ភ្នំពេញ ៖ បុរសមួយក្រុមបានផឹកស៊ីស្រវឹងនិងប្រើហឹង្សាលើស្ដ្រីម្នាក់ជាមេការ ខារ៉ាអូខេ បណ្ដាលឲ្យរងរបួសផ្ទៃមុខ និងភ្នែក នៅក្នុងបន្ទប់ខារ៉ាអូខេ ខណៈពេលនេះស្ដ្រីរងគ្រោះរៀបចំបណ្ដឹងតាមផ្លូវច្បាប់ ស្ថិតនៅត្រង់ណុចខារ៉ាអូខេមួយកន្លែងក្នុងបឹងកក់ ខណ្ឌទួលគោក រាជធានីភ្នំពេញ ក្នុងអំពើហិង្សានោះម្នាក់គេស្គាល់ជាមេបញ្ជាការរងកងរាជអាវុធហត្ថខេត្តសៀមរាប ។
បើយោងតាមប្រភពព័ត៌មានបានឲ្យដឹងថា កាលពីយប់ថ្ងៃទី៧ ខែសីហា ឆ្នាំ២០២៥ វេលាម៉ោង ២១:៣៥ នាទី មានភ្ញៀវមួយក្រុមជិះរថយន្ត Lexus 570 ពណ៌ខ្មៅ ស្លាកលេខ AN-1211 ភ្នំពេញ និង រថយន្ដ Range Rover ពណ៌ខ្មៅមួយគ្រឿងស្លាកលេខ 2BH-1211 ភ្នំពេញ ចូលទៅផឹកស៊ីច្រៀងខារ៉ាអូខេនៅបន្ទប់លេខ ៦៦៦៦ ។ បន្ទាប់ពីផឹកស៊ីស្រវឹង ភ្ញៀវបុរសទាំងនោះបានអុកកែវខ្លាំងបណ្ដាលអោយបែកកញ្ចក់តុកអស់ចំនួន៣។ រហូតដល់ម៉ោងជាង១រំលងអាធ្រាត្រឈានចូលថ្ងៃទី០៨ ខែសីហា ឆ្នាំ២០២៥ ក្រុមភ្ញៀវទាំងនោះហៅគិតលុយ មេការក៏បានគិតលុយទាំងថ្លៃបែកកញ្ចក់៣ សរុបទាំងអស់ជាង ១០០០ ដុល្លារ ។ ដោយឃើញមេការគិតលុយទាំងថ្លៃបែកកញ្ចក់តុក៣ ចំនួន ៤៥០ ដុល្លារ ភ្ញៀវម្នាក់ដែលទំនងជាមេគេ បានទះកំភ្លៀងមេការជាច្រើនដៃរ ហើយនាំគ្នាដើរចេញយ៉ាងសង្ហារដូចគ្នាគ្មានញញើតថាគ្មានអ្វីបានកើតឡើងបន្ដិចសោះឡើយ។
ក្រោយមកមានការឆែកកាំមេរ៉ាទើបឃើញជនទាំងនោះ ហើយម្នាក់ដើរចេញមកមុខគេទំនងជាមេគេទៀតផង និងបើតាមដឹងម្នាក់ដែលដើរមុខគេ ត្រូវបានគេបង្ហើបឲ្យដឹងថា ជាមេបញ្ជារងអាវុធហត្ថខេត្តសៀមរាបទៀតផង ប៉ុន្ដែទោះបីយ៉ាងណាអង្គភាពយើង នឹងប្រឹងព្យាយាមស្រាវជ្រាវបន្ថែមទៀត។
ក្នុងនោះបើតាមការស្រាវជ្រាបរកអត្ដសញ្ញាម្ចាស់គណនីធនាគារទូទាត់លុយ ម្ចាស់ គណនីមានឈ្មោះ ចាន់ គង់ ចំណែកម្ចាស់រថយន្តទាំង២ខាងលើ ត្រូវបានគេស្គាល់ថា ឈ្មោះ ចាន់ ហាក់ រស់នៅផ្ទះភូមិ២ ផ្លូវ ៤២០ សង្កាត់ បឹងត្របែក ខណ្ឌចំការមន រាជធានីភ្នំពេញ។ ខណៈនាពេលនេះជនរងគ្រោះកំពុងរៀបចំពាក្យបណ្ដឹងរកអ្នកបង្ករហឹង្សាដើម្បីសមត្ថកិច្ចចាត់ការបន្ដតាមផ្លូវច្បាប់។
ជុំវិញអំពើហិង្សានេះដែរ នៅថ្ងៃទី៨ ខែសីហា ឆ្នាំ២០២៥ អ្នកនាំពាក្យកងរាជអាវុធហត្ថលើផ្ទៃប្រទេស បានបង្ហោះនៅក្នុងផេកផ្លូវការរបស់អ្នកនាំពាក្យដែលមានខ្លឹមសារថា សូមគោរពជម្រាបជូនសាធារណជន អ្នកសារព័ត៌មាន និងបុគ្គលពាក់ព័ន្ធមេត្តាជ្រាបថា ករណីមេបញ្ជាការរងកងរាជអាវុធហត្ថខេត្តសៀមរាប ឈ្មោះ ចាន់ ឃុង បានប្រើហិង្សាលើស្ត្រីនៅខារ៉ាអូខេ កាលពីយប់មិញនេះ មេបញ្ជាការកងរាជអាវុធហត្ថខេត្តសៀមរាប បាននិងកំពុងធ្វើការត្រួតពិនិត្យ ដើម្បីសុំគោលការណ៍ចាត់វិធានការណ៍បន្ត សូមគោរពជូនជ្រាបជាព័ត៌មាន។
តែទោះជាយ៉ាងនេះអង្គភាពសារព័ត៌មានយើង នឹងរងចាំមើលថា តើស្ដ្រីរងគ្រោះដោយអំពើហិង្សា នឹងទទួលបានយុត្តិធម៌ពីអ្នកមានអំណាចរូបនេះដែរឬទេ។
អង្គភាពសារព័ត៌មានយើង នឹងរង់ចាំទទួលការបកស្រាយពីអ្នកពាក់ព័ន្ធនិងសាម៉ីខ្លួនគ្រប់ពេលវេលា ជុំវិញបញ្ហាចុះផ្សាយខាងលើនេះនៅរៀងរាល់ម៉ោងធ្វើការ ស្តីពីច្បាប់របបនៃសារព័ត៌មានកម្ពុជា សូមអរគុណ!៕
