ភ្នំពេញ៖ ដោយមានការយកចិត្តទុកដាក់ខ្ពស់ចំពោះសុខុមាលភាព និងការធ្វើដំណើររបស់ប្រជាពលរដ្ឋ លោក សន ស៊ិន ចៅសង្កាត់គោករកា បានចាត់តាំងលោក រឿន សូម៉ានីន ប្រធានប្រជាការពារសង្កាត់ ដឹកនាំកម្លាំងប្រជាការពារសង្កាត់ ចុះអនុវត្តការងារបន្ទាន់នៅក្នុងមូលដ្ឋាន បន្ទាប់ពីមានភ្លៀងធ្លាក់ខ្លាំង នារសៀលថ្ងៃទី ២៨ ខែកញ្ញា ឆ្នាំ២០២៦។
ក្នុងប្រតិបត្តិការនេះ កម្លាំងប្រជាការពារសង្កាត់បានចុះពិនិត្យតាមដងផ្លូវ តំបន់ប្រឡាយ និងតាមមាត់លូដែលមានសភាពកកស្ទះដោយសារសំរាម និងកាកសំណល់ដែលហូរតាមទឹកភ្លៀង។ ការកកស្ទះទាំងនេះបានធ្វើឱ្យទឹកភ្លៀងមួយចំនួនហូរយឺត និងបង្កការដក់ទឹកនៅតាមផ្លូវក្នុងមូលដ្ឋាន។
ដើម្បីដោះស្រាយបញ្ហានេះ កម្លាំងប្រជាការពារបានចុះ យកសំរាម និងកាកសំណល់ចេញពីមាត់លូ ប្រឡាយ និងកន្លែងដែលមានការកកស្ទះ ព្រមទាំងសម្រួលផ្លូវទឹក ដើម្បីឱ្យទឹកភ្លៀងអាចហូរចេញបានលឿន និងមានប្រសិទ្ធភាព។
សកម្មភាពនេះ គឺជាការងារប្រចាំក្នុងការថែរក្សាអនាម័យ បរិស្ថាន និងសណ្តាប់ធ្នាប់សាធារណៈ ពិសេសក្នុងរដូវវស្សា ដែលអាចមានភ្លៀងធ្លាក់ខ្លាំង និងបង្កឱ្យមានទឹកដក់ ឬទឹកលិចតាមតំបន់មួយចំនួន ប្រសិនបើប្រព័ន្ធលូ និងប្រឡាយមានការកកស្ទះ។
ការចុះអន្តរាគមន៍បានជួយសម្រួលដល់លំហូរទឹកភ្លៀង កាត់បន្ថយការដក់ទឹកលើផ្លូវ និងជួយសម្រួលដល់ការធ្វើដំណើររបស់បងប្អូនប្រជាពលរដ្ឋដែលរស់នៅ និងធ្វើដំណើរឆ្លងកាត់ក្នុងមូលដ្ឋានសង្កាត់គោករកា ខណ្ឌព្រែកព្នៅ រាជធានីភ្នំពេញ។
លោក សន សុិន ចៅសង្កាត់គោករកា តែងយកចិត្តទុកដាក់លើការងារសម្អាតបរិស្ថាន សណ្តាប់ធ្នាប់សាធារណៈ និងការដោះស្រាយបញ្ហាដែលប៉ះពាល់ដល់ជីវភាពប្រចាំថ្ងៃរបស់ប្រជាពលរដ្ឋ ជាពិសេសការរៀបចំប្រព័ន្ធបង្ហូរទឹក និងការបង្ការការកកស្ទះក្នុងមូលដ្ឋាន។
ជាមួយគ្នានេះ អាជ្ញាធរសង្កាត់គោករកា ក៏បានអំពាវនាវដល់ប្រជាពលរដ្ឋទាំងអស់ សូមចូលរួមថែរក្សាអនាម័យ និងបរិស្ថាន ដោយមិនត្រូវបោះសំរាមចូលប្រឡាយ ប្រព័ន្ធលូ ឬតាមមាត់លូ ព្រោះសំរាមអាចបង្កការកកស្ទះប្រព័ន្ធបង្ហូរទឹក និងបង្កឱ្យមានទឹកដក់ ឬទឹកលិចផ្លូវនៅពេលមានភ្លៀងធ្លាក់ខ្លាំង។
សកម្មភាពរបស់កម្លាំងប្រជាការពារសង្កាត់នៅរសៀលថ្ងៃនេះ បានបង្ហាញពីការយកចិត្តទុកដាក់របស់អាជ្ញាធរសង្កាត់ ក្នុងការឆ្លើយតបចំពោះបញ្ហាប្រឈមជាក់ស្តែង និងការចូលរួមថែរក្សាសណ្តាប់ធ្នាប់ អនាម័យ និងបរិស្ថាន ដើម្បីរួមចំណែកធ្វើឱ្យមូលដ្ឋានសង្កាត់គោករកា មានសុវត្ថិភាព ស្អាត និងមានភាពងាយស្រួលសម្រាប់ការរស់នៅរបស់ប្រជាពលរដ្ឋ ៕
