នាថ្ងៃទី១ ខែវិច្ឆិកា ឆ្នាំ២០២៦ ក្នុងឱកាសបើកបវេសនកាលឆ្នាំសិក្សាថ្មី វិទ្យាល័យ ហ៊ុន សែន ពាមកោះស្នា បានរៀបចំកម្មវិធីចែកប័ណ្ណសរសើរជូនដល់សិស្សានុសិស្សដែលមានស្នាដៃសិក្សាល្អ និងទទួលបានលទ្ធផលខ្ពស់ក្នុងការសិក្សា ដើម្បីជាការលើកទឹកចិត្ត និងជំរុញឱ្យប្អូនៗបន្តខិតខំប្រឹងប្រែងរៀនសូត្រឱ្យកាន់តែពូកែថែមទៀត។
ក្នុងកម្មវិធីនេះ ប័ណ្ណសរសើរត្រូវបានប្រគល់ជូនដល់សិស្សានុសិស្សដែលបានប្រឡងជាប់និទ្ទេសល្អនៅថ្នាក់ទី៩ ព្រមទាំងសិស្សដែលទទួលបានចំណាត់ថ្នាក់លេខ១ ដល់លេខ៥ នៅថ្នាក់ទី៧ ទី៨ ទី១០ និងទី១១ ដែលសុទ្ធសឹងជាសិស្សមានសមត្ថភាព និងការខិតខំប្រឹងប្រែងក្នុងការសិក្សារៀនសូត្រ។
ការរៀបចំកម្មវិធីនេះ គឺជាការបង្ហាញពីការយកចិត្តទុកដាក់របស់គណៈគ្រប់គ្រងសាលា និងលោកគ្រូ អ្នកគ្រូ ក្នុងការលើកកម្ពស់គុណភាពអប់រំ ការជំរុញស្មារតីប្រកួតប្រជែងក្នុងការសិក្សា ព្រមទាំងបង្កើតវប្បធម៌សរសើរ និងផ្តល់តម្លៃចំពោះសិស្សដែលមានស្នាដៃល្អ។
ជាមួយគ្នានេះ ការផ្តល់ប័ណ្ណសរសើរដល់សិស្សពូកែ ក៏ជាកម្លាំងចិត្តដ៏សំខាន់សម្រាប់ប្អូនៗដែលទទួលបានជោគជ័យ ឱ្យបន្តរក្សាសមិទ្ធផល និងអភិវឌ្ឍសមត្ថភាពរបស់ខ្លួន ខណៈដែលសិស្សានុសិស្សដទៃទៀតក៏អាចយកគំរូតាម ដោយខិតខំរៀនសូត្រ គោរពវិន័យ និងមានការតាំងចិត្តខ្ពស់ ដើម្បីទទួលបានលទ្ធផលល្អនាពេលអនាគត។
កម្មវិធីនេះក៏បានបង្ហាញពីសារៈសំខាន់នៃកិច្ចសហការរវាងសាលារៀន លោកគ្រូ អ្នកគ្រូ អាណាព្យាបាល និងសិស្សានុសិស្ស ក្នុងការរួមគ្នាលើកកម្ពស់វិស័យអប់រំ និងបណ្តុះធនធានមនុស្សប្រកបដោយចំណេះដឹង សមត្ថភាព សីលធម៌ និងគុណធម៌ សម្រាប់សង្គមជាតិ។
ក្នុងឱកាសបើកបវេសនកាលឆ្នាំសិក្សាថ្មីនេះ សូមជូនពរដល់គណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្សទាំងអស់ ទទួលបានជោគជ័យក្នុងការបំពេញភារកិច្ច និងការសិក្សារៀនសូត្រគ្រប់ៗគ្នា ៕
