ភ្នំពេញ ៖ ឯកឧត្តម ស៊ូម សារឿន ប្រធានសមាគមរាជសីហ៍ និង ឯកឧត្តម ទេព យុទ្ធី ប្រធានក្រុមប្រឹក្សាយោបល់ អមដំណើរដោយថ្នាក់ដឹកនាំ គណៈកម្មាធិការប្រតិបត្តិសមាគមរាជសីហ៍ បានអញ្ជើញចូលរួមជាអធិបតីក្នុងពិធីប្រកាសតែងតាំងថ្នាក់ដឹកនាំ និងសមាជិក សមាជិកា ចំនួន ២៤២នាក់ ប្រចាំសាខារាជធានីភ្នំពេញ នៅរសៀលថ្ងៃទី១១ ខែ មីនា ឆ្នាំ២០២៣ នៅវិទ្យាល័យស៊ីសុវត្ថិ រាជធានីភ្នំពេញ។
ឯកឧត្តម អ៊ុង សារ៉ាវ៉ាន់ អនុប្រធានអចិន្ត្រៃយ៍ សមាគមរាជសីហ៍ និង ឯកឧត្តម ស៊ិន ឌីណា អគ្គលេខាធិការសមាគម បានអានសេចក្តីសម្រេចតែងតាំងថ្នាក់ដឹកនាំ និងសមាជិក សមាជិកា សមាគមរាជសីហ៍សាខារាជធានីភ្នំពេញ ដែលមាន លោកឧត្តមសេនីយ៍ត្រី សរ សំណាង ជា ប្រធានសាខារាជធានីភ្នំពេញ និង លោក អ៊ុង សារុំ ជាប្រធានក្រុមប្រឹក្សាយោបល់ អមដោយ សមាជិក សមាជិកា សរុប ២៤២នាក់។
បន្ទាប់ពីត្រូវបានប្រកាសតែងតាំង លោកឧត្តមសេនីយ៍ត្រី សរ សំណាង ប្រធានសាខារាជធានីភ្នំពេញ បានឡើងប្តេជ្ញាចិត្តចំពោះគណៈអធិបតី និងអង្គពិធីចំនួន០៧ចំណុច គឺ
១.ខិតខំអនុវត្តតួនាទី ភារកិច្ច និង គោរពតាមលក្ខន្តិកៈ បទបញ្ជាផ្ទៃក្នុងរបស់សមាគម។
២.បន្តដឹកនាំ ពង្រឹងសាមគ្គីភាពផ្ទៃក្នុង
៣. បន្តសហការល្អជាមួយអាជ្ញាធរ បង្កើនទំនាក់ទំនង ដើម្បីសម្រេចគោលបំណង ទិសដៅរបស់សមាគម។
៤.កៀរគរសប្បុរសជនជួយដល់សមាគម ខិតខំដឹកនាំសម្របសម្រួល បន្តធ្វើសកម្មភាពមនុស្សធម៌
៥.បន្តផ្សព្វផ្សាយគោលការណ៍ សកម្មភាព ការងារសមាគម ដើម្បីពង្រឹងនិងពង្រីកចលនាយុវជនចូលរួមជាមួយរាជសីហ៍
៦.រៀបចំផែនការយុទ្ធសាស្ត្រ ធ្វើរបាយការណ៍ជូនថ្នាក់កណ្តាល
៧ គាំទ្របេក្ខភាព សម្តេចតេជោ ហ៊ុន សែន ជានាយករដ្ឋមន្ត្រីសម្រាប់នីតិកាលទី៧ នៃរដ្ឋសភា និង ឯកឧត្តមបណ្ឌិត ហ៊ុន ម៉ាណែត ជាបេសក្ខភាពនាយករដ្ឋមន្ត្រីសម្រាប់ពេលអនាគត។
ឯកឧត្តម ទេព យុទ្ធី ប្រធានក្រុមប្រឹក្សាយោបល់សមាគមរាជសីហ៍ បានថ្លែងកោតសរសើរ ការរៀបចំពិធីនេះ ដែលមានសមាជិកចូលរួមច្រើន ហើយសមាសភាពមានចម្រុះល្អណាស់ និងសូមគាំទ្រការប្តេជ្ញាចិត្តរបស់ លោកប្រធានសាខារាជធានីភ្នំពេញដែលទើបទទួលបានការតែងតាំង ជាពិសេស ចំណុចទី៧ចុងក្រោយ។
ឯកឧត្តមបញ្ជាក់ថា សមាគមមានចក្ខុវិស័យច្បាស់លាស់ ធ្វើសកម្មភាពមនុស្សធម៌ និងសប្បុរសធម៌ ស្របតាមកម្មវិធីនយោបាយរបស់រាជរដ្ឋាភិបាលស្របច្បាប់ ក្នុងគោលបំណងសម្រាលបន្ទុក ជនរងគ្រោះ និងជនងាយរងគ្រោះ ដោយរួមសហការជាមួយអាជ្ញាធរគ្រប់ថ្នាក់ ដើម្បីចូលរួមកាត់បន្ថយភាពក្រីក្រ និងការអភិវឌ្ឍសេដ្ឋកិច្ច សង្គមឱ្យកាន់តែប្រសើរឡើង។
ឯកឧត្តមបញ្ជាក់បន្ថែមថា ដើម្បីសម្រេចគោលបំណងនិងចក្ខុវិស័យរបស់សមាគម ត្រូវអនុវត្តការងារដោយយកចិត្តទុកដាក់ ចំណុចសំខាន់៣គឺ៖
១.ធានាគុណភាពការងារ ដោយត្រូវបំពេញភារកិច្ច ប្រកបដោយ សុជីវធម៌ និង សីលធម៌
២.សុវត្ថិភាពការងារ គឺត្រូវធ្វើសកម្មភាព ស្របតាមច្បាប់កំណត់
៣.ធានានិរន្តរ៍ភាពការងារគ្រប់ទីកន្លែង។
ឯកឧត្ដម ស៊ូម សារឿន ប្រធានសមាគមរាជសីហ៍ សម្តែងការអបអរសាទរចំពោះថ្នាក់ដឹកនាំ និងសមាជិក សមាជិកា សមាគមរាជសីហ៍សាខារាជធានីភ្នំពេញ ទាំងអស់ដែលទើបទទួលបានការតែងតាំងថ្មី។
ឯកឧត្ដមប្រធាន បានពាំនាំការផ្តាំផ្ញើរសួរ សុខទុក្ខ ការជូនពរ និង ការអបអរសាទរ ពីសំណាក់ ឯកឧត្តមបណ្ឌិត ហ៊ុន ម៉ាណែត ជូនចំពោះថ្នាក់ដឹកនាំ សមាជិក សមាជិកា យុវជនរាជសីហ៍រាជធានីភ្នំពេញទាំងអស់។
ឯកឧត្ដម ស៊ូម សារឿន ក្នុងនាមសមាជិក សមាជិកាសមាគម សូមជូនពរ ឯកឧត្តមបណ្ឌិត ហ៊ុន ម៉ាណែត ឱ្យមានសុខភាពល្អ និង ជោគជ័យគ្រប់ភារកិច្ច។
ឯកឧត្ដមប្រធានបញ្ជាក់ថា សកម្មភាពរបស់សមាគមរាជសីហ៍យើង មានការគាំទ្រពី ឯកឧត្តមបណ្ឌិត ហ៊ុន ម៉ាណែត ដែលតែងតែឧបត្តម្ភគាំទ្រ ជាពិសេស ការផ្តល់អាហារូបករណ៍ជាច្រើនជូនយុវជនរាជសីហ៍ ។
ឯកឧត្ដមប្រធានបានថ្លែងពីប្រវត្តិនៃការកកើតសមាគមតាំងពីមានក្បាលម៉ាស៊ីនតែ៥នាក់ បង្កើតជាស្ទីតយោStudio ថតបទចម្រៀង រួចហើយទើបបង្កើតជាសមាគម ចុះបញ្ជីនៅក្រសួងមហាផ្ទៃ។ រហូតដល់បច្ចុប្បន្នមានសមាជិកជាង៤,០០០នាក់ និងមានសាខារាជធានី/ខេត្តចំនួន២៤ និងសាខាក្រៅប្រទេសចំនួន ០៥ គឺ ប្រទេស កូរ៉េ ថៃ វៀតណាម ជប៉ុន និង ម៉ាឡេស៊ី។
ក្រៅពីធ្វើសកម្មភាពមនុស្សធម៌ កីឡា ជួយសង្គម ក្នុងប្រទេសយើង សមាគមរាជសីហ៍ ក៏បានធ្វើសកម្មភាពក្រៅប្រទេស ដូចជា កូរ៉េ បារាំង ថែមទាំងបានចុះMOUសហការគ្នាធ្វើសកម្មភាពមនុស្សធម៌ ជាមួយក្រុមហ៊ុនបរទេសធំជាច្រើន។
ឯកឧត្ដមប្រធានថ្លែងការគាំទ្រ ការប្តេជ្ញាចិត្តរបស់ លោកឧត្តមសេនីយ៍ត្រី សរ សំណាង ប្រធានសាខារាជធានីភ្នំពេញ និងណែនាំឱ្យ ផ្សព្វផ្សាយ និងអនុវត្តសកម្មភាព ស្របតាម បទបញ្ជាផ្ទៃក្នុង និង លក្ខន្តិកៈ របស់សមាគម ជាពិសេស សូមធ្វើសកម្មភាពមនុស្សធម៌ ចុះតាមខ្នងផ្ទះ ប្រជាពលរដ្ឋក្រីក្រ នៅសំណង់មិនរៀបរយ ដើម្បីជួយសម្រាលការលំបាកផ្នែកជីវភាពរបស់ពួកគាត់ ចូលរួមកាត់បន្ថយភាពក្រីក្រ និង ចូលរួមអភិវឌ្ឍន៍សង្គមជាតិយើងឱ្យកាន់តែរីកចម្រើនថែមទៀត។
ចុងបញ្ចប់ ឯកឧត្តមប្រធានបានជូនពរ ប្រគល់លិខិតតែងតាំង ថតរូបអនុស្សាវរីយ៍ និងបានចូលរួមពិសារអាហារសាមគ្គីក្នុងបរិយាកាសស្និទ្ធស្នាលរីករាយក្រៃលែង៕
