ខេត្តតាកែវ៖ ឯកឧត្តម អ៊ិន ណាង និងលោកជំទាវ ព្រមទាំង ក្រុមគ្រួសារ កូនចៅ ឧបាសក អោ អ៊ិន និង ឧបាសិកា ឡុច ភិន បានបរិច្ចាគដីជាង២,០០០ម៉ែត្រការ៉េ និងចំណាយថវិកាជិត $២០,០០០ ដើម្បីកសាង សាលាបុណ្យថ្មី១ខ្នង ស្ថិតនៅភូមិកំណើតរបស់ឯកឧត្តម ក្នុងភូមិត្រពាំងចំការ ឃុំត្រពាំងក្រសាំង ស្រុកបាទី ខេត្តតាកែវ ហើយបានធ្វើពិធីសម្ពោធជាផ្លូវការដាក់ឱ្យប្រជាពលរដ្ឋទូទៅប្រើប្រាស់ ក្រោមអធិបតីភាព ឯកឧត្តម គង់ ចាន់ណា, ឯកឧត្តម អ៊ិន ណាង, ឯកឧត្តម ថាំង ប៊ុនសុង, និង លោកជំទាវ រស់ សុភារ៉ាវី ប្រធានក្រុមការងារគណបក្សប្រជាជននិងថ្នាក់ជាតិចុះមូលដ្ឋានឃុំត្រពាំងក្រសាំង នាព្រឹក ថ្ងៃទី០៩ ខែមេសា ឆ្នាំ២០២៣។
ពិធីនេះមានការនិមន្តនិងអញ្ជើញចូលរួមពី ព្រះសង្ឃ អាចារ្យ ដូនជី លោកតា យាយ ពូ មីង សិស្សានុសិស្ស និងអាជ្ញាធរមូលដ្ឋានប្រមាណជាង៥០០អង្គ/នាក់ ដែលក្នុងនោះ លោកតា យាយម្នាក់ៗ ទទួលបានអំណោយជាថវិកា១ម៉ឺនរៀលនិងសារ៉ុង១ ប្រជាការពារទទួលបានថវិកា២ម៉ឺនរៀលក្នុងម្នាក់ និង សិស្សានុសិស្សទទួលបានថវិកាចំនួន១ម៉ឺនរៀលក្នុងម្នាក់ ដែលសរុបថវិកាចំណាយអស់ចំនួន ៨លានរៀល។
ឯកឧត្តម អ៊ិន ណាង ទីប្រឹក្សារាជរដ្ឋាភិបាល ថ្លែងជម្រាបអំពីប្រវត្តិនៃការកកើតសាលាឆទាន ជាកន្លែងសក្ការៈបូជា និងបម្រើផលប្រយោជន៍ប្រជាពលរដ្ឋទូទៅ ព្រមទាំង សូមឧទ្ទិសកុសលជូនអ្នកមានគុណរបស់ឯកឧត្តមនិងអ្នកផ្តើមបុណ្យទាំងអស់។
ឯកឧត្តមបានថ្លែងពីការអភិវឌ្ឍន៍រីកចម្រើនក្នុងសង្គម និងសុខសន្តិភាព ក្រោមការដឹកនាំដ៏ប៉ិនប្រសព្វរបស់ សម្តេចតេជោ ហ៊ុន សែន នាយករដ្ឋមន្ត្រី ដែលបច្ចុប្បន្នប្រជាជនកម្ពុជាកំពុងរស់នៅយ៉ាងសុខដុមរមនាប្រកបដោយក្តីសង្ឃឹម។
ទន្ទឹមនោះ ឯកឧត្តម អ៊ិន ណាង បានអំពាវនាវឱ្យលោកយាយតា បងប្អូនប្រជាពលរដ្ឋចូលរួមការពារសន្តិភាព និងបន្តបោះឆ្នោតគាំទ្រ គណបក្សប្រជាជនកម្ពុជា គាំទ្រ សម្តេចតេជោ ហ៊ុន សែន ជានាយករដ្ឋមន្ត្រី និង ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេន។
លោកជំទាវ រស់ សុភារ៉ាវី ប្រធានក្រុមការងារគណបក្សប្រជាជននិងថ្នាក់ជាតិចុះមូលដ្ឋានឃុំត្រពាំងក្រសាំង បានថ្លែងអំណរគុណ ឯកឧត្តម អ៊ិន ណាង និងក្រុមគ្រួសារ ចំណោះការកសាងសាលាបុណ្យទុកបម្រើប្រយោជន៍សាធារណៈនេះ។
ឯកឧត្តម គង់ ចាន់ណា ទីប្រឹក្សារាជរដ្ឋាភិបាល ថ្លែងការកោតសរសើរ ឯកឧត្តម អ៊ិន ណាង និងក្រុមគ្រួសារ ដែលបានលះបង់ បរិច្ចាគទាំងដីនិងថវិកា រួមគ្នាកសាងសាលាបុណ្យដ៏ល្អ ហើយរៀបចំពីធីសម្ពោធយ៉ាងឱឡារិក ព្រមទាំងបានរៀបចំអាហារ ផ្តល់អំណោយជាថវិកានិងសម្ភារប្រើប្រាស់ដល់អ្នកចូលរួមទាំងអស់ប្រមាណ៥០០នាក់។
ឈ្លៀតក្នុងឱកាសនោះ ឯកឧត្តមបានពាំនាំការផ្តាំផ្ញើសួរសុខទុក្ខពីថ្នាក់ដឹកនាំរាជរដ្ឋាភិបាល និងបានគូសបញ្ជាក់ពីការអភិវឌ្ឍន៍រីកចម្រើន ក្រោមការដឹកនាំរបស់ សម្តេចតេជោ ហ៊ុន សែន ជានាយករដ្ឋមន្ត្រី និងជា ប្រធានគណបក្សប្រជាជនកម្ពុជា។
បន្ទាប់មកគណៈអធិបតីបានចែកអំណោយជូនអ្នកចូលរួមទាំងអស់ ព្រមទាំង កាត់ខ្សែបូសម្ពោធ រៀបចំចង្ហាន់ប្រគេនព្រះសង្ឃ និងអាហារសាមគ្គីជូនប្រជាពលរដ្ឋពិសារក្នុងបរិយាកាសរីករាយក្រៃលែង៕
