ខេត្តកំពង់ស្ពឺ ៖ នៅព្រឹកថ្ងៃអាទិត្យ ១១រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៩ ខែសីហា ឆ្នាំ២០២៦ ឯកឧត្តមសាស្ត្រាចារ្យ ស៊ុំ សត្ថា ប្រធានក្រុមការងារថ្នាក់កណ្ដាលចុះជួយមូលដ្ឋានឃុំព្រៃវិហារ និងលោកជំទាវ ម៉ម សោភ័ណ្ឌ រួមជាមួយលោកស្រី សៀក សុខកល ប្រធានក្រុមការងារស្រុកចុះជួយឃុំព្រៃវិហារ លោក មោគ ង៉ែត ព្រមទាំងលោក លោកស្រី ជាសមាជិក សមាជិកា ក្រុមការងារថ្នាក់កណ្ដាល និងថ្នាក់ស្រុក បានអញ្ជើញនាំយកទេយ្យវត្ថុ ទៀនព្រះវស្សា និងបច្ច័យ ទៅប្រគេនដល់ព្រះសង្ឃដែលគង់ចាំព្រះវស្សាអស់ត្រីមាសក្នុងវត្តចំនួន ៤ ក្នុងឃុំព្រៃវិហារ។
វត្តទាំង ៤ ដែលទទួលបានទេយ្យវត្ថុ និងបច្ច័យរួមមាន៖
១. វត្តអង្គមន្ត្រីម៉ី
២. វត្តអង្គក្ដី
៣. វត្តអង្គដូនទេព
៤. វត្តព្រះពុទ្ធដំណាក់លក្ខណារ៉ាម (ហៅវត្តដំណាក់ពង្រ)
សម្ភារ និងថវិកាដែលបានប្រគេនដល់វត្តនីមួយៗរួមមាន៖
ទៀនព្រះវស្សា ១គូ, ស្លាដក់ ១, អង្ករ ៧៥ គីឡូក្រាម, មី ២ កេស, ទឹកត្រី ២ យួរ, ទឹកស៊ីអ៊ីវ ២ យួរ, ត្រីខ ២ យួរ, ទឹកផ្លែឈើ ២ កេស, ទឹកសុទ្ធ ២ កេស, ស្ករស ២ គីឡូក្រាម, ទឹកដោះគោខាប់ ១០ កំប៉ុង, បច្ច័យចំនួន ៥០០,០០០ រៀល ។
នៅក្នុងឱកាសនោះផងដែរ ឯកឧត្តម ស៊ុំសត្ថាក៏បានអញ្ជើញចូលរួមដាំកូនឈើនៅវត្តអង្គក្តី សហការជាមួយអង្គការចីរភាពបរិស្ថានកម្ពុជា ព្រមទាំងបានអំពាវនាវ និងស្នើឱ្យបងប្អូនប្រជាពលរដ្ឋរួមគ្នាចូលរួមថែរក្សាកូនឈើទាំងនោះ ដើម្បីរួមចំណែកបង្កើនភាពបៃតង និងគាំពារបរិស្ថានក្នុងប្រទេសកម្ពុជា។
បន្ទាប់ពីបានបញ្ចប់ពិធីប្រគេនទេយ្យវត្ថុ ទៀនព្រះវស្សា និងបច្ច័យរួចមក ឯកឧត្តមសាស្ត្រាចារ្យ និងក្រុមការងារ ក៏បានអញ្ជើញទៅចូលរួមក្នុងពិធីបុណ្យផ្កាសាលាបឋមសិក្សាអង្គខ្ជាយពិសី ដោយបានចូលរួមបច្ច័យកសាងចំនួន ៤០០,០០០រៀល ផងដែរ។
គួរបញ្ជាក់ផងដែរថា ចំណាយសរុបក្នុងសកម្មភាពមនុស្សធម៌ និងបុណ្យទានខាងលើនេះ មានចំនួន ៥,៦៩២,០០០រៀល ដែលជាអំណោយដ៏ថ្លៃថ្លារបស់ ឯកឧត្តមសាស្ត្រាចារ្យ ស៊ុំ សត្ថា និងលោកជំទាវ ព្រមទាំងក្រុមការងារ៕
