្រីមេម៉ាយ)។
៥. គ្រួសារទី៥៖ អ្នកស្រី សែម សារឿន អាយុ ៤៧ឆ្នាំ (ជាស្ត្រីមេម៉ាយ)។
ដើម្បីជួយសម្រាលទុក្ខលំបាកមួយភ្នែក ក្នុងមួយគ្រួសារៗទទួលបានអំណោយឧបត្ថម្ភរួមមាន៖
អង្ករ ៣០ គីឡូក្រាម, មី ១ កេះ, ប៊ីចេង១កញ្ចប់, ទឹកត្រី ១ យួរ, ទឹកស៊ីអ៊ីវ ១ យួរ, ទឹកសុទ្ធ ៥ យួរ សារុង ១, ចាន ១០ គ្រាប់, ថវិកាចំនួន ៥០,០០០ រៀល (ប្រាំម៉ឺនរៀល) ។
សកម្មភាពមនុស្សធម៌ដ៏ប្រពៃនេះ បានធ្វើឡើងដោយក្តីស្រឡាញ់ និងការយកចិត្តទុកដាក់ខ្ពស់ពីសំណាក់ថ្នាក់ដឹកនាំគ្រប់លំដាប់ថ្នាក់ ក្នុងគោលបំណងចូលរួមចំណែកជាមួយរាជរដ្ឋាភិបាល ក្នុងការជួយសង្គ្រោះ និងសម្រាលបន្ទុកជីវភាពរបស់ប្រជាពលរដ្ឋខ្វះខាត មិនទុកឲ្យពលរដ្ឋណាម្នាក់ស្លាប់ដោយអត់អាហារឡើយ។
ជាមួយគ្នានេះដែរ បងប្អូនប្រជាពលរដ្ឋទាំង ៥គ្រួសារ ក៏ដូចជាអាជ្ញាធរមូលដ្ឋាន បានសម្តែងនូវការដឹងគុណយ៉ាងជ្រាលជ្រៅជាទីបំផុត ជូនចំពោះ លោកបណ្ឌិត ឃីម រដ្ឋា, លោក អិន យឿន, លោកបណ្ឌិត ហោ គន្ធា និងក្រុមការងារទាំងអស់ ដែលបានចំណាយពេលវេលា និងថវិកាផ្ទាល់ខ្លួន នាំយកអំណោយមកជួយសង្គ្រោះទាន់ពេលវេលានេះ និងបានជូនពរឲ្យក្រុមការងារទទួលបានជោគជ័យគ្រប់ភារកិច្ច៕
