(ខេត្តកែប)៖ ដីព្រៃកោងកាងដែលគ្រប់គ្រងដោយមន្ត្រីជលផល ស្ថិតក្នុងភូមិសាស្ត្រឃុំអង្កោល ស្រុកដំណាក់ចង្អើរ ខេត្តកែប ចំណុចមុខខ្លោងទ្វារវត្តអង្កោល នៃដងផ្លូវលេខ(១៣៣២) ត្រូវបានគេលួចកាប់ទន្ទ្រានប្រមាណជិត៥ហិកតា។ចំពោះការកាប់ទន្ទ្រានយកដីរបស់រដ្ឋដោយពុំខ្លាចញញើតបែបនេះ គេពុំទាន់ដឹងថាអាជ្ញាធរ និងជំនាញដោះស្រាយដោយវិធីណាទេ ខណៈអភិបាលស្រុកដំណាក់ចង្អើរទម្លាយថា ដីព្រៃកោងកាងដែលគេកាប់ឆ្ការនេះ មានប្លង់កម្មសិទ្ធិរួចទៅហើយនោះ។
ជុំវិញការកាប់ទន្ទ្រានដីព្រៃលិចទឹកខាងលើ លោកស្រី គឹម ចន្នី អភិបាលស្រុកដំណាក់ចង្អើរ បានទម្លាយប្រាប់អ្នកសារព័ត៌មានថា ដីនេះមានប្លង់កម្មសិទ្ធិរួចទៅហើយ ហើយប្លង់នេះបានចេញកាលពីឆ្នាំ២០០៧ កាន់កាប់ដោយម្ចាស់ពីរនាក់ ទី១-ឈ្មោះ វង់ គឹមហាន និងទី២ឈ្មោះ កែវ មុំ។ លោកស្រីអភិបាលស្រុកបានប្រាប់ទៀតថា ប្លង់កម្មសិទ្ធិដីព្រៃកោងកាងខាងលើចេញនៅឆ្នាំ២០០៧ ចំណែកខាងជលផលគឺបានទៅកំណត់ដីជលផលនៅឆ្នាំ២០០៩ បានន័យថា មុន ក្រោយគ្នាពីរឆ្នាំ ចឹងម្ចាស់ប្លង់គេមានសិទ្ធិកាប់ឆ្ការហើយ..?។
ដោយឡែក លោក ចក់ សុីនាថ ជាមន្ត្រីជលផលខេត្តកែប ដ៏សកម្មម្នាក់ ទម្លាយប្រាប់អ្នកសារព័ត៌មាននៅថ្ងៃដដែលថា ទីតាំងដីព្រៃលិចទឹកដែលគេកាប់វាទទន្ទ្រាននេះ ជាដីព្រៃកោងកាងសំបូរទៅដោយជីវចម្រុះគ្រប់ប្រភេទ គ្រប់គ្រងដោយមន្ត្រីជលផល ប៉ុន្តែពេលនេះស្រាប់តែមានគេកាបឆ្ការអស់ជិត៥ហិកតាទៅហើយ។លោកថា ចំពោះបញ្ហាខាងលើ លោកនឹងធ្វើរបាយការណ៍ជូនថ្នាក់លើ ដើម្បីចាត់វិធានការតាមផ្លូវច្បាប់។
ទោះជាបែបណា ករណីកាប់ទន្ទ្រានដីព្រៃលិចទឹកដែលជាជម្រកមច្ឆាគ្រប់ប្រភេទក្នុងដែនសមត្ថកិច្ចរបស់មន្ត្រីជំនាញ តែត្រូវអាជ្ញាធរដែនដីអះអាងថា មានប្លង់កម្មសិទ្ធិរួចទៅហើយនោះ មហាជនបាននិងកំពុងរង់ចាំមើលថា តើថ្នាក់លើរកមធ្យោបាយយ៉ាងណា សម្រាប់ដោះស្រាយដើម្បីបញ្ចប់ការរិះគន់ពីសំណាក់មជ្ឈដ្ឋាន៕ សេង ណារិទ្ធ
