រាជធានីភ្នំពេញ ៖ កាលពីរសៀលថ្ងៃទី៣១ ខែមីនា ឆ្នាំ២០២៦ លោកបណ្ឌិត ឃីម រដ្ឋា អនុប្រធាន សមាគម វិជ្ជាជីវៈសារព័ត៌មានកម្ពុជា និង ចាងហ្វាងការផ្សាយ គេហទំព័ររដ្ឋារស្មីស្ទឹងត្រង់ និងជា តំណាងលោកបណ្ឌិត ហោ គន្ធា ប្រធានសមាគមបញ្ជីវៈសារព័ត៌មានកម្ពុជា បានដឹកនាំសមាជិក សមាជិកា សហការី តាមបណ្ដារាជធានីខេត្តក្រុង ចំនួន 30 នាក់ អញ្ជើញចូលរួម ពិធីផ្សព្វផ្សាយស្ថានភាពទេសចរណ៍កម្ពុជា នៅក្នុងបរិបទតំបន់ និងពិភពលោក ដែលមានភាពមិនប្រាកដប្រជា ប្រែប្រួលឆាប់រហ័ស និងព័ត៌មានក្លែងក្លាយ ក្រោមអធិបតីភាពដ៏ខ្ពង់ខ្ពស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ដែលបានប្រព្រឹត្តទៅ នៅសាលចតុមុខមង្គល ។
ពិធីនេះមានការអញ្ជើញចូលរួមពីសំណាក់ឯកឧត្តម លោកជំទាវជារដ្ឋលេខាធិកា អនុរដ្ឋលេខាធិការ អគ្គលេខាធិការដ្ឋាន អគ្គនាយក អគ្គនាយិកា ព្រមទាំងថ្នាក់ដឹកនាំក្រសួងព័ត៌មាន និងក្រសួងទេសចរណ៍ សមាគមសារព័ត៌មាន និងអ្នកសារព័ត៌មានជាច្រើនរូប ។
គួរបញ្ជាក់ថា ក្រសួងព័ត៌មាន និងក្រសួងទេសចរណ៍ បានរួមគ្នារៀបចំព្រឹត្តិការណ៍ផ្សព្វផ្សាយមួយដែលបង្ហាញពីស្ថានភាពបច្ចុប្បន្ននៃវិស័យទេសចរណ៍កម្ពុជាក្នុងបរិបទដែលបរិយាកាសតំបន់ និងពិភពលោកកំពុងមានការប្រែប្រួលយ៉ាងឆាប់រហ័ស។ ព្រឹត្តិការណ៍មួយនេះមានគោលដៅផ្សព្វផ្សាយលទ្ធផលនៃការរៀបចំព្រឹត្តិការណ៍បុណ្យទន្លេលើកទី១០ ស្ថានភាពទេសចរណ៍កម្ពុជា និងយុទ្ធសាស្ត្រគន្លឹះរបស់ក្រសួងទេសចរណ៍ ព្រមទាំងយុទ្ធនាការសំខាន់ៗក្នុងឆ្នាំ២០២៦នេះ។
ក្នុងនោះផងដែរ ក្រសួងទេសចរណ៍កម្ពុជាបានគូសបញ្ជាក់ពីយុទ្ធនាការសំខាន់ៗមួយចំនួនសម្រាប់ឆ្នាំ ២០២៦ ដើម្បីទាក់ទាញអ្នកទេសចរ និងបង្កើនភាពទាក់ទាញផ្នែកទេសចរណ៍របស់កម្ពុជា។ យុទ្ធនាការទាំងនោះរួមមាន ការទស្សនាកម្ពុជានៅរដូវបៃតង ចាប់ពីខែឧសភាដល់ខែតុលា និងការលើកលែងទិដ្ឋាការសម្រាប់ពលរដ្ឋចិនរយៈពេល ៤ខែចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ។
ជាមួយគ្នានេះ ក្រសួងទេសចរណ៍កម្ពុជាក៏បានបញ្ជាក់ជាថ្មីក្នុងការរក្សាកេរ្តិ៍ឈ្មោះកម្ពុជាជាគោលដៅទេសចរណ៍សុវត្ថិភាព កក់ក្តៅ ស្អាត និងបៃតងដើម្បីបង្កើនទំនុកចិត្តពីភ្ញៀវទេសចរជាតិ និង អន្តរជាតិឲ្យមកលេងកម្សាន្តនៅកម្ពុជាឱ្យកាន់តែច្រើនថែមទៀត ៕
