(ថ្ងៃទី ២៤ ខែកក្កដា ឆ្នាំ ២០២៥) សម្តេចតេជោ ហ៊ុន សែន បានចេញមុខបដិសេធយ៉ាងខ្លាំងចំពោះរបាយការណ៍ដែលចុះផ្សាយដោយកាសែតថៃមួយ ដែលបានអះអាងថា សម្តេចបានចាកចេញពីប្រទេសកម្ពុជាទៅកាន់ប្រទេសចិន។ នៅក្នុងសេចក្តីថ្លែងការណ៍បន្ទាន់មួយ សម្តេចបានបញ្ជាក់ថា សម្តេចកំពុងតែស្ថិតនៅក្នុងប្រទេសកម្ពុជា និងកំពុងតែចូលរួមយ៉ាងសកម្មក្នុងការបញ្ជាកងទ័ពតាមរយៈប្រព័ន្ធវីដេអូ និងប្រព័ន្ធផ្សេងៗទៀត ជាមួយនាយករដ្ឋមន្ត្រី រដ្ឋមន្ត្រីក្រសួងការពារជាតិ អគ្គមេបញ្ជាការកងទ័ព និងបញ្ជាការកងកម្លាំងប្រដាប់អាវុធគ្រប់លំដាប់ថ្នាក់ ដើម្បីទប់ទល់នឹងអ្វីដែលសម្តេចហៅថា “ចោរថៃឈ្លានពាន”។
សម្តេចតេជោ ហ៊ុន សែន បានសង្កត់ធ្ងន់ថា “ខ្ញុំមិនរត់ទៅណាទេ សូមបងប្អូន ជនរួមជាតិ កុំព្រួយបារម្ភ !”។ សម្តេចបានបន្តថា សម្តេចបានអង្គុយនៅទីតាំងបញ្ជាការចាប់តាំងពីមេបញ្ជាការភូមិភាគទី២ របស់ថៃបានប្រកាសពីចេតនាក្នុងការបិទច្រកចូលប្រាសាទតាមាន់ធំ។
សម្តេចក៏បានចោទប្រកាន់ មេបញ្ជាការយោធភូមិភាគ២ របស់ថៃ ថាជាអ្នកដែលបង្កឲ្យមានជម្លោះនេះឡើង ដោយបញ្ជាឲ្យបិទប្រាសាទតាមាន់ធំកាលពីម្សិលមិញ និងបានបើកការបាញ់ប្រហារមកលើកងទ័ពកម្ពុជានៅព្រឹកថ្ងៃនេះ។
សម្តេចថែមទាំងបានរំលឹកពីការព្រមានពីមុនរបស់មេបញ្ជាការយោធាថៃរូបនោះ ដែលបានអះអាងថានឹងវាយកម្ពុជាដោយប្រើពេលត្រឹមតែ ៣ ថ្ងៃប៉ុណ្ណោះ ដោយសម្តេចបានសម្តែងការចង់ដឹងអំពី “យុទ្ធសាស្ត្រត្រឹម ៣ ថ្ងៃ” នោះ។
លើសពីនេះ សម្តេចតេជោ ហ៊ុន សែន បានរិះគន់យ៉ាងខ្លាំងចំពោះ “ចរិតកុហក់” នៃអ្នកនយោបាយថៃ និងសារព័ត៌មានថៃ ដែលសម្តេចចាត់ទុកថាបានក្លាយទៅជា “វប្បធម៌ធម្មតា” របស់ពួកគេ។ សម្តេចបានចំអកថា “សូមបន្តបោកប្រាស់តទៅទៀតចុះ” និងបានបន្តជាភាសាអង់គ្លេសថា “Don’t Thai to me !” (កុំមកបោកប្រាស់ខ្ញុំបែបថៃ!)។
