(ភ្នំពេញ)៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បាន លើកទឹកចិត្តដល់មន្ត្រីរាជការ និងប្រជាពលរដ្ឋដែលមានសុខភាព ល្អ សូមចូលរួមបរិច្ចាគឈាម ទាំងអស់គ្នា ចំពោះការបរិច្ចាគឈាម នេះ ប៉ុន្តែ មិនមែនត្រឹមតែជាសកម្មភាពមនុស្សធម៌តែមួយប៉ុណ្ណោះទេ ជាការធ្វើបុណ្យមួយដ៏មានសទ្ធាជ្រះថ្លា ដើម្បីជួយសង្គ្រោះ ជីវិតអ្នកជំងឺដែលកំពុងត្រូវការឈាមជាចាំបាច់។
ការលើកទឹកចិត្តបែបនេះ របស់ឯកឧត្តម នេត្រ ភក្ត្រា បាន ធ្វើឡើងនៅនៅព្រឹកថ្ងៃទី១ ខែកក្កដា ឆ្នាំ២០២៥នេះ ក្នុងឱកាស ដែលឯកឧត្តម និងលោកជំទាវ ទុយ សិរីរតនៈ នេត្រភក្ត្រា ប្រធាន កិត្តិយសសមាគមនារីកម្ពុជាដើម្បីសន្តិភាព និងអភិវឌ្ឍន៍ សាខា ក្រសួងព័ត៌មាន បានដឹកនាំមន្ត្រីរាជការគ្រប់លំដាប់ថ្នាក់នៃ ក្រសួងព័ត៌មាន រួមគ្នាបរិច្ចាគឈាម ក្រោមប្រធានបទ «មន្ត្រី ក្រសួងព័ត៌មាន រួមគ្នាបរិច្ចាគឈាម ដើម្បីជួយសង្គ្រោះជីវិត មនុស្ស»។ ការបរិច្ចាគឈាមធ្វើឡើងនៅក្នុងគោលបំណងចូលរួម ចំណែកក្នុងសកម្មភាពមនុស្សធម៌។
ឯកឧត្តម នេត្រ ភក្ត្រា បានថ្លែងថា បុគ្គលដែលបានផ្តល់ឈាម ជួយសង្គ្រោះអាយុជីវិតមនុស្ស គឺមានអារម្មណ៍ជ្រះថ្លា ហើយការ បរិច្ចាគឈាម មិនមែនត្រឹមជាការងារមនុស្សធម៌នោះទេ ប៉ុន្តែ ជា ការលះបង់សាច់ស្រស់ ឈាមស្រស់ ដើម្បីយកទៅជួយសង្គ្រោះ អាយុជីវិតមនុស្សបាន។
ជាមួយគ្នានេះដែរ ឯកឧត្តម នេត្រ ភក្ត្រា បានបន្ថែមថា ការផ្តល់ ឈាម ជាការធ្វើបុណ្យមួយដ៏មានសទ្ធាជ្រះថ្លា ឈាមរបស់យើង ដែលផ្តល់ឱ្យ មានន័យថា ជីវិត ដូច្នេះ ការចូលរួមបរិច្ចាគឈាម គឺជាសកម្មភាពមនុស្សធម៌មួយដែលបានចូលរួមជួយជីវិតរបស់ មនុស្សតែម្តង។ ខណៈតម្រូវការឈាមសម្រាប់ជួយសង្គ្រោះជីវិត របស់មនុស្សប្រចាំថ្ងៃកាន់តែច្រើនឡើង និងជារឿងដែលចាំបាច់ ផងដែរ។
ឯកឧត្តម នេត្រ ភក្ត្រា បានបន្ថែមថា បើនិយាយតាមធម៌ព្រះពុទ្ធ វិញ ការធ្វើទានតាមរយៈការផ្តល់ឈាម ជាអានិសង្ឃមួយខ្ពស់ ដែលបានចូលរួមផ្តល់ជីវិតដល់ជនរងគ្រោះដែលត្រូវការឈាម ជាចាំបាច់ សម្រាប់សង្គ្រោះជីវិតចេញពីមច្ចុរាជ។ លោកជឿជាក់ ថា បុគ្គលដែលបានចូលរួមបរិច្ចាគឈាម នឹងមានអារម្មណ៍ជ្រះថ្លា និងបញ្ជាក់ថាខ្លួនមិនបានស្តាយក្រោយនោះទេ ចំពោះការសម្រេច ចិត្តផ្តល់ឈាមរបស់ខ្លួន ពីព្រោះឈាមដែលបានដែលបានបរិច្ចាគ គឺជាការជួយសង្គ្រោះអាយុជីវិតរបស់មនុស្ស។ ការធ្វើបុណ្យ អ្វីក៏ដោយ គឺមិនស្មើនឹងការជួយសង្គ្រោះជីវិតមនុស្សនោះទេ។
លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមនៃ ក្រសួងសុខាភិបាល បានឱ្យដឹងថា តម្រូវការឈាមក្នុង ឆ្នាំ២០២៤កន្លងមក មជ្ឈមណ្ឌលត្រូវការឈាម មួយប្លោក ដើម្បី ជួយសង្គ្រោះជីវិត អ្នកជំងឺរៀងរាល់ ៥នាទីម្តង។ តម្រូវការឈាម ប្រចាំថ្ងៃសរុបមានជាង៣០០ ទៅ៣៥០ប្លោក នៅរាជធានី ភ្នំពេញ។ តម្រូវការទូទាំងប្រទេសមានប្រមាណជិត១៤៣,១៤៣ប្លោក ហើយ មជ្ឈមណ្ឌលជាតិផ្តល់ឈាម បាន គ្របដណ្តប់ជាង ៧៥% នៃការផ្គត់ផ្គង់ឈាមទូទាំងប្រទេស។
លោកវេជ្ជបណ្ឌិត សុខ ប៉ូ បានបន្ថែមថា ប៉ុន្តែ ការទទួលអំណោយ ឈាមតាមរយៈសប្បុរសជនដោយស្ម័គ្រចិត្ត និងមិនទទួលកម្រៃឆ្លើយតបបានតែ ២៥% នៃតម្រូវការក្នុងប្រទេសយើងតែប៉ុណ្ណោះ ក្នុងខណៈដែលប្រទេសជិតខាង ការបរិច្ចាគឈាម ដោយស្ម័គ្រចិត្ត អាចផ្គត់ផ្គង់រហូតដល់លើសពី ៩០%នៃតម្រូវការ នេះបើយោង តាមទិន្នន័យរបស់ អង្គការសុខភាព ពិភពលោក។ លោក វេជ្ជបណ្ឌិត បានជម្រាបជូនបន្តថា ការបរិច្ចាគឈាមមិនប៉ះពាល់ដល់សុខភាពទេ ហើយឈាមមានប្រភពតែមួយគត់ គឺពីមនុស្សមិនមានរោងចក្រណាអាចផលិតបានទេ៕
