(ខេត្តកណ្ដាល)៖ ព្រឹកថ្ងៃទី១៧ ខែមីនា ឆ្នាំ២០២៦ ដោយមានការណែនាំ ពីឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល ឯកឧត្តម ណុប ដារ៉ា អភិបាលរងខេត្តកណ្ដាល បានដឹកនាំកិច្ចប្រជុំត្រួតពិនិត្យរៀបចំសន្តិសុខ សណ្តាប់ធ្នាប់តាមតម្រាយផ្លូវជាតិលេខ ១ នៅក្នុងភូមិសាស្ត្រខេត្តកណ្តាល ពីព្រំប្រទល់រាជធានីភ្នំពេញ រហូតដល់ព្រំប្រទល់ ខេត្តព្រៃវែង ដោយបានការអញ្ជើញចូលរួមពីមន្ទីរ-អង្គភាពពាក់ព័ន្ធ អាជ្ញាធរស្រុកកៀនស្វាយ និងអាជ្ញាធរស្រុកលើកដែកផងដែរ។
ឯកឧត្តម ណុប ដារ៉ា អភិបាលរងខេត្តកណ្ដាល បានបញ្ជាក់ថា៖ ដើម្បីដោះស្រាយ នូវបញ្ហាដែលកើតមានឡើងនៅតាមដងផ្លូវ ជាពិសេសការលក់ដូរ ប្រកបរបររកស៊ី និងការរំលោភលើដី ចំណីផ្លូវរបស់បងប្អូនប្រជាពលរដ្ឋ ឯកឧត្តមក៏បានស្នើដល់អាជ្ញាធរពាក់ព័ន្ធទាំងអស់ និងបងប្អូនប្រជាពលរដ្ឋដែលរស់នៅតាមដងផ្លូវ ត្រូវចូលរួមសហការគ្នាក្នុងការរៀបចំសណ្ដាប់ធ្នាប់សាធារណៈ សំដៅធានាបានសោភ័ណ្ឌភាព និងអនាម័យបរិស្ថាន។
ជំរាបជូនផងដែរថា រដ្ឋបាលស្រុកកៀនស្វាយ និងរដ្ឋបាលស្រុកលើកដែក បានធ្វើសេចក្តីជូនដំណឹង ស្តីពីការរៀបចំសណ្តាប់ធ្នាប់ សោភ័ណ្ឌភាព និងរបៀបរៀបរយ នៅតាមបណ្តោយជាតិលេខ១ ក្នុងភូមិសាស្ត្រស្រុកកៀនស្វាយ និងស្រុកលើកដែកផងដែរ។
