ខេត្តកំពង់ធំ÷ ពលរដ្ឋលើកឡើងថា : តើហេតុអ្វីបានជាលោកអធិការស្រុកតាំងគោក បណ្ដែតបណ្ដោយឲ្យមានល្បែងស៊ីសងបើកលេងនៅក្នុងមូលដ្ឋានរបស់ខ្លួនយ៉ាងពពាក់ពពូន ផ្ទុយពីច្បាប់ និងគោលនយោបាយភូមិឃុំមានសុវត្ថិភាព ។
ជាក់ស្តែងទីតាំងល្បែងស៊ីសងអនឡាញខុសច្បាប់ នៅក្នុងភូមិតាព្រៃ ឃុំពង្រ ស្រុកតាំងគោក ខេត្តកំពង់ធំ កំពុងតែបើកដំណើរការឲ្យក្រុមអ្នកញៀនល្បែងចូលលេងយ៉ាងរលូន ហេតុនេះហើយពលរដ្ឋសង្ស័យថាអាជ្ញាធរមូលដ្ឋាន ជាពិសេសលោកវីរៈសេនីយ៍ឯក សន តាល់ អធិការនគបាលស្រុកតាំងគោក បើកដៃឱ្យល្បែងស៊ីសងបើកលេងនៅក្នុងមូលដ្ឋាន ដើម្បីជាផលប្រ យោជន៍ណាមួយ ដែលផ្ទុយពីច្បាប់បង្ក្រាបល្បែងស៊ីសង និង គោលនយោបាយភូមិ-ឃុំមានសុវត្ថិភាព របស់រាជរដ្ឋាភិបាលកម្ពុជា។
គួរបញ្ជាក់ថា ល្បែងស៊ីសងខុសច្បាប់នេះ បណ្តាលឱ្យអ្នកញៀនល្បែង ហិនហោចទ្រព្យសម្បត្តិ កើតជាអំពើហិង្សាក្នុងគ្រួសារ និងជាប្រភពបង្កើតអ្នកញៀនថ្នាំ អំពើចោរកម្ម អសន្តិសុខសង្គមជាដើម។ល។ តើហេតុអ្វីបានជាអាជ្ញាធរ និងសមត្ថកិច្ច នៅឃុំពង្រ ស្រុកតាំងគោក នៅរក្សាភាពស្ងៀមស្ងាត់មិនចុះបង្ក្រាបសោះ.។
ហេតុដូច្នេះប្រជាពលរដ្ឋសង្ឃឹមថា លោកឧត្ដមសេនីយ៍ទោ ហេង សុផល ស្នងការនគរបាលខេត្តកំពង់ធំ នឹងចាត់វិធានការបង្ក្រាបល្បែងស៊ីសងខុសច្បាប់ខាងលើនេះឱ្យបានទាន់ពេលវេលា និងមានប្រសិទ្ធិភាព ដើម្បីរក្សាបាននូវគោលនយោបាយភូមិឃុំមានសុវត្ថិភាពរបស់រាជរដ្ឋាភិបាលកម្ពុជាផងដែរ៕
