ខេត្តកោះកុង ៖ បើទោះបីជាប្រមុខរាជរដ្ឋាភិបាលបានដាក់ចេញនូវគោលការណ៍ និងបទបញ្ជាណែនាំយ៉ាងតឹងរ៉ឹង ដើម្បីទប់ស្កាត់ការរំលោភបំពានលើទ្រព្យសម្បត្តិសាធារណៈរបស់រដ្ឋយ៉ាងណាក៏ដោយ ក៏នៅតែមានបុគ្គលមួយចំនួនបន្តធ្វើសកម្មភាពរំលោភយកដីសាធារណៈ ដោយមិនញញើតចំពោះច្បាប់នោះឡើយ។
ជាក់ស្តែង នៅរសៀលថ្ងៃទី១៤ ខែមិថុនា ឆ្នាំ២០២៦ ប្រជាពលរដ្ឋបានប្រទះឃើញសកម្មភាពរថយន្តដឹកដីជាច្រើនគ្រឿង ធ្វើការដឹកជញ្ជូន និងចាក់ដីលុបឆ្នេរសមុទ្រយ៉ាងសកម្ម នៅក្នុងភូមិសាស្ត្រភូមិនេសាទ ឃុំជ្រោយស្វាយ ស្រុកស្រែអំបិល ខេត្តកោះកុង។ សកម្មភាពនេះ បានបង្កឱ្យប្រជាពលរដ្ឋក្នុងមូលដ្ឋានមានការព្រួយបារម្ភយ៉ាងខ្លាំង ដោយសារតែតំបន់ឆ្នេរសមុទ្រ គឺជាទ្រព្យសម្បត្តិសាធារណៈរបស់រដ្ឋ និងជាប្រភពធនធានធម្មជាតិដ៏សំខាន់សម្រាប់សហគមន៍មូលដ្ឋាន។
តាមការលើកឡើងរបស់ប្រជាពលរដ្ឋ សកម្មភាពចាក់ដីលុបឆ្នេរនេះ ត្រូវបានសង្ស័យថា មានគោលបំណងរំលោភយកដីសាធារណៈរបស់រដ្ឋ ដើម្បីធ្វើជាកម្មសិទ្ធិឯកជន។
ករណីនេះអាចបង្កផលប៉ះពាល់ដល់បរិស្ថាន ធនធានធម្មជាតិ និងសិទ្ធិប្រើប្រាស់រួមរបស់ប្រជាពលរដ្ឋនៅក្នុងតំបន់។
ប្រជាពលរដ្ឋដែលរស់នៅក្នុងមូលដ្ឋាន សូមអំពាវនាវដល់លោកអភិបាលស្រុកស្រែអំបិល និងលោកជំទាវអភិបាលខេត្តកោះកុង មេត្តាចាត់វិធានការតាមផ្លូវច្បាប់ និងបញ្ជាឱ្យមន្ត្រីជំនាញចុះស្រាវជ្រាវឱ្យបានច្បាស់លាស់ ដើម្បីស្វែងរកបុគ្គល ឬក្រុមហ៊ុនដែលពាក់ព័ន្ធនឹងសកម្មភាពចាក់ដីរំលោភយកឆ្នេរសមុទ្រខាងលើ និងអនុវត្តវិធានការតាមច្បាប់ឱ្យបានតឹងរ៉ឹង។
ប្រជាពលរដ្ឋក៏សង្ឃឹមថា អាជ្ញាធរពាក់ព័ន្ធនឹងយកចិត្តទុកដាក់ដោះស្រាយបញ្ហានេះឱ្យបានឆាប់រហ័ស ដើម្បីការពារទ្រព្យសម្បត្តិសាធារណៈរបស់រដ្ឋ និងរក្សាធនធានធម្មជាតិសម្រាប់ផលប្រយោជន៍រួមរបស់ប្រជាពលរដ្ឋ។
លេខទំនាក់ទំនង៖
០៦៩ ២៥៤ ៧៤៧
០៧៦ ៤៤៤ ៤៣៧៣
