ខ្ញុំព្រះករុណា អាត្មាភាព រួមជាមួយព្រះមហាសុខ សាវិន តំណាងឱ្យព្រះគ្រូធម្មបាលោ ហែម អុឺន ព្រះចៅអធិការវត្តអង្គក្ដី បាននាំយកនូវគ្រឿងឧបភោគបរិភោគ និងសម្ភារៈចាំបាច់មួយចំនួន ទៅប្រគល់ជូនបងស្រីឈ្មោះ មាឃ រ៉េត ដែលស្ថិតនូវ ភូមិអង្គក្ដី ឃុំទួលអំពិល ស្រុកបសេដ្ឋ ខេត្តកំពង់ស្ពឺ។កំពុងជួបប្រទះនូវការលំបាកក្នុងជីវភាពគ្រួសារយ៉ាងខ្លាំង។
សម្ភារៈដែលបាននាំយកទៅជូន រួមមាន អង្ករ ទឹកត្រី គ្រឿងទេស ស្ករ អំបិល និងសម្ភារៈចាំបាច់ផ្សេងៗ ព្រមទាំងគ្រែមួយ និងបច្ច័យមួយចំនួន ដើម្បីជួយសម្រាលទុក្ខលំបាកក្នុងជីវភាពប្រចាំថ្ងៃ និងជួយដល់ការទិញសង្កសី សម្រាប់ប្រក់ដំបូលផ្ទះ។
បច្ចុប្បន្ន បងស្រីមានជីវភាពខ្វះខាតយ៉ាងខ្លាំង ដោយស្វាមីបានបាត់ខ្លួន មិនដឹងនៅទីកន្លែងណា ហើយបងស្រីត្រូវមើលថែកូនតូចៗចំនួនពីរនាក់ ព្រមទាំងកំពុងមានផ្ទៃពោះជិតគ្រប់ខែផងដែរ។ ស្ថានភាពនេះធ្វើឱ្យគ្រួសាររបស់បងស្រីជួបការលំបាកជាច្រើន ទាំងស្បៀងអាហារ និងទីជម្រកសម្រាប់រស់នៅ។
ដោយមើលឃើញពីទុក្ខលំបាកនេះ មូលនិធិវត្តអង្គក្ដីបានចូលរួមចែករំលែកនូវទឹកចិត្តមេត្តាករុណា តាមរយៈការផ្តល់ជូននូវស្បៀងអាហារ សម្ភារៈចាំបាច់ និងបច្ច័យមួយចំនួន ដើម្បីជួយសម្រាលបន្ទុកគ្រួសាររបស់បងស្រី និងផ្តល់ក្តីសង្ឃឹមក្នុងការរស់នៅបន្តទៅមុខ។
សូមអនុមោទនាចំពោះកុសលផលបុណ្យ និងសូមឱ្យអំណាចនៃបុណ្យកុសលនេះ ជួយឱ្យបងស្រី និងកូនៗ មានសុខភាពល្អ សុវត្ថិភាពក្នុងការរស់នៅ ជាពិសេសសូមឱ្យការសម្រាលកូនប្រព្រឹត្តទៅដោយសុវត្ថិភាព និងបានជួបប្រទះនូវសេចក្តីសុខ សេចក្តីចម្រើនតទៅ។
វត្តអង្គក្ដី — រួមចំណែកចែករំលែកក្តីមេត្តា និងសេចក្តីស្រឡាញ់ ដើម្បីសង្គមប្រកបដោយសុខសាន។
