បាត់ដំបង៖ នាថ្ងៃទី១២ ខែសីហា ឆ្នាំ២០២៦ រដ្ឋបាលឃុំតាគ្រាម បានរៀបចំ និងធ្វើយុទ្ធនាការអនាម័យបរិស្ថានយ៉ាងផុសផុល ដោយចុះរើសសំរាមតាមដងផ្លូវក្នុងភូមិសាស្ត្រ និងតាមអង្គភាពនានាក្នុងឃុំតាគ្រាម ក្រោមការដឹកនាំផ្ទាល់ពី លោក ស្រេង សុខា អភិបាលនៃគណៈអភិបាលស្រុកបាណន់។
យុទ្ធនាការដ៏មានសារៈសំខាន់នេះ ក៏មានការចូលរួមសហការពីមន្ទីរទេសចរណ៍ មន្ទីរបរិស្ថាន ការិយាល័យពាក់ព័ន្ធ និង លោក សឿន ឌីប្រធានអង្គការចីរភាពបរិស្ថានកម្ពុជា សាខាខេត្តបាត់ដំបង ដែលបានដឹកនាំសមាជិកចំនួន ១២នាក់ ចុះរួមដៃគ្នាយ៉ាងសកម្មផងដែរ។
សមាសភាពចូលរួមសរុបក្នុងយុទ្ធនាការនេះមានចំនួន ២,៣១៦នាក់ (ស្រី ១,៤២៨នាក់)ដែលរួមមាន៖
តំណាងអង្គការចីរបរិស្ថានកម្ពុជា
លោកមេឃុំ ក្រុមប្រឹក្សាឃុំ ស្មៀនឃុំ និងប៉ុស្តិ៍នគរបាលរដ្ឋបាល
តំណាងអង្គភាពភូមិទាំង១១
បុគ្គលិកពេទ្យ លោកគ្រូ អ្នកគ្រូ និងសិស្សានុសិស្ស
កម្លាំងប្រជាការពារ និងប្រជាពលរដ្ឋយ៉ាងច្រើនកុះករ។
យុទ្ធនាការនេះ មិនត្រឹមតែជួយសម្អាតសោភ័ណភាព និងបរិស្ថានក្នុងមូលដ្ឋានឃុំតាគ្រាមឱ្យកាន់តែមានភាពស្អាត បៃតង និងគួរឱ្យចង់រស់នៅប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ក្នុងការបណ្តុះស្មារតីស្រឡាញ់ និង ថែរក្សាបរិស្ថានដល់យុវជន សិស្សានុសិស្ស និងប្រជាពលរដ្ឋគ្រប់រូបផងដែរ។
