បាត់ដំបង ៖ នា ថ្ងៃទី១៦ ខែកញ្ញា ឆ្នាំ២០២៣ ក្នុងពិធីប្រកាសតែងតាំងថ្នាក់ដឹកនាំ និងសមាជិក សមាជិកា សមាគមរាជសីហ៍ នៅសាខាខេត្តបាត់ដំបង បាត់ដំបង ឯកឧត្តម ស៊ូម សារឿន អនុរដ្ឋលេខាធិការក្រសួងមុខងារសាធារណៈ និងជាប្រធានសមាគមរាជសីហ៍ បានថ្លែងថា សម្រាប់កិច្ចប្រជុំ នៅប្រទេសឥណ្ឌូនេស៊ី ដែលបានបិទបញ្ចប់ កាលពីពេលថ្មីៗកន្លងទៅ សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាននាំនូវភាពជោគជ័យដ៏ត្រចះត្រចង់ និងផ្លែផ្កា ជូនជាតិមាតុភូមិ ។
ឯកឧត្តម ស៊ូម សារឿន បានថ្លែងចូលរួមអបអរសាទរយ៉ាងក្លៀវក្លា ចំពោះជ័យជំនះ នយោបាយ ការទូតនិងសេដ្ឋកិច្ច ដ៏ត្រចះត្រចង់ របស់សម្ដេចធិបតី នាយករដ្ឋមន្ត្រី នៅទីក្រុងហ្សាការតា ប្រទេសឥណ្ឌូនេស៊ី នៅក្នុងកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធដទៃទៀត ដែលបានបិទបញ្ចប់ កាលពីថ្ងៃ ទី៧ ខែកញ្ញា ឆ្នាំ ២០២៣ កន្លងទៅ ដែលក្នុងនោះ សម្តេចធិបតី នាយករដ្ឋមន្ត្រី បានជួបប្រជុំទ្វេរភាគីដោយឡែកពីក្របខណ្ឌអាស៊ាន និងកិច្ចប្រជុំផ្សេងៗទៀត សរុបជាង៣០ជាមួយប្រមុខរដ្ឋ ប្រមុខរាជរដ្ឋាភិបាល ព្រមទាំងមេដឹកនាំកំពូលៗ នៃបណ្តាស្ថាប័នក្នុងតំបន់និងអន្តរជាតិ មកពីគ្រប់ទិសទី នៃពិភពលោក មានជាអាទិ៍ ប្រទេសចិន កូរ៉េខាងត្បូង ជប៉ុន ឥណ្ឌា អាមេរិក កាណាដា អូស្ត្រាលី និងណូវែលហ្សេឡង់ មិនតិចជាង២០នាក់នោះឡើយ។
ឯកឧត្តមបន្តថា ក្នុងជំនួបនោះផងដែរ សម្តេចជិបតី នាយករដ្ឋមន្ត្រី បានបង្ហាញសារ ដ៏មានសារៈសំខាន់មួយទៅកាន់ តំបន់ និងពិភពលោកនៅលើវេទិកា នៃកិច្ចប្រជុំកំពូលអាស៊ាន អាស៊ានបូកអាស៊ីបូព៌ា និងនៅលើវេទិកាដទៀតថា “សង្គ្រាមមិនអាចបញ្ចប់ដោយសង្គ្រាមឡើយ និងគ្មានការអភិវឌ្ឍណា ដែលអាចកើតមានឡើង បើគ្មានសុខសន្តិភាព ពេលលេញនោះទេ”។
នេះជាស្មារតី នៃការផ្ដល់ប្រយោជន៍ដល់គ្នាទៅវិញទៅមក ដើម្បីសន្តិភាព និងការអភិវឌ្ឍ ដែល ជាមេរៀនទាញចេញពីបទពិសោធន៍ជាក់ស្ដែង នៃសោកនាដកម្ម ១,០០០ជំពូករបស់កម្ពុជា ហើយនេះក៏ជាសារនៃបណ្តាប្រទេសជាច្រើនលើសកលលោក ជាពិសេសបណ្តាប្រទេសខ្សត់ខ្សោយចង់លឺ ខណៈដែលសង្គ្រាមអ៊ុយក្រែន និងវិបត្តិនៅប្រទេសភូមា ជាដើម បន្តអូសបន្លាយ និង ស្ថានភាពភូមិសាស្ត្រនយោបាយ នៃតំបន់អាស៊ី-ប៉ាស៊ីហ្វិក កាន់តែតានតឹងឡើងជាលំដាប់ ៕
