ថ្ងៃទី១៧ ខែមិថុនា ឆ្នាំ២០២៦ លោកអភិបាលស្រុកកូនមុំ រួមជាមួយលោកអធិការនគរបាលស្រុកកូនមុំ លោក សាធ គន្ធា កងកម្លាំងយោធាប្រចាំស្រុកកូនមុំ លោក នឹត សុភ័ក្ត្រ មន្ត្រីរដ្ឋបាលព្រៃឈើស្រុកកូនមុំ មន្ត្រីមន្ទីរបរិស្ថានខេត្តរតនគិរី អនុប្រធានអង្គការចីរភាពបរិស្ថានប្រចាំខេត្តរតនគិរី ព្រមទាំងអាជ្ញាធរមូលដ្ឋាន មេឃុំ និងមេភូមិ បានចុះប្រតិបត្តិការរួមគ្នាវាយបំផ្លាញឡធ្យូងខុសច្បាប់មួយចំនួន ដែលស្ថិតនៅតំបន់ជាប់ព្រំប្រទល់រវាងខេត្តរតនគិរី និងខេត្តស្ទឹងត្រែង។
ប្រតិបត្តិការនេះធ្វើឡើងក្នុងគោលបំណងទប់ស្កាត់ និងបង្ក្រាបបទល្មើសធនធានធម្មជាតិ ជាពិសេសសកម្មភាពកាប់បំផ្លាញព្រៃឈើ និងការផលិតធ្យូងដោយខុសច្បាប់ ដែលបង្កផលប៉ះពាល់យ៉ាងធ្ងន់ធ្ងរដល់បរិស្ថាន និងធនធានព្រៃឈើរបស់ជាតិ។
ក្នុងពេលចុះប្រតិបត្តិការ ក្រុមការងារចម្រុះបានធ្វើការត្រួតពិនិត្យទីតាំងជាក់ស្តែង រកឃើញឡធ្យូងមួយចំនួនដែលត្រូវបានសាងសង់ និងដំណើរការដោយគ្មានការអនុញ្ញាតពីស្ថាប័នជំនាញ។ ជាលទ្ធផល សមត្ថកិច្ច និងមន្ត្រីជំនាញបានធ្វើការវាយកម្ទេច និងបំផ្លាញឡធ្យូងទាំងនោះ ដើម្បីបញ្ឈប់ការប្រើប្រាស់ និងទប់ស្កាត់ការប្រព្រឹត្តបទល្មើសបន្តទៀត។
ថ្នាក់ដឹកនាំ និងមន្ត្រីពាក់ព័ន្ធបានអំពាវនាវដល់ប្រជាពលរដ្ឋទាំងអស់ឱ្យចូលរួមថែរក្សា និងការពារធនធានធម្មជាតិ ជាពិសេសព្រៃឈើ ដែលជាសម្បត្តិរួមរបស់ជាតិ ព្រមទាំងជៀសវាងការចូលរួម ឬគាំទ្រសកម្មភាពណាមួយដែលបង្កការបំផ្លាញបរិស្ថាន និងផ្ទុយពីច្បាប់ជាធរមាន។
ប្រតិបត្តិការនេះបានបង្ហាញពីការប្តេជ្ញាចិត្តរបស់អាជ្ញាធរ កងកម្លាំងមានសមត្ថកិច្ច មន្ត្រីជំនាញ និងអង្គការដៃគូ ក្នុងការរួមគ្នាការពារ និងអភិរក្សធនធានធម្មជាតិ សំដៅធានាការប្រើប្រាស់ធនធានប្រកបដោយនិរន្តរភាព និងទុកជាមរតកដល់កូនចៅជំនាន់ក្រោយ ៕
