ខេត្តកំពង់ស្ពឺ៖ ប្រជាពលរដ្ឋចំនួន ២១គ្រួសារ រស់នៅភូមិចំនួនបី ក្នុងឃុំទឹកល្អក់ ស្រុកគងពិសី ខេត្តកំពង់ស្ពឺ បាននិងកំពុងប្រឈមមុខនឹងផលប៉ះពាល់យ៉ាងធ្ងន់ធ្ងរពីសំណាក់ទីតាំងផលិតកែច្នៃកាកស្រាបៀរធ្វើជាចំណីសត្វមួយកន្លែង ដែលតាំងនៅភូមិស្នួលជ្រុំ ដែលបានបន្តសកម្មភាពបង្ហូរទឹកកខ្វក់ចូលដីស្រែរបស់ពួកគាត់យ៉ាងអនាធិបតេយ្យ។
យោងតាមការរាយការណ៍ពីប្រជាពលរដ្ឋ និងមេភូមិ បានឱ្យដឹងថា បញ្ហានេះបានបង្កផលប៉ះពាល់ដល់ដីស្រែសរុបចំនួន ៣ភូមិ ស្មើនឹង ២១គ្រួសារ រួមមាន៖
ភូមិស្នួល៖ ចំនួន ៣គ្រួសារ
ភូមិព្រៃកន្ទោច៖ ចំនួន ៨គ្រួសារ
ភូមិអង្គដូនពីស៖ ចំនួន ១០គ្រួសារ
គួររំលឹកផងដែរថា កន្លងមក អាជ្ញាធរមូលដ្ឋានធ្លាប់បានចុះអប់រំ ណែនាំ និងចាត់វិធានការជាច្រើនលើកច្រើនសាររួចមកហើយ ប៉ុន្តែម្ចាស់ទីតាំងមួយនេះមិនបានអនុវត្តតាមការណែនាំរបស់អាជ្ញាធរឡើយ។
ប្រជាពលរដ្ឋបានបញ្ជាក់បន្ថែមថា បញ្ហានេះបានអូសបន្លាយពេលយូរដល់ទៅ ៣ឆ្នាំមកហើយ ដោយក្នុងឆ្នាំទី១ ប្រជាពលរដ្ឋបានដាក់ពាក្យប្ដឹង, ឆ្នាំទី២ ម្ចាស់ទីតាំងបានយល់ព្រមទទួលខុសត្រូវសងជំងឺចិត្ត, ប៉ុន្តែចូលដល់ឆ្នាំទី៣ (ឆ្នាំនេះ) ទីតាំងខាងលើបែរជាគេចវេះ មិនព្រមទទួលខុសត្រូវលើផលស្រូវដែលខូចខាតឡើយ។
ចំពោះមុខបញ្ហានេះ ប្រជាពលរដ្ឋរងគ្រោះទាំងអស់ សូមសំណូមពរយ៉ាងទទូចដល់ មន្ទីរស្ថាប័នជំនាញពាក់ព័ន្ធ ព្រមទាំងអាជ្ញាធរខេត្តកំពង់ស្ពឺ មេត្តាចាត់មន្ត្រីជំនាញចុះពិនិត្យលើ បច្ចេកទេស ចង្វាក់ផលិតកម្ម និងត្រួតពិនិត្យមើលថា តើទីតាំងនេះ មានច្បាប់អនុញ្ញាតត្រឹមត្រូវដែរ ឬយ៉ាងណា? ដើម្បីចាត់វិធានការតាមផ្លូវច្បាប់ និងស្វែងរកដំណោះស្រាយសមស្របជូនប្រជាពលរដ្ឋដែលរងគ្រោះ។
អង្គភាពសារព័ត៌មានរបស់យើងខ្ញុំ រក្សាជំហររង់ចាំជានិច្ច ក្នុងការទទួលយកការបកស្រាយបំភ្លឺ ការពន្យល់ ឬការឆ្លើយតបពីសំណាក់ម្ចាស់ទីតាំងខាងលើ ព្រមទាំងអាជ្ញាធរមូលដ្ឋាន និងមន្ទីរជំនាញពាក់ព័ន្ធ រៀងរាល់ម៉ោងធ្វើការ ដើម្បីធានាបាននូវភាពយុត្តិធម៌ វិជ្ជាជីវៈសារព័ត៌មាន និងការផ្តល់ព័ត៌មានគ្រប់ជ្រុងជ្រោយជូនសាធារណជន ៕








