(ខេត្តកណ្ដាល)៖ នាដូវក្ដៅនេះ ឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល បានអំពាវនាវដល់ប្រជាពលរដ្ឋ សូមមានការប្រុងប្រយ័ត្នខ្ពស់ចំពោះបញ្ហាគ្រោះអគ្គិភ័យ ដែលអាចកើតមានឡើងនៅគ្រប់ទីកន្លែង និងគ្រប់ពេលវេលា ឱ្យមហន្តរាយដល់ក្រុមគ្រួសារ។
ការអំពាវនាវនេះធ្វើឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការមហាកុដិ និងសមិទ្ធផលនានា ក្នុងវត្តពោធិ៍អង្គម្រេញ ភូមិត្រពាំងស្មាច់ ឃុំម្កាក់ ស្រុកអង្គស្នួល ខេត្តកណ្តាល ក្រោមគណៈធិបតីភាព ឯកឧត្ដម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល នាថ្ងៃទី២៦ ខែមីនា ឆ្នាំ២០២៦។
ឯកឧត្ដម គួច ចំរើន អភិបាលខេត្តកណ្តាល គូសបញ្ជាក់ថា «នាដូវក្ដៅនេះ សូមបងប្អូនប្រជាពលរដ្ឋ មានការប្រុងប្រយ័ត្នខ្ពស់ នៅគ្រប់ទីកន្លែងដែលមានការប្រើប្រាស់ភ្លើង កុំដុតទុកចោល ចេញក្រៅផ្ទះត្រូវបិទចរន្តអគ្គិសនីឱ្យបានត្រឹមត្រូវ មុនចាកចេញទៅខាងក្រៅ ការពារកុំឱ្យមានបញ្ហាគ្រោះអគ្គីភ័យកើតឡើងដែលនាំឱ្យមហន្តរាយដល់ក្រុមគ្រួសារ»។
ឯកឧត្ដម អភិបាលខេត្តកណ្តាល បន្ដថា ដូវក្ដៅនេះ បញ្ហាជំងឺក៏មានការកើតឡើងជាច្រើនផងដែរ សូមប្រជាពលរដ្ឋពិសារទឹកឱ្យបានច្រើន ដើម្បីឱ្យទឹកចូលការពាររាងកាយ និងចូលរួមអនាម័យខ្លួនប្រាណ និងសម្អាតបរិស្ថាននៅជុំវិញផ្ទះ ដើម្បីសុខភាពបានល្អប្រសើរ មិនមានជំងឺដង្កាត់មកយាយីឡើយ។
នាឱកាសនោះ ឯកឧត្ដម គួច ចំរើន អភិបាលខេត្តកណ្ដាល ក៏បានថ្លែងកោតសរសើរដល់គណៈបញ្ជាការឯកភាពរដ្ឋបាលស្រុកអង្គស្នួល និងកងកម្លាំង ពិសេសអធិការដ្ឋាននគរបាលស្រុក បានធ្វើប្រតិបត្តិការរយៈពេលពីរថ្ងៃ ក្នុងការបង្ក្រាបក្រុមចោរប្លន់ធាក់យកម៉ូតូ បានចំនួន ៧នាក់។
ជាមួយគ្នានេះដែរ ឯកឧត្ដម គួច ចំរើន អភិបាលខេត្តកណ្តាល បានជំរុញ និងណែនាំដល់គណៈបញ្ជាការឯកភាពរដ្ឋបាលស្រុកអង្គស្នួល និងកងកម្លាំងទាំងអស់ បន្តខិតខំពង្រីកការស្រាវជ្រាវ តាមបង្ក្រាបក្រុមធាក់ប្លន់យកម៉ូតូឱ្យដល់ឫសគល់ ដើម្បីយកមកផ្ដន្ទាទោសតាមច្បាប់ ឱ្យសាកសមនៅអ្វីដែលពួកគេបានប្រព្រឹត្ត៕
ប្រភព៖ រដ្ឋបាលខេត្តកណ្ដាល
