ក្រោយពីមានការបង្ហោះរបស់គណនីហ្វេសប៊ុកឈ្មោះ អង្គភាព គេហទំព័រ ខ្មែរថ្ងៃនេះ កាលពីថ្ងៃទី៩ ខែកក្កដា ឆ្នាំ២០២៥ បានរៀបរាប់ថា មានករណីអ្នកសារព័ត៌មានជាច្រើនអង្គភាព បានទៅដាក់ប៉ុស្តិ៍ជជុះ ដេកចាំកាក់រកផលប្រយោជន៍នៅក្នុងស្រុកឱរ៉ាល់ ខេត្តកំពង់ស្ពឺ។
បន្ទាប់ពីនោះ ដោយមានការបញ្ជារបស់គណៈបញ្ជាការឯកភាពស្រុកឱរ៉ាល់ អាជ្ញាធរបានរៀបចំក្រុមការងារចុះពិនិត្យមើល និងបង្ក្រាបបានប៉ុស្តិ៍ជជុះជំរិតទារប្រាក់ នៅចំណុចផ្លូវគ្រោះក្រហម ផ្លូវជាតិលេខ៤៤ ស្ថិតនៅភូមិក្រាំងពង្រ ឃុំសង្កែសាទប ។
នៅយប់ថ្ងៃទី០៩ ខែកក្កដា ឆ្នាំ២០២៥ វេលាម៉ោង០២.០០នាទីរំលងអាធ្រាត កម្លាំងគណៈបញ្ជាការឯកភាពស្រុកឱរ៉ាល់ដឹកនាំដោយ លោក សួស ប៊ុនធឿន អភិបាលរងនៃគណៈអភិបាលស្រុកឱរ៉ាល់ លោក ឌិប អេងលី នាយករងរដ្ឋបាលស្រុកឱរ៉ាល់ លោកវរសេនីយ៍ឯក ប៊ុត ប៊ុនធឿន អធិការនគរបាលស្រុកឱរ៉ាល់ ដឹកនាំកម្លាំងអន្តរាគមន៍នៃអធិការដ្ឋានចំនួន ០៩ នាក់ទៀត បានចុះទៅដល់ទីតាំង ធ្វើការពិនិត្យ និងឃាត់ខ្លួនជាក់ស្តែង បានជនសង្ស័យចំនួន ០២ នាក់ រួមទាំងវត្ថុតាងដូចខាងក្រោម៖
១.ឈ្មោះ វ៉េត ម៉ាប់ ភេទប្រុស អាយុ៤៣ឆ្នាំ រស់នៅភូមិព្រៃឈៀង ឃុំឫស្សីសាញ់ ស្រុកស៊ីធរកណ្តាល ខេត្តព្រៃវែង មុខរបរជាអ្នកសារព័ត៌មាន បាសិទ្ធធីវី មានទីតាំងនៅភូមិអន្ទង់ក្រវៀន ឃុំម្កាក់ ស្រុកអង្គស្នួល ខេត្តកណ្ដាល ។ ក្នុងនោះ សមត្ថកិច្ចបាន រថយន្តម៉ាក Toyota Camry ពណ៌ស ពាក់ផ្លាកលេខ ភ្នំពេញ 2E-2110, ពូថៅចំនួន ០១ ដើម, ដែកចំរ៉ុងចំនួន ១០គ្រាប់, ទូរស័ព្ទម៉ាក Iphone ចំនួន ០២គ្រឿង, កាតសម្គាល់អ្នកសារពត៌មានចំនួន ០២សន្លឹក, អត្តសញ្ញាណប័ណ្ណសញ្ជាតិខ្មែរចំនួន ០១សន្លឹក, ប័ណ្ណបើកបរចំនួន ០១សន្លឹក, ប័ណ្ណសម្គាល់រថយន្តចំនួន ០១សន្លឹក, លុយខ្មែរចំនួន ០១លានរៀល ។
២.ឈ្មោះ សឿន សំណាង ភេទប្រុស អាយុ៤៩ឆ្នាំ រស់នៅភូមិក្រសាំង ឃុំឆែបបួយ ស្រុកឆែប ខេត្តព្រះវិហារ មុខរបរជាអ្នកសារព័ត៌មានអង្គភាពស្លឹករឹត មានទីតាំងនៅរាជធានីភ្នំពេញ។ រថយន្តម៉ាក Lexus 470 ពណ៌ប្រផេះ ពាក់ផ្លាកលេខ ភ្នំពេញ 2O-2441, ទូរស័ព្ទចំនួន ០២គ្រឿង (ម៉ាក Iphone ០១គ្រឿង ម៉ាក តិចណូ ០១គ្រឿង), -លុយខ្មែរចំនួន ៤០ម៉ឺនរៀល, អត្តសញ្ញាណប័ណ្ណសញ្ជាតិខ្មែរចំនួន ០១សន្លឹក, កាតសម្គាល់អ្នកសារពត៌មានចំនួន ០១សន្លឹក, ជំពាមកៅស៊ូចំនួន ០១, ចិញ្ជៀនដាំត្បូងចំនួន ០១វង់ ។
សមត្ថកិច្ចពីធ្វើការបង្ក្រាប សមត្ថកិច្ចបាននាំយកជនសង្ស័យមកអធិការដ្ឋាន ដើម្បីធ្វើការសាកសួរបន្ថែម ។ សមត្ថកិច្ចបានអោយដឹងថា បន្ទាប់ពីធ្វើការសាកសួរ ជនសង្ស័យខាងលើ បានឆ្លើយសារភាពថា ខ្លួននៅចំណុចនោះ ដើម្បីឃ្លាំមើលបទល្មើសព្រៃឈើ និងយកលុយពីអ្នកដឹកអុស ដឹកធ្យូងក្នុង ១ឡាន ៥០០០រៀល ទៅ ១០,០០០រៀល គ្រាន់ទិញបាយហូប ហើយមិនដែលដេញចាប់ដេញស្ទាក់អ្វីទេ គឺពួកគាត់ឈប់អោយដោយស្ម័គ្រចិត្ត ។
បច្ចុប្បន្ន ជនសង្ស័យទាំង ០២នាក់ យើងបានធ្វើការឃាត់ខ្លួនរួមជាមួយ វត្ថុតាងធ្វើការស្រាវជ្រាវកសាងសំណុំរឿងចាត់ការតាមនិតិវិធី ៕
