ខេត្តកំពង់ស្ពឺ៖ ស្មារតីសាមគ្គីភាព និងវប្បធម៌នៃការចែករំលែក «ខ្មែរជួយខ្មែរ» នៅតែបន្តស្តែងឡើងយ៉ាងសកម្មនិងរស់រវើកនៅក្នុងសង្គម។ ជាក់ស្តែង នៅថ្ងៃទី២១ ខែតុលា ឆ្នាំ២០២៦ ក្រោមការចង្អុលបង្ហាញ ពី លោកបណ្ឌិត ឃីម រដ្ឋា ប្រធានអង្គភាពសារព័ត៌មាន «រដ្ឋា រស្មីស្ទឹងត្រង់» លោក អ៊ូច សុខអាន តំណាងអង្គភាព រួមជាមួយបងប្អូនអ្នកសារព័ត៌មានគ្រប់ជាន់ថ្នាក់ បានចុះបេសកកម្មមនុស្សធម៌ ដោយបានសហការយ៉ាងជិតស្និទ្ធជាមួយអាជ្ញាធរមូលដ្ឋាន រួមមាន លោក អូន ប៉េង មេឃុំស្រង់ និង លោកយាយ សុខ ណន ក្រុមប្រឹក្សាឃុំស្រង់ ដើម្បីនាំយកថវិកានិងសម្ភារគ្រឿងឧបភោគបរិភោគ ទៅប្រគល់ជូនគ្រួសារចាស់ជរាទីទាល់ក្រដែលមានជីវភាពខ្វះខាតយ៉ាងខ្លាំង។
គ្រួសារចាស់ជរាដែលទទួលបានអំណោយមនុស្សធម៌នាពេលនេះ គឺលោកតា ព្រាប ប៉ន អាយុ ៨១ ឆ្នាំ និងប្រពន្ធឈ្មោះ ទន់ ជីន អាយុ ៧៣ ឆ្នាំ បច្ចុប្បន្នរស់នៅក្នុងភូមិរលាំងទឹក ឃុំស្រង់ ស្រុកគងពិសី ខេត្តកំពង់ស្ពឺ។ ដោយសារវ័យកាន់តែជ្រេ និងមានកម្លាំងទ្រុឌទ្រោម មិនអាចប្រកបរបរចិញ្ចឹមជីវិតបានពេញលេញដូចមុន ធ្វើឱ្យគ្រួសាររបស់លោកតាម្នាក់ៗជួបការលំបាកយ៉ាងខ្លាំងក្នុងជីវភាពរស់នៅប្រចាំថ្ងៃ។
ស្មារតីរួមសហការ និងការចូលរួមពីរលកសប្បុរសជន
សកម្មភាពមនុស្សធម៌ដ៏ប្រពៃនេះ អាចសម្រេចទៅបានដោយសារការរួមសហការគ្នាយ៉ាងស្រសាក់ស្រស្រាំ និងការលះបង់ពីសំណាក់តំណាងអង្គភាពសារព័ត៌មាន អាជ្ញាធរឃុំ ក្រុមយុវជន និងសប្បុរសជនក្នុងមូលដ្ឋានដែលបានរួមគ្នារៃអង្គាសថវិកានិងស្បៀងអាហារ។ ក្នុងនោះ ជំនួយទាំងអស់ទទួលបានការចូលរួមចំណែកយ៉ាងថ្លៃថ្លាពី៖
ក្រុមការងារអ្នកសារព័ត៌មាន៖ ពូម៉ៅ (ព័ត៌មានពលរដ្ឋទី), លោក សុគា (ព័ត៌មាន) , លោក សំអាត (ព័ត៌មាន) , លោកចំរើន ហៅ គងពិសីទាន់ហេតុការណ៍» ។
សប្បុរសជន និងអាជីវករ៖ លោក ធុច ថៅ (ថៅកែរថយន្តដឹកដី) ,លោក ពៅ ចាន់ណា (ថៅកែអាហារដ្ឋាន បុប្ផាលាក់ខ្លួន) , យុវជនមូលដ្ឋាន៖ ក្រុមយុវជនស្ម័គ្រចិត្តភូមិរលាំងទឹក ដែលបានចូលរួមយ៉ាងសកម្មក្នុងការរៃអង្គាស និងរៀបចំកម្លាំងជួយដល់ការងារនេះ។
អំណោយ និងជំនួយឧបត្ថម្ភរួមមាន៖ អង្ករ៖ ៧៥ គីឡូក្រាម,មី៖ ៤ កេស,ទឹកសុទ្ធ៖ ៣ កេស,ទឹកផ្លែឈើ៖ ២ កេស,ទឹកត្រី៖ ៣ យួរ,ទឹកស៊ីអ៊ីវ៖ ៣ យួរ,ត្រីខកំប៉ុង៖ ២ យួរ,ថវិកា៖ ២៦០០០០រៀល (ម្ភៃប្រាំមួយម៉ឺនរៀល) ។
ក្តីរំភើប និងការថ្លែងអំណរគុណ
ក្នុងឱកាសនោះផងដែរ លោកតានិងលោកយាយ ព្រមទាំងអាជ្ញាធរមូលដ្ឋាន បានសម្តែងនូវក្តីរំភើបឥតឧបមា និងបានថ្លែងអំណរគុណយ៉ាងជ្រាលជ្រៅបំផុតជូនចំពោះ លោកបណ្ឌិត ឃីម រដ្ឋា ប្រធានអង្គភាពសារព័ត៌មាន រដ្ឋា រស្មីស្ទឹងត្រង់ លោក អ៊ូច សុខអាន អាជ្ញាធរឃុំស្រង់ ក្រុមការងារអ្នកសារព័ត៌មានគ្រប់ស្ថាប័ន សប្បុរសជនទាំងអស់ និងបងប្អូនយុវជនភូមិរលាំងទឹក ដែលបានលះបង់ពេលវេលា ធនធាន និងកម្លាំងកាយចិត្ត ចុះមកជួយសម្រាលទុក្ខលំបាករបស់ពួកគាត់ចំពេលដែលកំពុងត្រូវការចាំបាច់បំផុត។
សកម្មភាពនេះមិនត្រឹមតែជាការផ្តល់ជំនួយសម្ភារ និងថវិកាប៉ុណ្ណោះទេ ប៉ុន្តែជាការផ្តល់នូវកម្លាំងចិត្តយ៉ាងធំធេង និងបង្ហាញពីស្មារតីសាមគ្គីភាពយ៉ាងរឹងមាំ រវាងអង្គភាពសារព័ត៌មាន អាជ្ញាធរដែនដី សប្បុរសជន និងប្រជាពលរដ្ឋនៅមូលដ្ឋាន ដោយមិនទុកឱ្យពលរដ្ឋណាម្នាក់រស់នៅក្នុងភាពឯកោឡើយ៕
