ខេត្តព្រះសីហនុ ៖ ឯកឧត្តម ស៊ូម សារឿន ប្រធានសមាគមរាជសីហ៍ អមដំណើរដោយថ្នាក់ដឹកនាំ គណៈកម្មាធិការប្រតិបត្តិសមាគមរាជសីហ៍ បានអញ្ជើញចូលរួមជាអធិបតីក្នុងពិធីប្រកាសតែងតាំងថ្នាក់ដឹកនាំ និងសមាជិក សមាជិកា ចំនួន១៧៥នាក់ ប្រចាំនៅសាខាខេត្តព្រះសីហនុ និងអនុសាខាចំនួន៥ តាមក្រុង/ស្រុកនានា នៅរសៀលថ្ងៃទី២៦ ខែ កុម្ភៈ ឆ្នាំ២០២៣ នៅសាលាស្រុកព្រៃនប់ ខេត្តព្រះសីហនុ។
ឯកឧត្តម អ៊ុង សារ៉ាវ៉ាន់ អនុប្រធានអចិន្ត្រៃយ៍សមាគមរាជសីហ៍ និង លោក ម៉ាត់ ណៃសៀក ប្រធានផ្នែឥស្លាម បានអានសេចក្តីសម្រេចតែងតាំងថ្នាក់ដឹកនាំ និងសមាជិក សមាជិកា សមាគមរាជសីហ៍សាខាខេត្តព្រះសីហនុ ដែលមាន លោក លាង ស៊ីនាថ ជា ប្រធានសាខាខេត្តព្រះសីហនុ អមដោយអនុប្រធាន ចំនួន០៨នាក់ និងសមាជិក សមាជិកា សរុប ១៧៥នាក់។
បន្ទាប់ពីត្រូវបានប្រកាសតែងតាំង លោក លាង ស៊ីនាថ ជាប្រធានសមាគមរាជសីហ៍សាខាខេត្តព្រះសីហនុ បានឡើងប្តេជ្ញាចិត្តចំពោះគណៈអធិបតី និងអង្គពិធីចំនួន០៥ចំណុច គឺ
១.ខិតខំអនុវត្តតួនាទី ភារកិច្ច និង គោរពតាមលក្ខន្តិកៈ បទបញ្ជាផ្ទៃក្នុងរបស់សមាគម។
២.បង្កើនទំនាក់ទំនង សហការល្អជាមួយអាជ្ញាធរ ដើម្បីសម្រេចបាន តាមគោលបំណង ទិសដៅរបស់សមាគម។
៣.ពង្រឹងសាមគ្គីភាពផ្ទៃក្នុង
៤.កៀរគរសប្បុរសជនជួយដល់សមាគម ខិតខំដឹកនាំសម្របសម្រួល បន្តធ្វើសកម្មភាពមនុស្សធម៌
៥.ខំរៀនសូត្រពង្រឹងសមត្ថភាព ដើម្បីបង្កើនប្រសិទ្ធភាពការងារសមាគម។
ឯកឧត្ដម ស៊ូម សារឿន ប្រធានសមាគមរាជសីហ៍ សម្តែងការអបអរសាទរចំពោះថ្នាក់ដឹកនាំ និងសមាជិក សមាជិកា សមាគមរាជសីហ៍សាខាខេត្តព្រះសីហនុ ទាំងអស់ដែល ទើបទទួលបានការតែងតាំងថ្មី និងថ្លែងការកោតសរសើរ លទ្ធផលការងារសម្រេចបានកន្លងមក ដោយបានចុះធ្វើសកម្មភាពមនុស្សធម៌៧១លើក ចំណាយអស់ថវិកាជាង $២០០,០០០ (ម្ភៃម៉ឺនដុល្លារអាមេរិក) ជាពិសេស ផ្នែកឥស្លាមខេត្តព្រះសីហនុ។
ឯកឧត្ដមប្រធាន បានពាំនាំការផ្តាំផ្ញើរសួរ សុខទុក្ខ ការអបអរសាទរ និង ការលើកទឹកពីសំណាក់ ឯកឧត្តមបណ្ឌិត ហ៊ុន ម៉ាណែត ជូនចំពោះថ្នាក់ដឹកនាំ សមាជិក សមាជិកា យុវជនរាជសីហ៍ទាំងអស់។
ឯកឧត្ដម ស៊ូម សារឿន បញ្ជាក់បន្ថែមថា ឯកឧត្តមបណ្ឌិត ហ៊ុន ម៉ាណែត គាំទ្រសកម្មភាពសមាគមរាជសីហ៍យើង ហើយតែងតែឧបត្តម្ភគាំទ្រ ជាពិសេស ការផ្តល់អាហារូបករណ៍ជាច្រើនជូនយុវជនរាជសីហ៍ ការផ្តល់គ្រឿងឥស្សរិយយស។ល។
ឯកឧត្ដមប្រធានបានថ្លែងពីប្រវត្តិនៃការកកើតសមាគមតាំងពីមានក្បាលម៉ាស៊ីនតែ៥នាក់ រហូតដល់បច្ចុប្បន្នមានសមាជិកជាង៤,០០០នាក់ និងមានសាខារាជធានី/ខេត្តចំនួន២៣ និងសាខាក្រៅប្រទេសចំនួន ០៤ គឺ ប្រទេស ថៃ វៀតណាម ជប៉ុន និងកូរ៉េ។ ក្រៅពីធ្វើសកម្មភាពមនុស្សធម៌ កីឡា ជួយសង្គម ក្នុងប្រទេសយើង សមាគមរាជសីហ៍ ក៏បានធ្វើសកម្មភាពក្រៅប្រទេស ដូចជា កូរ៉េ បារាំង ថែមទាំងបានចុះMOUសហការគ្នាធ្វើសកម្មភាពមនុស្សធម៌ ជាមួយក្រុមហ៊ុនបរទេសធំជាច្រើន។
ឯកឧត្ដមប្រធានថ្លែងការគាំទ្រ ការប្តេជ្ញាចិត្តរបស់ លោក លាង ស៊ីនាថ ប្រធានសាខាខេត្តព្រះសីហនុ និងណែនាំឱ្យ ផ្សព្វផ្សាយ និងអនុវត្តសកម្មភាព ស្របតាម បទបញ្ជាផ្ទៃក្នុង និង លក្ខន្តិកៈ របស់សមាគម ហើយត្រូវធ្វើរបាយការណ៍ជាប្រចាំជូនស្នាក់ការកណ្តាល។ ទន្ទឹមនោះ ត្រូវមានគំនិតច្នៃប្រឌិត ដើម្បីបង្កើនប្រសិទ្ធភាពការងារ ត្រូវតាមដាន វាយតម្លៃការងារជាប្រចាំ។
ឯកឧត្ដមប្រធានណែនាំឱ្យខិតខំរួមសាមគ្គីគ្នាបំពេញការងារ ធ្វើសកម្មភាពមនុស្សធម៌ ជួយប្រជាជនខ្វះខាតពិតប្រាកដ គាំទ្ររាជរដ្ឋាភិបាល និង សហការល្អជាមួយអាជ្ញាធរគ្រប់ថ្នាក់ ដើម្បីចូលរួមអភិវឌ្ឍន៍សង្គមជាតិយើងឱ្យកាន់តែរីកចម្រើនថែមទៀត។
ចុងបញ្ចប់ ឯកឧត្តមប្រធានបានជូនពរ ប្រគល់លិខិតតែងតាំង ថតរូបអនុស្សាវរីយ៍ និងបានចូលរួមពិសារអាហារសាមគ្គីក្នុងបរិយាកាសស្និទ្ធស្នាលរីករាយក្រៃលែង៕
