កណ្ដាល៖ ជាការពិតណាស់ នៅក្នុងយុគសម័យសន្តិភាពនេះ ក្រោមការដឹកនាំ គ្រប់គ្រងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា មន្ត្រីនគរបាលជាតិមិនអាចបំពេញភារកិច្ចនិងការទទួលខុសត្រូវរបស់ខ្លួន ដោយគ្មានការឆ្លងកាត់ការអប់រំបណ្ដុះបណ្ដាលនោះទេ។ ការអប់រំបណ្តុះបណ្ដាល ពិតជាបានដើរតួនាទីយ៉ាងសំខាន់ ក្នុងការអភិវឌ្ឍសមត្ថភាព និងកសាងធនធានមនុស្ស សម្រាប់ការអភិវឌ្ឍប្រទេសជាតិលើគ្រប់វិស័យ ជាពិសេសមន្ត្រីនគរបាលជាតិ។
លើសពីនេះទៀត នៅក្នុងមូលដ្ឋានប្រជាពលរដ្ឋពិតជាត្រូវការខ្លាំងណាស់ដោយមិនអាចខ្វះបាននូវសន្ដិសុខ សន្តិភាព សុវត្ថិភាព សណ្ដាប់ធ្នាប់សង្គម និងការលើកកម្ពស់ការយល់ដឹងអំពីច្បាប់ និងធានាឱ្យមានការអនុវត្ដច្បាប់ ប្រកបដោយប្រសិទ្ធភាព ព្រមទាំងធានាឱ្យមានការការពារ និងគោរពសិទ្ធិមនុស្ស ចំពោះប្រជាពលរដ្ឋទាំងអស់ក្នុងមូលដ្ឋានរបស់ខ្លួន។ ជាក់ស្តែង ប្រជាពលរដ្ឋតែងតែប្រាថ្នាចង់បានដោយខានមិនបានចំពោះមន្ត្រីនគរបាលជាតិប្រកបដោយគុណភាពសមត្ថភាព ប្រកបដោយវិជ្ជាជីវៈពេញលេញ ដើម្បីបំពេញភារកិច្ចជូនអង្គភាពនិងជូនពួកគាត់ប្រកបដោយប្រសិទ្ធភាព ស្របតាមផែនការអភិវឌ្ឍន៍ធនធានមនុស្សរបស់ក្រសួងមហាផ្ទៃ និងគោលនយោបាយកែទម្រង់កងកម្លាំងប្រដាប់អាវុធ របស់រាជរដ្ឋាភិបាល។
ទន្ទឹមជាមួយគ្នានេះ ប្រជាពលរដ្ឋ ក៏ដូចជាមហាជនបានកំពុងសម្ដែងអបអរសាទរយ៉ាងក្លៀវក្លា បង្ហោះសារអបអរសាទរយ៉ាងកងរំពងពេញបណ្ដាញសង្គមហ្វេសប៊ុកនាថ្ងៃទី១១ ខែធ្នូ ឆ្នាំ២០២១នេះ បន្ទាប់ពីពួកគាត់បានទទួលដំណឹងថា លោកវរសេនីយ៍ឯក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាលត្រូវបានលោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាលបានដាក់សំណើស្នើសុំសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ផ្ទេរភារកិច្ចនិងតែងតាំងមុខដំណែងជាស្នងការរងនៃស្នងការដ្ឋាននគរបាលខេត្តកណ្តាល។ ដោយមហាជនសម្ដែងការពេញចិត្ត ពេញថ្លើមយ៉ាងជ្រាលជ្រៅបំផុតចំពោះការសម្រេចដ៏ត្រឹមត្រូវប្រកបដោយការទទួលខុសត្រូវខ្ពស់និងការយកចិត្តទុកដាក់របស់ថ្នាក់ដឹកនាំដែលបានជ្រើសរើសយកមន្ត្រីល្អ មន្ត្រីជើង២ មន្ត្រីសកម្ម មន្ត្រីមានមនសិការខ្ពស់ មន្ត្រីមានក្រមសីលធម៌ វិជ្ជាជីវៈឲ្យធ្វើជាថ្នាក់ដឹកនាំសម្រាប់បន្តវេនដើម្បីផលប្រយោជន៍ដ៏មហិមារដល់ប្រជាពលរដ្ឋនិងសង្គមជាតិ។
ជាមួយគ្នានោះ មហាជនក៏បានគោរពបួងសួងដល់ព្រះពុទ្ធ ព្រះធម៌ ព្រះសង្ឃ សូមជួយបីបាច់ថែរក្សាការពារ លោកវរសេនីយ៍ឯក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាល និងភរិយា ព្រមទាំងបុត្រ សុំបានសេចក្តីសុខចម្រើន សុខសប្បាយ សុខភាពល្អបរិបូរណ៍ ជន្មាយុយឺនយូរ ជោគជ័យគ្រប់ភារកិច្ច និងសុំជួបប្រទះតែឧត្ដមពរទាំង៥ប្រការគឺ អាយុ វណ្ណៈ សុខៈ ពលៈ និងបដិភាណៈ កុំបីឃ្លៀងឃ្លាតឡើយ៕
