ខេត្តត្បូងឃ្មុំ ៖ ឯកឧត្តម ស៊ូម សារឿន ប្រធានសមាគមរាជសីហ៍ និង ឯកឧត្តម ទេព យុទ្ធី ប្រធានក្រុមប្រឹក្សាយោបល់សមាគមរាជសីហ៍ អមដំណើរដោយថ្នាក់ដឹកនាំ គណៈកម្មាធិការប្រតិបត្តិសមាគមរាជសីហ៍ បានអញ្ជើញចូលរួមជាអធិបតីក្នុងពិធីប្រកាសតែងតាំងថ្នាក់ដឹកនាំ និងសមាជិក សមាជិកា ចំនួន៣១៤អង្គ/នាក់ ប្រចាំនៅសាខាខេត្តត្បូងឃ្មុំ និងអនុសាខាតាមស្រុកនានា នៅព្រឹកថ្ងៃទី០៧ ខែ កុម្ភៈឆ្នាំ២០២៣ នៅក្រុងសួង ខេត្តត្បូងឃ្មុំ។
ឯកឧត្តម អ៊ុង សារ៉ាវ៉ាន់ អនុប្រធានអចិន្ត្រៃយ៍សមាគមរាជសីហ៍ បានអានសេចក្តីសម្រេចតែងតាំងថ្នាក់ដឹកនាំ និងសមាជិក សមាជិកា សមាគមរាជសីហ៍សាខាខេត្តត្បូងឃ្មុំ ដែលមាន លោក ធី ម៉ានី ជាប្រធានសមាគមរាជសីហ៍សាខាខេត្តត្បូងឃ្មុំ និង លោក កេង ប៊ុនណា ជាប្រធានកិត្តិយស ព្រមទាំងថ្នាក់ដឹកនាំ និងសមាជិក សមាជិកា សមាគមរាជសីហ៍សាខាខេត្តត្បូងឃ្មុំ ៣១៤អង្គ/នាក់។
បន្ទាប់ពីត្រូវបានប្រកាសតែងតាំង លោក ធី ម៉ានី ប្រធានសមាគមរាជសីហ៍សាខាខេត្តត្បូងឃ្មុំ បានឡើងប្តេជ្ញាចិត្តចំពោះគណៈអធិបតី និងអង្គពិធីចំនួន០៥ចំណុច គឺ ខិតខំអនុវត្តតួនាទី ភារកិច្ច និងគោរពតាមលក្ខន្តិកៈ បទបញ្ជាផ្ទៃក្នុងរបស់សមាគម បន្តធ្វើសកម្មភាពមនុស្សធម៌ និងកៀរគរសប្បុរសជនជួយដល់សមាគម ខិតខំដឹកនាំសម្របសម្រួល ពង្រឹងសាមគ្គីភាពផ្ទៃក្នុង និងបង្កើនទំនាក់ទំនងសហការល្អជាមួយអាជ្ញាធរ ដើម្បីសម្រេចបាន តាមគោលបំណង ទិសដៅរបស់សមាគម។
ឯកឧត្ដម ស៊ូម សារឿន ប្រធានសមាគមរាជសីហ៍ សម្តែងការអបអរសាទរចំពោះថ្នាក់ដឹកនាំ និងសមាជិក សមាជិកា សមាគមរាជសីហ៍សាខាខេត្តត្បូងឃ្មុំទាំងអស់ដែលទេីបទទួលបានការតែងតាំងថ្មី និងថ្លែងការកោតសរសើ ថ្នាក់ដឹកនាំសាខា ដែលទើបបង្កើតថ្មី ប៉ុន្តែមានសមាជិកយ៉ាងច្រើនរហូតដល់ ៣១៤អង្គ/នាក់។
ឯកឧត្ដមប្រធានថ្លែងការគាំទ្រការប្តេជ្ញាចិត្តទាំង៥ចំណុចរបស់លោកប្រធានសាខាដែលទើបទទួលបានការតែងតាំង។ ឯកឧត្ដមប្រធានបានណែនាំឱ្យថ្នាក់ដឹកនាំសាខាធ្វើសកម្មភាពជាប់ជាប្រចាំដូចភ្លៀងរលឹម និងបានផ្ដាំផ្ញេីដល់ថ្នាក់ដឹកនាំសាខា និងសមាជិក សមាជិកាទាំងអស់ សូមខិតខំរួមសាមគ្គីគ្នាបំពេញការងារ ធ្វើសកម្មភាពមនុស្សធម៌ក្នុងសង្គម និង ចូលរួមអភិវឌ្ឍន៍សង្គមជាតិយើងឱ្យកាន់តែរីកចម្រើនថែមទៀត។
ឯកឧត្តម ទេព យុទ្ធី ប្រធានក្រុមប្រឹក្សាយោបល់សមាគមរាជសីហ៍ ថ្លែងការកោតសរសើរ និងគាំទ្ររបាយការណ៍លទ្ធផលការងារកន្លងមក ហើយជឿជាក់ថា សាខានឹងអាចដោះស្រាយញ្ហាប្រឈមដែលបានលើកឡើង ដោយត្រូវបង្កើនសកម្មភាពការងារ។
ឯកឧត្តមបញ្ជាក់ថា សមាគមមានចក្ខុវិស័យច្បាស់លាស់ ធ្វើសកម្មភាពមនុស្សធម៌ និងសប្បុរសធម៌ ស្របតាមកម្មវិធីនយោបាយរបស់រាជរដ្ឋាភិបាលស្របច្បាប់ ក្នុងគោលបំណងសម្រាលបន្ទុក ជនរងគ្រោះ និងជនងាយរងគ្រោះ ដោយរួមសហការជាមួយអាជ្ញាធរគ្រប់ថ្នាក់ ដើម្បីចូលរួមកាត់បន្ថយភាពក្រីក្រ និងការអភិវឌ្ឍសេដ្ឋកិច្ច សង្គមឱ្យកាន់តែប្រសើរឡើង។
ឯកឧត្តមបញ្ជាក់បន្ថែមថា ដើម្បីសម្រេចគោលបំណងនិងចក្ខុវិស័យរបស់សមាគម ត្រូវកំណត់បុរេលក្ខណៈចំនួន៣ គឺធានាគុណភាពការងារ សុវត្ថិភាពការងារ និងនិរន្តរ៍ភាពការងារ។
សូមបញ្ជាក់ថា មកដល់បច្ចុប្បន្ននេះ សមាគមរាជសីហ៍ មានទីស្នាក់ការកណ្តាលនៅ រាជធានីភ្នំពេញ និងមានទីស្នាក់ការសាខា ២២ រាជធានី-ខេត្ត គឺ៖ ភ្នំពេញ កណ្តាល តាកែវ ក្រុងព្រះសីហនុ កោះកុង សៀមរាប រតនគិរី កំពង់ស្ពឺ កំពង់ឆ្នាំង ឧត្តរមានជ័យ កំពត កែប ក្រចេះ បាត់ដំបង បន្ទាយមានជ័យ កំពង់ធំ ព្រៃវែង ស្វាយរៀង ត្បូងឃ្មុំ ព្រមទាំង ក្រៅប្រទេសចំនួន០៤ គឺប្រទេសជប៉ុន និង ប្រទេសថៃ កូរ៉េ និងវៀតណាម ផងដែរ ហើយសមាគមនឹងបន្តបើកសាខាបន្ថែមរហូត ២៥ខេត្ត-រាជធានី៕
