ខេត្តព្រះវិហារ៖ ហ្វូងដំរីព្រៃប្រមាណជា៦ក្បាល បានរត់ចេញពីតំបន់ព្រៃព្រះរកា ចូលក្នុងភូមិឋានរបស់ពលរដ្ឋ ហើយបានជាន់ពលរដ្ឋរបួស២នាក់ និងបំផ្លាញទ្រព្យសម្បត្តិ ព្រមទាំងផលដំណាំ របស់ពួកគាត់នៅចំណុចភូមិពោធិ៍ខៀន ឃុំពោធិ ស្រុកត្បែងមានជ័យ ខេត្តព្រះវិហារ។
លោកឃីន រស្មី អភិបាលស្រុកត្បែងមានជ័យ បានឲ្យដឹងនៅព្រឹកថ្ងៃទី២៤ខែសីហាឆ្នាំ២០២៦នេះថា អាជ្ញាធរពាក់ព័ន្ធនៃស្រុកត្បែងមានជ័យ ដែលដឹកនាំដោយលោកហុក សុផល អភិបាលរងខេត្តព្រះវិហារ ដឹកនាំរៀបចំធ្វើពិធី បញ្ជាន់អារក្ខ និងថ្វាយភ្លេង បែបទំនៀមទំលាប់ប្រពៃណីតំណពីដូនតា ដើម្បីចង់ដឹងមូលហេតុអ្វី បានជាហ្វូងសត្វដំរីព្រៃមកចូលក្នុងភូមិដ្ឋានរបស់បងប្អូនប្រជាពលរដ្ឋបង្កការភ័យខ្លាច ស្ថិតនៅភូមិ ពោធិខឿន ឃុំពោធិ ស្រុកត្បែងមានជ័យ។
លោកបន្តថា នៅអំឡុងថ្ងៃទី១៥ខែសីហា ឆ្នាំ២០២៦ មានហ្វូងដំរីបានចូលរុករានផ្ទះសម្បែងក៏ដូចជាដំណាំរបស់កសិករក្នុងភូមិពោធិ៍ខឿន ឃុំពោធិ ស្រុកត្បែងមានជ័យ ហើយបានជាន់ពលរដ្ឋរបួសចំនួន២នាក់ បំផ្លាញផលដំណាំ និងខ្ទមរបស់ពលរដ្ឋ។
លោក ឃីន រស្មី អភិបាលស្រុកត្បែងមានជ័យ បន្ថែមថា អាជ្ញាធរពាក់ព័ន្ធប្រមាណជា៤០នាក់ មានប្រជាការពារភូមិ នគរបាល អាវុធហត្ថ យោធា បានរួមគ្នាចុះទៅភូមិសាស្ត្រខាងលើ ដើម្បីរកវិធីគៀងដំរីទាំងនោះឲ្យចូលព្រៃវិញផងដែរ។
លោកអភិបាលស្រុកបញ្ជាក់ទៀតថា មូលហេតុនៃការចាកចេញពីក្នុងព្រៃរបស់ហ្វូងដំរីទាំងនេះ គឺអាចមកពីកង្វះស្បៀងអាហារទើបពួកគេដើរស្វែងរកស្បៀងរហូតដល់ចូលក្នុងភូមិរបស់អ្នកស្រុក ។
សូមបញ្ជាក់ថា÷បើតាមការសិក្សាស្រាវជ្រាវរបស់ក្រសួងបរិស្ថានកាលពីកន្លងទៅថា សត្វដំរីព្រៃ នៅដែនជម្រកសត្វព្រៃឆែប-ព្រះរការ មានចន្លោះពី១៥ក្បាល ទៅ ២០ក្បាល ដែលត្រូវបានយកចិត្តទុកដាក់ និងអភិរក្សខ្លាំងបំផុត។ ដំរីអាស៊ី ជាប្រភេទសត្វដែលជិតផុតពូជនៅលើពិភពលោក តែនៅបន្តមានវត្តមាននៅក្នុងប្រទេសកម្ពុជា។ យោងតាមទិន្នន័យពីការស្រាវជ្រាវរបសើមន្ត្រីជំនាញ ក្រសួងបរិស្ថាននិងដៃគូពាក់ព័ន្ធ នៅក្នុងតំបន់ការពារធម្មជាតិនានា បានរកឃើញថា ដំរីអាស៊ីឬដំរីព្រៃ បានរស់នៅជាហ្វូង ហើយមានឃើញ កូនតូចៗជាច្រើនថែមទៀត ដែលមានប្រមាណចន្លោះពី៤០០ទៅ៦០០ក្បាល។ ការបង្ហាញវត្តមានហ្វូងដំរីជាបន្តបន្ទាប់ គឺជាក្តីសង្ឃឹមរបស់ក្រុមអ្នកអភិរក្សបរិស្ថានដែលបានបង្ហាញពី ប្រសិទ្ធភាពនៃការការពារ និងអភិរក្សព្រៃឈើទីជម្រកសត្វដំរី និងការថែរក្សាបាននូវប្រភេទពូជដំរី ដែលជិតផុតពូជនៅលើពិភពលោក ក៏ដូចជាជួយថែរក្សាលំនឹងបរិស្ថាន និងការពារកេរដំណែលធម្មជាតិ៕
