ខេត្តកំពង់ស្ពឺ៖ ស្មារតីសាមគ្គីភាព និងការរួមសហការគ្នាដើម្បីផលប្រយោជន៍សហគមន៍ ត្រូវបានបង្ហាញយ៉ាងច្បាស់តាមរយៈយុទ្ធនាការសម្អាតបរិស្ថាន និងកាប់ព្រៃរំដោះមុខទឹក ដែលបានប្រព្រឹត្តទៅនៅថ្ងៃទី២១ ខែមិថុនា ឆ្នាំ២០២៦ ស្ថិតនៅចំណុចផ្លូវលេខ១៣៥ ក្នុងភូមិព្រៃស្មាច់ ឃុំព្រៃវិហារ ស្រុកកងពិសី ខេត្តកំពង់ស្ពឺ។
យុទ្ធនាការនេះ ត្រូវបានរៀបចំឡើងដោយសាខាអង្គការជ័យភាពបរិស្ថានកម្ពុជាប្រចាំខេត្តកំពង់ស្ពឺ សហការជាមួយអាជ្ញាធរមូលដ្ឋាន និងប្រជាពលរដ្ឋក្នុងតំបន់ ដោយមានគោលបំណងកាប់សម្អាតព្រៃដុះរំខាន និងរំដោះមុខទឹក ដើម្បីសម្រួលដល់ការហូរទឹក កាត់បន្ថយការជន់លិច និងលើកកម្ពស់បរិស្ថានឱ្យមានភាពស្អាតល្អ។
សកម្មភាពនេះ ដឹកនាំដោយលោក អូច សុខអាន ប្រធានសាខាអង្គការជ័យភាពបរិស្ថានកម្ពុជាប្រចាំខេត្តកំពង់ស្ពឺ រួមជាមួយលោក យម រិន អនុប្រធាន លោក ហាក់នី សមាជិក និងក្រុមការងារជាច្រើនរូប។ ក្នុងនោះដែរ ក៏មានការចូលរួមយ៉ាងសកម្មពីលោក ម៉ិញ សាវឿន មេភូមិព្រៃស្មាច់ សមាជិកក្រុមប្រឹក្សាឃុំព្រៃវិហារ អាជ្ញាធរមូលដ្ឋាន និងប្រជាពលរដ្ឋជាច្រើននាក់ ដែលបានស្ម័គ្រចិត្តលះបង់ទាំងកម្លាំងកាយ និងកម្លាំងចិត្ត ដើម្បីរួមចំណែកអភិវឌ្ឍន៍សហគមន៍របស់ខ្លួន។
ជាលទ្ធផល ក្រុមការងារបានកាប់សម្អាតព្រៃ និងរំដោះមុខទឹកបានប្រវែងប្រមាណ ២៥០ម៉ែត្រ ដែលបានជួយសម្រួលដល់ការហូរទឹក និងធ្វើឱ្យបរិស្ថាននៅក្នុងភូមិព្រៃស្មាច់មានសោភ័ណភាព និងអនាម័យកាន់តែល្អប្រសើរ។
អាជ្ញាធរមូលដ្ឋាន និងអង្គការជ័យភាពបរិស្ថានកម្ពុជា បានថ្លែងអំណរគុណចំពោះការចូលរួមរបស់ប្រជាពលរដ្ឋទាំងអស់ និងបានអំពាវនាវឱ្យបន្តថែរក្សាបរិស្ថាន សម្អាតអនាម័យ និងរួមគ្នាការពារធនធានធម្មជាតិ ដើម្បីផលប្រយោជន៍រួមរបស់សហគមន៍។
ក្នុងឱកាសនេះដែរ ក្រុមការងារអង្គការជ័យភាពបរិស្ថានកម្ពុជា អាជ្ញាធរភូមិ-ឃុំ ក្រុមប្រឹក្សាឃុំ និងប្រជាពលរដ្ឋទាំងអស់ សូមជូនពរបងប្អូនប្រជាពលរដ្ឋគ្រប់រូប សូមជួបប្រទះតែសេចក្តីសុខ សេចក្តីចម្រើន មានសុខភាពល្អ និងជោគជ័យគ្រប់ភារកិច្ចតរៀងទៅ។ សូមអរគុណ។
