(រដ្ឋបាលខេត្តកំពង់ធំ): ឯកឧត្តម ងួន រតនៈ អភិបាលខេត្តកំពង់ធំ និងជាប្រធានគណកម្មាធិការគ្រប់គ្រងគ្រោះមហន្តរាយ ខេត្តកំពង់ធំ បានអំពាវនាវដល់បងប្អូនប្រជាពលរដ្ឋទាំងអស់ សូមចូលរួមចាក់វ៉ាក់សាំងការពារជំងឺកូវីដ១៩ និងចូលរួមគោរពច្បាប់ចរាចរណ៍ ដើម្បីសុវត្ថិភាពខ្លួនយើង និងក្រុមគ្រួសារយើង ។
ការថ្លែងបែបនេះត្រូវបានឯកឧត្តម ងួន រតនៈ អភិបាលខេត្តកំពង់ធំ លើកឡើងនៅក្នុងពិធីចែកអំណោយរបស់មន្ទីរ សង្គមកិច្ចអតីតយុទ្ធជន និងយុវនីតិសម្បទាខេត្តកំពង់ធំ ជូនដល់គ្រួសារចំនួន ៣៥០គ្រួសារ ដែលរងគ្រោះដោយគ្រោះធម្មជាតិ និងខ្យល់កន្ត្រាក់ ស្ថិតនៅក្នុងឃុំប្រឡាយ ស្រុកស្ទោង ខេត្តកំពង់ធំ នារសៀលថ្ងៃទី ១៥ ខែមករា ឆ្នាំ២០២២។
ជាមួយគ្នានោះដែរឯកឧត្តម ងួន រតនៈ លើកឡើងថា អំណោយទាំងនេះគឺបានមកពីការគិតគូរយកចិត្តទុកដាក់ទេសុខទុក្ខជាភាពរស់នៅរបស់បងប្អូនប្រជាពលរដ្ឋ របស់រាជរដ្ឋាភិបាល តាមរយៈមន្ទីរអតីតយុទ្ធជន និងយុវនីតិសម្បទាខេត្ត សម្រាប់ចែកជូនបងប្អូនដែលមានភាពខ្វះខាត ក្នុងចំណោមអ្នកមានជីវភាពខ្វះខាតជាងគេ និងអ្នក ទទួលរងគ្រោះគ្រោះធម្មជាតិ ដូចជា គ្រោះរាងស្ងួត ខ្យល់កន្ត្រាក់ រន្ទះបាញ់ និងទឹកជំនន់ ដោយមិនទុកឱ្យបងប្អូនណាម្នាក់ស្លាប់ដោយអាជ្ញាធរមិនបានដឹងនោះទេ។
ឯកឧត្តមបន្ថែមទៀតថា នៅក្នុងដំណាក់កាលនៃជំងឺកូវីដ១៩ នេះ បងប្អូនប្រជាពលរដ្ឋយើងភាគច្រើនជួបនូវវិបត្តិសេដ្ឋកិច្ចគ្រួសារ ទន្ទឹមនឹងនោះប្រមុខរាជរដ្ឋាភិបាល បានជួយគាំទ្រជីវភាពរបស់បងប្អូន ដែលមានជីវភាពខ្វះខាតក្រ១ ក្រ២ ទទួលបានការឧបត្ថម្ភជាសាច់ប្រាក់ជារៀងរាល់ខែផងដែរ ។
គួររំលឹកផងដែរថា អំណោយដែលត្រូវចែកជូនបងប្អូនប្រជាពលរដ្ឋទាំង ៣៥០គ្រួសារនៅពេលនេះ ក្នុងមួយគ្រួសារទទួលបាន អង្ករ ២៥គីឡូ ទឹកត្រី ១យួរ ទឹកស៊ីអ៊ីវ ១យួរ និងភួយ ១ ។
