ខេត្តព្រៃវែង ៖ នៅថ្ងៃចន្ទ ទី០៨ ខែមិថុនា ឆ្នាំ២០២៦ លោកបណ្ឌិត ឃីម រដ្ឋា ប្រធានចាងហ្វាងការផ្សាយ អង្គភាពព័ត៌មាន រដ្ឋា រស្មីស្ទឹងត្រង់ បានដឹកនាំក្រុមការងារ រួមជាមួយ លោក អ៊ិន យឿន និងលោក ឌុល យ៉េត ទីប្រឹក្សារបស់លោកបណ្ឌិត ហោ គន្ធា ប្រធានអង្គការ «ចីរភាពបរិស្ថានកម្ពុជា» នាំយក អំណោយ សប្បុរសធម៌ ទៅជួយឧបត្ថម្ភ ដល់គ្រួសារប្អូនប្រុស និងប្អូនស្រី ដែលមានជីវភាពខ្វះខាត និងកំពុងសម្រាកព្យាបាលជំងឺនៅមន្ទីរពេទ្យសម្តេចតេជោ ។
អំណោយដែលបានប្រគល់ជូនរួមមាន៖ អង្ករ ២៥ គីឡូក្រាម មី ១ កេស ទឹកសុទ្ធ ១ កេស ទឹកត្រី ទឹកស៊ីអ៊ីវ មុង ១ កន្ទេល ១ ភួយ ១ ធុងដាក់ទឹក ចាន ស្លាបព្រា វែកបាយ វែកសម្ល និងថវិកាចំនួន ១០០,០០០ រៀល។ គ្រួសារទទួលអំណោយមានទីលំនៅក្នុងភូមិប្រហ៊ូត ឃុំព្រៃស្រឡិត ស្រុកពារាំង ខេត្តព្រៃវែង។
ក្នុងឱកាសនោះ លោកបណ្ឌិត ឃីម រដ្ឋា បានមានប្រសាសន៍ថា ការចែករំលែកធនធាន និងការជួយគ្នាក្នុងគ្រាលំបាក គឺជាទង្វើមនុស្សធម៌ដ៏មានតម្លៃ ដែលបង្ហាញពីស្មារតីសាមគ្គីភាព និងការយកចិត្តទុកដាក់ចំពោះប្រជាពលរដ្ឋដែលកំពុងជួបការលំបាក។
ទោះបីអំណោយមិនមានទំហំធំធេងក៏ដោយ ប៉ុន្តែជាកម្លាំងចិត្តមួយក្នុងការជួយសម្រាលបន្ទុក និងលើកទឹកចិត្តដល់គ្រួសារឱ្យមានកម្លាំងចិត្តបន្តព្យាបាល និងរស់នៅប្រចាំថ្ងៃ។
សកម្មភាពសប្បុរសធម៌នេះ បានឆ្លុះបញ្ចាំងពីការចូលរួមចំណែករបស់អង្គភាពព័ត៌មាន រដ្ឋា រស្មីស្ទឹងត្រង់ ក្នុងការងារសង្គម និងការជួយដល់ប្រជាពលរដ្ឋដែលកំពុងជួបការលំបាក ស្របតាមទិសដៅមនុស្សធម៌ និងស្មារតីចែករំលែកក្នុងសង្គមកម្ពុជា។
អង្គភាពព័ត៌មាន រដ្ឋា រស្មីស្ទឹងត្រង់
