ខេត្តកំពង់ចាម៖ នាព្រឹកថ្ងៃអាទិត្យ ទី៩ ខែសីហា ឆ្នាំ២០២៦ ត្រូវនឹងថ្ងៃអាទិត្យ ១១ រោច ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ព្រះគ្រូចៅអធិការវត្តឥន្ធមុនីវន្ត ហៅវត្តស្រែអំពៅ ស្ថិតនៅភូមិស្រែអំពៅ ឃុំទួលសំបួរ ស្រុកស្ទឹងត្រង់ ខេត្តកំពង់ចាម និងលោកបណ្ឌិតខេមរដ្ឋានិងក្រុមការងារ បានដឹកនាំរៀបចំកម្មវិធីធម្មទាន និងចែកអំណោយជូនប្រជាពលរដ្ឋដែលមានជីវភាពខ្វះខាតចំនួន ៩ គ្រួសារ ព្រមទាំងចែកសម្ភារៈ និងអាហារមួយចំនួនជូនដល់លោកគ្រូ អ្នកគ្រូ សិស្សានុសិស្ស លោកយាយ លោកតា និងពុទ្ធបរិស័ទដែលបានចូលរួមក្នុងកម្មវិធី។
កម្មវិធីនេះប្រព្រឹត្តទៅដោយមានការចូលរួមពីព្រះចៅអធិការវត្ត ព្រះនាម ព្រះឥន្ទកោសល្យ ឆន អាវ័ន កិត្តិយសមហានិកាយ នៃព្រះរាជាណាចក្រកម្ពុជា និងជាព្រះចៅអធិការវត្តស្រែអំពៅ ព្រមទាំងមានការចូលរួមពីសប្បុរសជន ម្ចាស់ចម្ការទុរេននៅតំបន់បែកអន្លូង និងព្រែកសង្កែ ម្ចាស់ចម្ការទុរេននៅពាមកោះស្នា ពុទ្ធបរិស័ទ លោកគ្រូ អ្នកគ្រូ សិស្សានុសិស្ស អាជ្ញាធរភូមិ-ឃុំ និងកម្លាំងប្រជាការពារ ព្រមទាំងញាតិញោមជាច្រើនរូប។
ក្នុងឱកាសនោះ ព្រះចៅអធិការវត្ត និងសប្បុរសជន បាននាំយកអំណោយធម្មទានចែកជូនប្រជាពលរដ្ឋចំនួន ៩ គ្រួសារ ដែលមានជីវភាពខ្វះខាត ដើម្បីជួយសម្រួលដល់ការរស់នៅប្រចាំថ្ងៃ និងជាការចូលរួមចែករំលែកក្តីស្រឡាញ់ សាមគ្គីភាព និងទឹកចិត្តមនុស្សធម៌នៅក្នុងសហគមន៍។
អំណោយដែលបានប្រគល់ជូនរួមមាន អង្ករ ទឹកស៊ីអ៊ីវ ខ្ទឹម គ្រឿងឧបភោគបរិភោគ និងសម្ភារៈប្រើប្រាស់ផ្សេងៗ ព្រមទាំងថវិកាមួយចំនួន។ អំណោយទាំងនេះត្រូវបានរៀបចំឡើងតាមលទ្ធភាពរបស់ព្រះចៅអធិការវត្ត និងសប្បុរសជន ដើម្បីផ្តល់ជាជំនួយដល់គ្រួសារដែលកំពុងជួបការខ្វះខាត។
ជាមួយគ្នានេះ ព្រះអង្គក៏បានរៀបចំចែក សៀវភៅ សម្ភារៈសិក្សា នំប៉័ង និងអាហារមួយចំនួន ជូនដល់លោកគ្រូ អ្នកគ្រូ សិស្សានុសិស្ស លោកយាយ លោកតា និងពុទ្ធបរិស័ទដែលបានចូលរួមក្នុងកម្មវិធីផងដែរ។
សកម្មភាពនេះមានគោលបំណងលើកទឹកចិត្តដល់វិស័យអប់រំ និងជំរុញឱ្យកុមារ និងយុវជនខិតខំសិក្សារៀនសូត្រ ព្រមទាំងចូលរួមលើកកម្ពស់វប្បធម៌ចែករំលែក និងការជួយគ្នាទៅវិញទៅមកក្នុងសង្គម។
អំណោយ និងសម្ភារៈធម្មទានដែលបានរៀបចំក្នុងកម្មវិធីនេះ ទទួលបានការចូលរួមឧបត្ថម្ភពីសប្បុរសជន និងម្ចាស់ចម្ការទុរេនមួយចំនួននៅតំបន់បែកអន្លូង និងពាមកោះស្នា ក្នុងនោះមាន៖
១. លោក សុខ ចាក់ ម្ចាស់ចម្ការទុរេន ជាដានី បែកអន្លូង។
២. លោក ប៉ោង សាម ម្ចាស់ចម្ការទុរេននៅបែកអន្លូង។
៣. លោក សុខ លាង ម្ចាស់ចម្ការទុរេននៅបែកអន្លូង។
៤. លោក គ្រូ លីហាន អ៊ីបង ម្ចាស់ចម្ការទុរេន។
៥. ម្ចាស់ចម្ការទុរេន តុលីតា ម៉ាក់ភ្លេង នៅសង្កែ ឃុំពាមកោះស្នា។
ព្រមទាំងមានការចូលរួមពីក្រុមញាតិញោម និងសប្បុរសជនជាច្រើនរូបទៀត។
សកម្មភាពធម្មទាន និងការចែករំលែកអំណោយខាងលើ គឺជាកាយវិការដ៏ប្រពៃមួយដែលបង្ហាញពីការយកចិត្តទុកដាក់ចំពោះប្រជាពលរដ្ឋដែលមានជីវភាពខ្វះខាត និងការចូលរួមរបស់ព្រះសង្ឃ សប្បុរសជន ពុទ្ធបរិស័ទ និងសហគមន៍ ក្នុងការលើកកម្ពស់សុខុមាលភាពសង្គម។
ជាមួយគ្នានេះ ការចូលរួមរបស់សប្បុរសជន និងពុទ្ធបរិស័ទ តាមរយៈការធ្វើទាន និងជួយដល់អ្នកខ្វះខាត ក៏ជាការរួមចំណែកលើកស្ទួយប្រពៃណីព្រះពុទ្ធសាសនា សីលធម៌ សាមគ្គីភាព និងវប្បធម៌ចែករំលែកក្នុងសហគមន៍ឱ្យកាន់តែរឹងមាំ។
នៅចុងបញ្ចប់ ព្រះចៅអធិការវត្ត និងអ្នកចូលរួមទាំងអស់ បានសម្តែងនូវសេចក្តីរីករាយចំពោះការចែករំលែក និងបានបន្តលើកទឹកចិត្តឱ្យមានសកម្មភាពមនុស្សធម៌បែបនេះជាបន្តបន្ទាប់ ដើម្បីជួយសម្រួលដល់ជីវភាពប្រជាពលរដ្ឋ និងចូលរួមកសាងសហគមន៍ឱ្យមានភាពកក់ក្តៅ សាមគ្គី និងជួយគ្នាទៅវិញទៅមក ៕
