រដ្ឋលេខាធិការក្រសួងព័ត៌មាន ឯកឧត្តម ជុំ កុសល បានលើកឡើងថា ការលើកកម្ពស់ការអនុវត្តច្បាប់ និងលិខិតបទដ្ឋានគតិយុត្តសម្រាប់អ្នកសារព័ត៌មាន ដើម្បីពង្រឹងស្ថាប័នព័ត៌មានឱ្យដំណើរការបានស្របតាមច្បាប់ សីលធម៌ និងទិសដៅអភិវឌ្ឍន៍ជាតិ។ ការបញ្ជាក់បែបនេះ នៅក្នុងពិធីបើកវគ្គបណ្តុះបណ្តាលស្តីពី «ការលើកកម្ពស់ការអនុវត្តច្បាប់ និងលិខិតបទដ្ឋានគតិយុត្តសម្រាប់អ្នកសារព័ត៌មាន» ដល់មន្ត្រីរាជការរបស់ក្រសួង តំណាងក្រសួងស្ថាប័នរដ្ឋ និងអ្នកសារព័ត៌មាន ចាប់ពីថ្ងៃទី២៣ ដល់ទី២៥ ខែកុម្ភៈ ឆ្នាំ២០២៦ នៅទីស្តីការក្រសួងព័ត៌មាន ដែលរៀបចំដោយគណៈកម្មការអភិវឌ្ឍន៍មូលធនមនុស្សក្នុងវិស័យព័ត៌មាន និងសោតទស្សន៍។
រដ្ឋលេខាធិការក្រសួងព័ត៌មាន ចាត់ទុកវគ្គបណ្តុះបណ្តាលនេះ ពិតជាមានសារៈសំខាន់សម្រាប់សិក្ខាកាមទាំងអស់យកទៅអនុវត្តក្នុងការងារប្រចាំថ្ងៃរបស់ខ្លួនប្រកប ដោយប្រសិទ្ធភាព និងស័ក្តិសិទ្ធិភាព។
សូមបញ្ជាក់ថា វគ្គបណ្តុះបណ្តាលស្តីពី «ការលើកកម្ពស់ការអនុវត្តច្បាប់ និងលិខិតបទដ្ឋានគតិយុត្តសម្រាប់អ្នកសារព័ត៌មាន» រៀបចំឡើងក្នុងគោលបំណងចែករំលែកបទពិសោធន៍ និងជួយឱ្យអ្នកសារព័ត៌មានបង្កើនចំណេះដឹង ការយល់ដឹងអំពីច្បាប់ពាក់ព័ន្ធវិស័យព័ត៌មាននិងសោទស្សន៍ និងលើកកម្ពស់ការយល់ដឹងអំពីសីលធម៌វិជ្ជាជីវៈមានទំនួលខុសត្រូវនិងគោរពច្បាប់ ជូនដល់មន្ត្រីរាជការ ក្រសួងព័ត៌មាន មន្ត្រីបណ្តាក្រសួងស្ថាប័ន និងអ្នកសារព័ត៌មាន ដើម្បីចូលរួមអនុវត្តការងារ និងលើកកម្ពស់នូវ សណ្តាប់ធ្នាប់សារព័ត៌មាននិងការផ្សព្វផ្សាយ ប្រកបដោយ គុណភាព និងសុវត្ថិភាព។ ដោយឡែក សិក្ខាកាមដែលចូលរួមវគ្គបណ្តុះបណ្តាលនេះ មកពីក្រសួង ស្ថាប័ន សមាគមអ្នកសារព័ត៌មាន១៩សមាគម អង្គភាពអ្នកសារព័ត៌មានចំនួន ១២១ អង្គភាព ក្នុងនោះ៧៦នាក់ជាចាងហ្វាង សរុបចំនួន ២៤៤នាក់។
