ស្ទឹងត្រែង ៖ ឯកឧត្តម សរ សុពុត្រា អភិបាល នៃគណៈអភិបាលខេត្តស្ទឹងត្រែង បានណែនាំឱ្យបន្តអភិរក្សសត្វផ្សោតទន្លេមេគង្គ ត្រីមេពូជ និងសត្វងាយរងគ្រោះឱ្យមានប្រសិទ្ធភាពខ្ពស់ ព្រមទាំងបង្កើនការលែងកូនត្រី និងត្រីមេពូជបន្ថែមទៀត ទៅក្នុងទីជម្រកធម្មជាតិ។
ការណែនាំរបស់ ឯកឧត្តម សរ សុពុត្រា អភិបាលខេត្តស្ទឹងត្រែង នាឱកាសអញ្ជើញជាអធិបតីរួមជាមួយ ឯកឧត្តម ឈាង ឡាក់ ប្រធានក្រុមប្រឹក្សាខេត្ត ក្នុងទិវាមច្ឆាជាតិ ១កក្កដា នៅអាងទឹក វារីអគ្គិសនីសេសានក្រោម២ នាថ្ងៃទី២២ ខែសីហា ឆ្នាំ២០២៦ ដើម្បីលែងកូនត្រី និងត្រីមេពូជ ក្នុងគោលបំណងបង្កើនផលជលផលធម្មជាតិ។
ព្រឹត្តិការណ៍នេះ មានការចូលរួមពីសំណាក់ សមាជិកក្រុមប្រឹក្សាខេត្ត អភិបាលរងខេត្ត ប្រធាន-អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំង៣ប្រភេទ សហគមន៍នេសាទ ប្រជាពលរដ្ឋ យុវជនកាកបាទក្រហមកម្ពុជា សមាជិក ស.ស.យ.ក តំណាងដៃគូអភិវឌ្ឍន៍ និងសិស្សានុសិស្ស សរុបប្រមាណ ៤៥០នាក់។
លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានគូសបញ្ជាក់ថា ក្នុងឱកាសនេះ អាជ្ញាធរបានលែងកូនត្រីពូជចំនួន ១០០,០០០ក្បាល ព្រមទាំងត្រីចម្រុះមេពូជទម្ងន់ ១៥០គីឡូក្រាម ចូលទៅក្នុងអាងទឹកវារីអគ្គិសនីសេសានក្រោម២ ក្នុងនោះ រួមមានត្រីឆ្ពិនចំនួន៦០,០០០កូនកូនត្រីប្រាចំនួន២០,០០០កូន(ពីរម៉ឺន) និងកូនត្រីពោចំនួន២០,០០០កូន(ពីម៉ឺន) ដើម្បីស្ដារ និងបង្កើនបរិមាណពូជត្រីឱ្យកាន់តែសម្បូរបែប។
ថ្លែងនៅក្នុងពិធីនោះដែរ ឯកឧត្តម សរ សុពុត្រា អភិបាលខេត្តស្ទឹងត្រែង បានដាក់ចេញនូវបទបញ្ជា និងទិសដៅការងារសំខាន់ៗជាច្រើនដល់មន្ទីរ និងស្ថាប័នពាក់ព័ន្ធ។ ឯកឧត្តម អភិបាលខេត្ត បានណែនាំឱ្យបន្តអភិរក្សសត្វផ្សោតទន្លេមេគង្គ ត្រីមេពូជ និងសត្វងាយរងគ្រោះឱ្យមានប្រសិទ្ធភាពខ្ពស់ ព្រមទាំងបង្កើនការលែងកូនត្រី និងត្រីមេពូជបន្ថែមទៀតទៅក្នុងទីជម្រកធម្មជាតិ។
ជាមួយគ្នានេះ ឯកឧត្តម អភិបាលខេត្ត បានចាត់ឱ្យមន្ទីរកសិកម្ម សហការជាមួយមន្ទីររៀបចំដែនដី នគរូបនីយកម្ម សំណង់ និងសូរិយោដី ជំរុញការចុះបញ្ជីដីរដ្ឋ កន្លែងសហគមន៍នេសាទ តំបន់ការពារជលផល និងដីព្រៃលិចទឹក ព្រមទាំងទប់ស្កាត់ការទន្ទ្រានកាន់កាប់ដីរដ្ឋដោយចាត់វិធានការច្បាប់យ៉ាងម៉ឺងម៉ាត់បំផុត។
បន្ថែមពីនេះ ត្រូវពង្រឹងការបង្ក្រាបបទល្មើសនេសាទ ជាពិសេសក្នុងរដូវបិទនេសាទ និងចាត់វិធានការលើការផលិត លក់ ឬចែកចាយឧបករណ៍បំផ្លិចបំផ្លាញ ព្រមទាំងពង្រឹងសមត្ថភាពសហគមន៍នេសាទ ជំរុញទេសចរណ៍ធម្មជាតិ និងការងារវារីវប្បកម្ម ដើម្បីលើកកម្ពស់ជីវភាពប្រជាពលរដ្ឋ និងកាត់បន្ថយសម្ពាធលើធនធានជលផលធម្មជាតិ៕
ប្រភព ៖ រដ្ឋបាលខេត្តស្ទឹងត្រែង
