ភ្នំពេញ ៖ នាថ្ងៃទី ០៧ ខែធ្នូ ឆ្នាំ ២០០៧ អង្គភាពចីរភាពបរិស្ថានកម្ពុជា (CESO) បានចេញញ្ញតិ គាំទ្រការអនុវត្តការងាររបស់ក្រសួងបរិស្ថានលើយុទ្ធនាការភាពស្អាតភាពបៃតងក្នុងអំឡុងពេលជាង ១៥ ខែ ក្រោមការដឹកនាំរបស់ ឯកឧត្ដម បណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ក្នុងនីតិកាលទី ៧ នៃរដ្ឋសភាកម្ពុជា ដែលមានខ្លឹមសារទាំងស្រុង ដូចខាងក្រោម ៖
ញត្តិគាំទ្រ
ការអនុវត្តន៍ការងាររបស់ក្រសួងបរិស្ថាន លើយុទ្ធនាការ ភាពស្អាត និងភាពបៃតង
យើងខ្ញុំទាំងអស់គ្នាជា ថ្នាក់ដឹកនាំ សមាជិក សមាជិកា នៃអង្គការចីរភាពបរិស្ថានកម្ពុជា (CESO) សូម កោតសរសើរ និងសូមគាំទ្រយ៉ាងពេញទំហឹង នូវយុទ្ធនាការដែលបានដាក់ចេញដោយ ក្រសួងបរិស្ថាន ក្រោមការ ដឹកនាំដ៏ខ្ពង់ខ្ពស់របស់ ឯកឧត្តមបណ្ឌិតរដ្ឋមន្ត្រី អ៊ាង សុផល្លែត រួមមានយុទ្ធនាការ «ថ្ងៃនេះខ្ញុំមិនប្រើថង់ប្លាស្ទិកទេ» យុទ្ធនាការ «ពន្លកបៃតង» និងយុទ្ធនាការ «កម្ពុជាស្អាត ខ្មែរធ្វើបាន» ដែលជាយុទ្ធនាការប្រកបដោយចក្ខុវិស័យ ខ្ពស់ក្នុងការលើកកម្ពស់ ក៏ដូចជាការបណ្តុះផ្នត់គំនិត ប្រជាពលរដ្ឋ យុវជន សិស្សានុសិស្ស ឱ្យចេះស្រឡាញ់ ការពារ ថែរក្សាបរិស្ថានកម្ពុជាឱ្យមាន «ភាពស្អាត» និង«ភាពបៃតង» ក្នុងន័យជំរុញឱ្យប្រទេសកម្ពុជាយើងមាន បរិយាកាសល្អ គុណភាពខ្យល់បរិសុទ្ធ អព្យាក្រឹត្យកាបូន ព្រមទាំងមានការទទួលស្គាល់ពីសំណាក់អន្តរជាតិ និង ជាគំរូល្អ ដល់បណ្តាប្រទេសនានាយកទៅអនុវត្តបន្ត។
ជាការពិតណាស់ ក្នុងរយៈពេលជាង ១៥ខែ កន្លងមក នៃការដាក់ចេញនូវយុទ្ធនាការ និងការអនុវត្តន៍ របស់ក្រសួងបរិស្ថាន អង្គការ(CESO) សូមវាយតម្លៃខ្ពស់ និងកោតសរសើរចំពោះការខិតខំប្រឹងប្រែងរបស់មន្ត្រី គ្រប់ជាន់ថ្នាក់ នៃក្រសួងបរិស្ថាន រួមទាំងថ្នាក់ជាតិ និងថ្នាក់ក្រោមជាតិ ដែលបំពេញភារកិច្ចយ៉ាងសស្រាក់សស្រាំ លើយុទ្ធនាការដែលដាក់ចេញរបស់ក្រសួង គឺពោរពេញដោយការស្រឡាញ់ ស្ម័គ្រចិត្ត រួមចំណែក ជាកោសិកាមួយ នៃជ្រុងបរិស្ថានជាតិ និងសូមកោតសរសើរខ្ពស់ចំពោះ សិស្សានុសិស្ស លោកគ្រូ អ្នកគ្រូ មន្ត្រីរាជការស៊ីវិល កងកម្លាំងទាំងបី ព្រះសង្ឃ កម្មករ កម្មការនី និងប្រជាពលរដ្ឋគ្រប់មូលដ្ឋានទូទាំងប្រទេស កើតមានផ្នត់គំនិតស្ម័គ្រ ចូលរួមអនុវត្តនូវយុទ្ធនាការដូចខាងលើ ដើម្បីចីរភាពបរិស្ថានកម្ពុជានៃយើង។
