ខេត្តកំពង់ស្ពឺ៖ ថ្ងៃទី១៦ ខែវិច្ឆិកា ឆ្នាំ២០២៦
ប្រជាពលរដ្ឋរស់នៅមូលដ្ឋានក្នុងឃុំទឹកល្អក បានលើកឡើងពីក្តីកង្វល់យ៉ាងខ្លាំង និងបានស្នើសុំកិច្ចអន្តរាគមន៍ជាបន្ទាន់ពីសំណាក់អាជ្ញាធរពាក់ព័ន្ធ ពិសេស លោក ច័នថេត ឋានុរៈ ប្រធានមន្ទីរបរិស្ថានខេត្តកំពង់ស្ពឺ និងថ្នាក់ដឹកនាំខេត្ត ជួយចាត់វិធានការផ្លូវច្បាប់ចំពោះទីតាំងចាក់សំរាមនៅលើភ្នំមួយកន្លែង ដែលគ្រប់គ្រងដោយ ក្រុមហ៊ុន «វេងសេងហ្គ្រីន» ស្ថិតក្នុងភូមិសាស្ត្រ ភូមិបឹងងោង ឃុំទឹកល្អក ស្រុកគងពិសី ខេត្តកំពង់ស្ពឺ។
យោងតាមការរាយការណ៍ពីប្រជាពលរដ្ឋផ្ទាល់បានឱ្យដឹងថា ក្រុមហ៊ុនខាងលើបានទទួលសិទ្ធិវិនិយោគលើការប្រមូល និងគ្រប់គ្រងសំរាម ប៉ុន្តែត្រូវបានគេមើលឃើញថាពុំមានបច្ចេកទេស និងស្តង់ដាត្រឹមត្រូវតាមលក្ខណៈបច្ចេកទេសបរិស្ថាននោះឡើយ ដែលបង្កជាផលប៉ះពាល់ធ្ងន់ធ្ងរដល់សហគមន៍៖
ប៉ះពាល់ដំណាំស្រូវ និងជីវភាពពលរដ្ឋ៖ ក្រុមហ៊ុនបានបង្ហូរទឹកស្អុយ កាកសំណល់ និងទឹកកខ្វក់តាមប្រឡាយសាធារណៈហូរចូលក្នុងស្រែប្រជាពលរដ្ឋ បណ្តាលឱ្យខូចខាតដំណាំស្រូវរបស់ពលរដ្ឋចំនួន ៧គ្រួសារ ស្មើនឹងផ្ទៃដីប្រមាណ ៦ហិកតា។
បញ្ហាក្លិនស្អុយ និងអនាម័យ៖ ទឹកស្អុយ និងសំណល់ទាំងនោះបានជះក្លិនស្អុយយ៉ាងខ្លាំង ធ្វើឱ្យប៉ះពាល់ដល់សុខភាព និងការរស់នៅប្រចាំថ្ងៃរបស់បងប្អូនប្រជាពលរដ្ឋជាច្រើនគ្រួសារ។
ការបំពុលបរិស្ថានលើភ្នំ និងព្រៃឈើ៖ សំរាមត្រូវបានបោះបង់ចោលរាយប៉ាយរសាត់ពេញព្រៃលើទីតាំងភ្នំ ព្រមទាំងមានសកម្មភាពដុតសំរាមបង្កជាផ្សែងពុល និងការបំពុលបរិស្ថានយ៉ាងធ្ងន់ធ្ងរ។
មហាជន និងប្រជាពលរដ្ឋបានលើកឡើងទៀតថា ទង្វើ និងការគ្រប់គ្រងរបស់ក្រុមហ៊ុនមួយនេះ គឺពុំបានចូលរួមចំណែកអ្វីឡើយ ហើយថែមទាំងដើរផ្ទុយស្រឡះពីកិច្ចខិតខំប្រឹងប្រែង និងយុទ្ធនាការសម្អាតបរិស្ថានរបស់ ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ដែលកំពុងយកចិត្តទុកដាក់ខ្ពស់ក្នុងការជំរុញឱ្យកម្ពុជាមាន «ភាពស្អាត និងភាពបៃតង»។ ផ្ទុយទៅវិញ ក្រុមហ៊ុនបែរជាយកទីតាំងវិនិយោគមកបំផ្លាញសោភ័ណភាព និងបង្កការបំពុលបរិស្ថាននៅមូលដ្ឋានទៅវិញ។
ទាក់ទងនឹងបញ្ហានេះ ប្រជាពលរដ្ឋរងគ្រោះ ក៏ដូចជាមហាជនទូទៅ សូមសំណូមពរយ៉ាងទទូចដល់ អាជ្ញាធរស្រុកគងពិសី និង លោក ច័នថេត ឋានុរៈ ប្រធានមន្ទីរបរិស្ថានខេត្តកំពង់ស្ពឺ មេត្តាចុះត្រួតពិនិត្យមើលច្បាប់ទម្លាប់ និងសមត្ថភាពបច្ចេកទេសរបស់ក្រុមហ៊ុន «វេងសេងហ្គ្រីន» ឱ្យបានហ្មត់ចត់ និងចាត់វិធានការផ្លូវច្បាប់ទាន់ពេលវេលា ដើម្បីការពារផលប្រយោជន៍ និងបរិស្ថានរស់នៅរបស់ប្រជាពលរដ្ឋ៕








