ខេត្តកណ្ដាល៖ នាព្រឹកថ្ងៃសុក្រ ទី៦ ខែវិច្ឆិកា ឆ្នាំ២០២៦ លោក ម៉ៅ ហ៊ាន បានបង្ហាញនូវទឹកចិត្តសប្បុរសធម៌ដ៏ប្រពៃ ដោយបានឧបត្ថម្ភថវិកាមួយចំនួនសម្រាប់ទិញកង់ និងសម្ភារៈសិក្សាមួយចំនួន ជូនដល់កូនៗរបស់លោក សុវណ្ណរាជ រតនា ដែលកំពុងសិក្សានៅសាលាបឋមសិក្សាព្រៃធំ ស្ថិតក្នុងភូមិព្រៃធំ ឃុំសន្លុង ស្រុកខ្សាច់កណ្ដាល ខេត្តកណ្ដាល។
ការឧបត្ថម្ភនេះ ត្រូវបានធ្វើឡើងតាមរយៈលោកបណ្ឌិត ឃីម រដ្ឋា អគ្គនាយកអង្គភាពសារព័ត៌មាន រដ្ឋារស្មីស្ទឹងត្រង់ ដើម្បីចូលរួមចែករំលែកក្តីស្រឡាញ់ ការយកចិត្តទុកដាក់ និងក្តីអាណិតអាសូរចំពោះក្រុមគ្រួសារដែលកំពុងជួបប្រទះការខ្វះខាតក្នុងជីវភាព ជាពិសេសការលំបាកក្នុងការផ្គត់ផ្គង់មធ្យោបាយធ្វើដំណើរ និងសម្ភារៈចាំបាច់សម្រាប់ការសិក្សារបស់កូនៗ។
ទឹកចិត្តដ៏ថ្លៃថ្លានេះ បានកើតចេញពីការយកចិត្តទុកដាក់របស់លោក ម៉ៅ ហ៊ាន បន្ទាប់ពីបានឃើញពីស្ថានភាពខ្វះខាតរបស់លោក សុវណ្ណរាជ រតនា ដែលមានតម្រូវការថវិកាដើម្បីទិញកង់ជូនកូនៗ សម្រាប់ធ្វើដំណើរទៅសាលារៀន ព្រមទាំងសម្ភារៈសិក្សាដែលជាតម្រូវការចាំបាច់ក្នុងការសិក្សារៀនសូត្រ។
សកម្មភាពមនុស្សធម៌នេះ មិនត្រឹមតែជាការជួយសម្រាលបន្ទុកជីវភាពគ្រួសារប៉ុណ្ណោះទេ ប៉ុន្តែថែមទាំងជាការលើកទឹកចិត្តដល់កុមារឱ្យខិតខំប្រឹងប្រែងរៀនសូត្រ មានក្តីសង្ឃឹម និងបន្តដំណើរទៅរកអនាគតដ៏ល្អប្រសើរផងដែរ។
ជាមួយគ្នានេះ លោកបណ្ឌិត ឃីម រដ្ឋា ក៏បានសម្ដែងនូវការថ្លែងអំណរគុណយ៉ាងជ្រាលជ្រៅចំពោះលោក ម៉ៅ ហ៊ាន ដែលមានទឹកចិត្តសប្បុរសធម៌ ចេះជួយយកអាសាអ្នកជួបការលំបាក និងចូលរួមចំណែកក្នុងការលើកកម្ពស់វិស័យអប់រំតាមរយៈការជួយដល់កុមារដែលមានតម្រូវការចាំបាច់។
សកម្មភាពចែករំលែកនេះ គឺជាគំរូដ៏ល្អនៃការចូលរួមជួយគ្នាក្នុងសង្គម និងបង្ហាញឱ្យឃើញថា ទឹកចិត្តសប្បុរសធម៌ ទោះតិចឬច្រើនក្តី ក៏អាចបង្កើតស្នាមញញឹម និងផ្តល់ក្តីសង្ឃឹមដល់អ្នកដែលកំពុងជួបការលំបាកបានដែរ។
សូមគោរពជូនពរលោក ម៉ៅ ហ៊ាន សូមមានសុខភាពល្អបរិបូរណ៍ សេចក្ដីសុខ សុភមង្គល និងទទួលបានជោគជ័យគ្រប់ភារកិច្ច ព្រមទាំងបន្តទទួលបានពរជ័យក្នុងការប្រកបកិច្ចការសប្បុរសធម៌ជានិច្ច។








